Mateo 10 - Livulu lya Shukulu Kalunga

Mazina a miluwa va Mwene Yesu likumi na vavali

¹ Co Yesu wasanene vandongisi vendi likumi na vavali, vaije kuli ikeye, co wavanene moko yakutundisa minzinzime yakujwala, nakukangwisa mishongo yoshe nakuvinja kwoshe.

² Awa akewo mazina a vaje miluwa likumi na vavali. Wakulivanga, Simoni (uje vatumbula Petulu) na ndolome yendi Anduleo, Yakomba na ndolome yendi Yowano vana va Zembendeo.

³ Filipu na Mbatolomeo, Tomasi na Mateo muka-kutambula lisimu, Yakomba muna Alufeya, na Tandeo,

⁴ Simoni Zelote, na Yundasa Isikalyote uje wendele Yesu vungungu.

Yesu atuma vandongisi likumi na vavali

⁵ Yesu watumine ava miluwa likumi na vavali, wavashikile ngwendi, “Kesi muye mu mafuti a vanu vaje kesi vaYunda embwe, nambe mu limbo limo lya vaka-Samaliya embwe.

⁶ Oloni mwapande kuya ku vimanga vakuzimbala va muyati wa Isalele.

⁷ Co yeni mukambulule ngweni, ‘Vumwene vwa mwilu vuli muyehi!’

⁸ Kangwiseni vaka-kuvinja, sanguleni vatsi, jeleseni vaka-mbumba, co nakutundisa minzinzime yakujwala. Yeni munavitambula vyangoco kujeneka kufweta, ngecivene, neni lalo aneni ngoco kujeneka kutambulao cimo.

⁹ Kesi mwambate vimbongo vya ngolinde, nambe vya siliva, nambe vimbongo vya vunengu mu vinkombe vyeni.

¹⁰ Kesi mwambate lipakumuna mu vungenzi vweni, nambe vikoveyo vivali, nambe vin̄aku, nambe mulamu. Omwo muka-kupanga napande kutambula fweto yendi.

¹¹ “Omo mweta mu nganda nambe mwimbo, kovelenimo, co seteleni munu iya uje napande kumitambula mwamuvwa, co tumbameni nendi noo mukatundako.

¹² Omo mukakovela mu njuvo, endekeni ngwendi, ‘Kwoloka kukale neni.’

¹³ Co nga vanu va mu njuvo ije vamitambula mwamuvwa, taveni kwoloka kweni kukalemo, oloni nga kuvakamitambula mwamuvwa, kwoloka kweni kwiluke kuli yeni vavenya.

¹⁴ Co nga naumo wai amitambula nambe kutolilila ku vije vimwendeka, asinoni tundeni mu njuvo ije nambe mu nganda ije, totomoneni likungu ku myanja yeni.

¹⁵ Mwa vushunga njimileka ngwange, a Litangwa Lyakusompa Njambi akamwesa vaka-Sondoma na vaka-Ngomola mema ku mbunge kutuvakana nganda ije!

Mapakeso aje alinakwija

¹⁶ “Kengeni, njilinakumituma ngwe vimanga akati ka tungunga. Ngecivene, nyanyameni ngwe manyoka, co likongomekeni ngwe mayembe.

¹⁷ Toneni, omwo kukakala vanu vaje vakamikuta nakumitwala ku vimbanja mukumisompa, co vakamipupa makote mu masinangonge avo.

¹⁸ Co vakamitwala ku mesho a vaka-kushwana, na ku mesho a vimyene, omwo lizina lyange, ngeci mukambulule Vin̄anda Vyavivwa kuli vakevo na kuli vanu vaje kesi vaYunda.

¹⁹ Omo vakamitwala mukumisompa, kesi mushote vimbunge vyeni ngweni vikajo tukendeka nambe vatijo tukendeka, omwo a simbu ije vene vakamileka vati munapande kwendeka.

²⁰ Omwo majwi amukendeka kesi eni embwe, oloni akatunda kuli Munzinzime wa Ishweni ikeye akendeka muli yeni.

²¹ “Vanu vakatwala vasamba vavo ku kutsa, co vaishavo vakalinga kuli vana vavo cifwa eci lalo, co vana vakatengulukila visemi vavo nakuvatwala ku kutsa.

