Malakiya 1 - Livulu lya Shukulu Kalunga

Cizemo ca Shukulu Kalunga a Isalele

¹ Ovu vukevwo vuka-kwimanena vwa lijwi lya Shukulu Kalunga kuli Isalele ali Malakiya.

² Shukulu Kalunga alinakwendeka ku vanu vendi ngwendi, “Njamizema simbu yoshe.” Oloni vakumbulula ngwavo, “Watuzema vatijo?” Shukulu Kalunga akumbulula ngwendi, “Isau na Yakomba vapwile mu vundolome vwavo, oloni yange njinazeme Yakomba na vatekulwila vendi,

³ co njamuzinda Isau na vatekulwila vendi. Njinatengulula lifuti lya malundu lya Isau kupwa mu ngundu nakuseza vushwana vwendi ku vimbanje va mu mambo.”

⁴ Nga vatekulwila va Isau vaEndome vendeka ngwavo, “Vinganda vyetu vinapu vingundu, oloni tukavitungulula.” Co Shukulu Kalunga akakumbulula ngwendi, “Vasa kutungulula, oloni njikavisiwula lalo. Co vakavatumbula ngwavo, ‘Lifuti lya vaka-vuvi,’ na ‘Muyati wa vanu vaaluvalela Shukulu Kalunga ku myaka yoshe.’ ”

⁵ Mukacimona na mesho eni, co mukendeka ngweni, “Vukama vwa Shukulu Kalunga vunatuvakana nameme vinginga vya Isalele!”

Shukulu Kalunga endekela vaka-kukombelela

⁶ Shukulu Kalunga Muka-nzili yoshe alinakwendeka kuli vaka-kukombelela ngwendi, “Mwana asingimika ishe, na ngamba asingimika shukwa-ina. Nga yange njapwa nji ishweni, omwo vikajo kumunjisingimikila? Nga njapwa nji shukwa-nyokweni, omwo vikajo kumunjisingimikila? Yeni mulinakunjiyeluwisa, co munjihula ngweni, ‘Tunakuyeluwisa vatijo?’

⁷ Mulambula vyakulya vyavivi a mutula wange. Oloni yeni mwihula ngweni, ‘Twauviisa vatijo?’ Omwo mulinakwendeka ngweni, ‘Mutula wa Shukulu Kalunga wangoco.’

⁸ Omo munena cimuna wa kutsa mesho, nambe wakuvinja, nambe cilema, mukukombelela kuli yange, kuma muyongola ngeci munalingi mwamuvwa ndi? Nga ngoco acesekeni kwana cimuna wa cifwa cangacije kuli nguvulu! Kuma akavwaelela neni nambe kumishangazala ndi?”

⁹ Co ololo, yeni vaka-kukombelela, lambeleleni Njambi ngeci atuzivileko mema ku mbunge. Na vin̄ombelo vyangacije vyakutunda kuli yeni vakamitambula ndi?

¹⁰ Shukulu Kalunga Muka-nzili yoshe nendeka ngwendi, “Nga umo weni ashoke mapito a ku Njuvo yange ngeci kesi mushwameke tuhya twakujeneka seo a mutula wange. Kunjavwaelelele neni, co kunjikatambula milambu ije imunena kuli yange.

¹¹ Kutunda ku shongo ya kaye nakweta ku shongo ya kaye vanu vakanjisingimika. Co kwoshe-ikwoshe vakenyeka insense nakunjikombelela vin̄ombelo vyavivwa. Omwo lizina lyange likapwa lyakama akati ka miyati ya vanu!

¹² Oloni kumwesi nakunjisingimika omo mwendeka ngeci mutula wange unapu wangoco, nomo mukakombelelao vyakulya vije vimunayengula.

¹³ Mwendeka ngweni, ‘Tunajuka!’ Co munjishendumuna. Ngwe omo yeni mulinakukombelela kuli yange omo mukombelela kuli yange vimuna vakwiva nambe uje wakutenguka nambe uje wakuvinja. Kuma mwayongola ngeci njikatambula vin̄ombelo vyeni vyangacije ndi?

¹⁴ Cisingo cikale ali muka-makuli uje akombelela cimuna uje kesi na seo kuli yange, omo ali na cimuna wamuvwa mu vutanga vwendi uje yanalisingile kunjanaye! Omwo yange njapwa nji mwene wakama, co vanu vaka-mafuti oshe vanjikomoka.”