Mako 9 - Livulu lya Shukulu Kalunga

¹ Co wendekele lalo ngwendi, “Mwa vushunga njimileka ngwange, kuvali vamo kuno vaje kuvakatsi kuvanga vanamono Vumwene vwa Njambi vunaija na nzili.”

Kulimuka kwa Yesu

² Co omo kwetile matangwa atanu na limo, Yesu waile amo na Petulu na Yakomba na Yowano, co wavatwamenenene kulamata akamwa ya munkinda waulaja kwavo lika. Co omo vamukengele wemukile mweka ku mesho avo,

³ Asinoni vuzalo vwendi vwatokele too ngwe ceke, naumo munu wa ano a kaye asa kuvukusha nakuvutokesa ngacije wai.

⁴ Asinoni vaje vandongisi vatatu vamwene Elinja na Mosesa valinakusimutwiya na Yesu.

⁵ Co Petulu wendekele kuli Yesu ngwendi, “Mulongisi, mwamuvwa kuli yetu kukala kuno! Co tutunga mambalanda atatu, limo lyove, limo lya Mosesa, co limo lya Elinja.”

⁶ Ikeye amo na vakwavo vakele manene na lyova ngeci kazivukile vika napande kwendeka.

⁷ Asinoni lishelwa lyezile nakuvafwika, co lijwi lyatundile mu lishelwa lyendekele kuli vakevo ngwalyo, “Ou ikeye Munange injazema, mutolilileni!”

⁸ Aje vene vakengezekele noku-noku oloni kuvamwene munu weka wai, kuvanga Yesu lika wakele amo navo.

⁹ Co omo vatundile ku munkinda, Yesu wavasin̄ikile ngwendi, “Kesi mukalekeko munu umo a vyuma evi munamono, noo Muna Munu nasanguka ku vatsi.”

¹⁰ Ngecivene, vononokele lishiko lyendi, oloni akati kavo vashangumukile kulikanangana a n̄anda eyi ngwavo, “Oku ‘kusanguka ku vatsi’ kunalumbunuka vika?”

¹¹ Co vehwile Yesu ngwavo, “Omwo vikajo valongisi va majwi a Lishiko vakendeka ngwavo Elinja napande kwija akulivanga?”

¹² Co Yesu wavakumbulwile ngwendi, “Elinja napande kwija akulivanga mukuvwaesela cimweja vyuma vyoshe. Oloni omwo vikajo visoneka vyendeka ngwavyo Muna Munu akayanda manene, co vakamuvyana?

¹³ Oloni njimileka ngwange Elinja naija laja, co vanu vamulingile mwoshe muvashakelele, ngwe visoneka muvyendekele ali ikeye.”

Yesu akangwisa mukwenje uje wakele na munzinzime wakujwala

¹⁴ Omo vezile kuli vandongisi vaje vasalele, vamwene mbunga yakama yavazengelekele, co vamo valongisi va majwi a Lishiko vavazengelekele nakulinga navo vimata.

¹⁵ Omo vanu vamwene Yesu, valikomokelele manene, co vashatukilile kuli ikeye nakumukandelela.

¹⁶ Co Yesu wehwile vandongisi vendi ngwendi, “Vimata vya vika mulinakulinga navo?”

¹⁷ Co munalume umo wa akati ka mbunga ije wamukumbulwile ngwendi, “Mulongisi, njinanena munange kuli yove, omwo ali na munzinzime wakujwala, co kasa kwendeka.

¹⁸ Co oshe aje aumuwanena munzinzime wakujwala, umuwisila asi, co atutumuna lifulu ku kanwa, nakulitsakinya ku mayo, co ashinuka woshe ngo. Co njalombele vandongisi vove ngwange vamutundise munzinzime wakujwala, oloni kuvaasele.”

¹⁹ Co Yesu wendekele kuli vakevo ngwendi, “Yeni vaka-kujeneka kukulaela! Visimbu vingaijo njikakala neni? Visimbu vingaijo njinapande kuyanda omwo yeni? Neneni owo mukwenje kuno kuli yange!”

²⁰ Co vamunenele kuli Yesu. Vwasi-vwasi omo uje munzinzime wakujwala wamwene Yesu, aje vene wapindisile uje mwanike manene, ngecivene, wawililile asi nakulimbondinga, nakututumuna lifulu ku kanwa.