²² Co vanu voshe vakamizinda omwo lizina lyange. Oloni uje akakateya nakweta ku shongo akovoka.

²³ Omo vakamiyandesa mu limbo limo, teweleni ku limbo likwavo. Omwo mwa vushunga njimileka ngwange, kumukamanesa vipangi vyeni vyoshe mu membo a Isalele simbu kanda Muna Munu aije.

²⁴ “Kukwesi ndongisi atuvakana mulongisi wendi, nambe ndungo naumo wai natuvakana shukulu yendi.

²⁵ Ngecivene, ndongisi napande kulilongesa ngeci apwe amo na mulongisi wendi, co ndungo lalo napande kupanga ngeci apwe amo na shukulu yendi. Nga vavenya njuvo vamutumbula ngwavo Mbelezembulu, cooni naanga ya mu njuvo ije vakavatumbula mazina amavi manene!

Uje itunapande kukomoka

²⁶ “Ngecivene, kesi muzivile vanu lyova. Omwo kukwesi cuma cakufwika civakonwa kufukula, nambe cuma cakwendekela mu vushweke kuvanga cikajomboloke.

²⁷ Evi vinjilinakumileka mu vushweke, mukavyendeka mu mbunga, co nevi mulinakuziva vyakuyeveta, vyambululeni ku lifuti lyoshe.

²⁸ Kesi muzivile lyova vaje vatsiya muvila oloni kuvasa kutsiya mwonyo, oloni zivileni lyova Njambi, uje asa kunyongesa vyoshe mwonyo na muvila muje mu mbulu ya tuhya.

²⁹ Kuma kuvesi kulanda tunzilili vavali na mbongo imo indi? Co kanzilili naumo wai akatsi kujeneka cizango ca Ishweni.

³⁰ Oloni Ishweni walava vin̄ambu vyoshe vya ku mitwe yeni.

³¹ Ngecivene, kesi muzive lyova, yeni muli na seo yakama kutuvakana tunzilili vavangi!

Kutava Yesu nambe kumuvyana ku mesho a vanu

³² “Ngecivene, woshe akanjitava ku mesho a vanu, nange lalo njikamutava ku mesho a Tate ali mwilu.

³³ Oloni woshe akanjivyana ku mesho a vanu, nange lalo njikamuvyana ku mesho a Tate ali mwilu.

Yesu kanenele kwoloka oloni nzita

³⁴ “Kesi muyongole ngweni njinaija nakunena kwoloka ano a kaye embwe. Kunjezile nakunena kwoloka embwe, oloni moko ya mukwale.

³⁵ Omwo yange njinaija nakunena kwangunuka kwa vana va vanalume kuli vaishavo, nakwangunuka kwa vana va vanakazi kuli vainavo, na vainamweno kulyangunuka lalo kuli vainamweno,

³⁶ co vitozi vakama va munu vapwa vavushoko va mu njuvo yendi vavenya.

³⁷ “Woshe uje azema ishe nambe vaina kutuvakana yange kapandele kupwa ndongisi yange, co woshe uje azema munendi wa munalume nambe wa munakazi kutuvakana yange kapandele kupwa ndongisi yange.

³⁸ Woshe uje kambata cilindakano cendi nakukavangeya mu myanja yange kapandele kupwa ndongisi yange.

³⁹ Woshe uje ashaka kunyunga mwonyo wendi vavenya auzimbalesa, oloni woshe uje azimbalesa mwonyo wendi omwo lizina lyange akauwana.

Cikandelela

⁴⁰ “Woshe uje amitambula, natambula yange, co woshe uje natambula yange, natambula uje wanjitumine.

⁴¹ Woshe uje atambula muluwa wa Njambi, omwo wapwa muluwa wa Njambi akatambula cikandelela ca muluwa. Co woshe uje atambula muka-vushunga, omwo ikeye napu muka-vushunga akatambula cikandelela ca muka-vushunga.

⁴² Co woshe uje aana nganja ya mema akutonola kuli umo wa ava vavandondo omwo napu muka-kunjikava, mwa vushunga njimileka ngwange, akatambula cikandelela.”