²¹ Co Yesu wehwile ishe ngwendi, “Simbu mukajo washangumukile?” Co wamukumbulwile ngwendi, “Tunde kuvwanike vwendi.

²² Co visimbu vyavingi ou munzinzime wakujwala ukashaka kumutsiya akumuwisila mu tuhya na mu mema. Tuzivileko mema ku mbunge nakutukwasa, nga wasa!”

²³ Co Yesu wamulekele ngwendi, “Eyo, nga yove vavenya wasa! Vyuma vyoshe vyasa kulingiwa kuli uje akulaela.”

²⁴ Aje vene ishe ya uje mwanike watambekele ngwendi, “Yange njinakulaela, oloni kesi manene. Njikwaseko ngeci njikulaele manene!”

²⁵ Co omo Yesu wamwene ngeci mbunga ije yakele nakumusindakana, ngecivene, washikile uje munzinzime wakujwala ngwendi, “Ove munzinzime wakujwala wa vusinda-matwi na vuveveve, njikushika ngwange tundamo muli ou mukwenje kesi ukelukile muli ikeye lalo!”

²⁶ Co uje munzinzime wakujwala watambekele manene, wawisile mwanike mwamuvi manene, co wamutundile. Mwanike wapwile ngwe civimbi, ngecivene, vanu vendekele ngwavo, “Natsi vene!”

²⁷ Oloni Yesu wamukwatele ku livoko nakumwindula, co wemanene.

²⁸ Co omo Yesu wakovelele mu njuvo, vandongisi vendi vamwihwile mu vushweke ngwavo, “Omwo vika yetu kutwasele kutundisa uje munzinzime wakujwala?”

²⁹ Co Yesu wavakumbulwile ngwendi, “Kuvanga malombelo lika asa kutundisa munzinzime wakujwala wa cifwa eci, kukwesi cuma ceka lalo cai.”

Yesu endeka lalo a kutsa kwendi

³⁰ Yesu na vandongisi vendi vatundile ku mutambela uje, co vaile vatuvakanene mu Ngalileya. Yesu kashakele ngeci vanu vazivuke kuje kwakele,

³¹ omwo wakele nakulongesa vandongisi vendi ngwendi, “Muna Munu ololo vamwana ku mavoko a vanu, co vakamutsiya. Oloni omo kuneti matangwa atatu, akasanguka.”

³² Oloni kuvazivukile kulumbunuka kwa vilongesa evi, co vakele na lyova lyakumwihula.

Uje napu wakama kutuvakana

³³ Co vetele ku Kapenauma, omo vakovelele mu njuvo Yesu wehwile vandongisi vendi ngwendi, “Vika mwakele na kulikanangana a ngila?”

³⁴ Oloni kuvamukumbulwile, omwo vakele nakulikanangana akati kavo ngwavo iya napu wakama.

³⁵ Co Yesu watumbamene asi, co wasanene vaje vandongisi likumi na vavali, wendekele kuli vakevo ngwendi, “Nga munu ashaka kulipwisa wakama napande kulipwisa ikeye vavenya wamundondo mu vyoshe, co lalo apwe ngamba ya voshe.”

³⁶ Co Yesu wakwatele mwanike wamundondo wamwimikile kulutwe lwavo. Co wamuvumbatelele wendekele ngwendi,

³⁷ “Woshe atambula mwanike umo wamundondo ngwe ou mu lizina lyange, natambula yange vene, woshe uje anjitambula, katambwile yange lika, oloni natambula uje wanjitumine.”

Woshe uje katulwisa ali amo netu

³⁸ Yowano wendekele ngwendi, “Mulongisi, twamwene munalume umo wakele nakutundisa minzinzime yakujwala mu lizina lyove, co twamulekele ngeci alikele, omwo ikeye kesi wa mu munga yetu embwe.”

³⁹ Oloni Yesu wavalekele ngwendi, “Kesi mweseke kumuvindika embwe, omwo naumo wai alinga vizivukiso mu lizina lyange asa kwendeka vwasi vyuma vyavivi ali yange.

⁴⁰ Omwo woshe uje katulwisa ali amo netu.

⁴¹ Mwa vushunga njimileka ngwange munu woshe uje amyana mema akunwa omwo yeni mwakundama kuli yange mwa vushunga vene akatambula cikandelela cendi.

Vyeseko vyakutwala ku vuvi

⁴² “Nga munu umo atanganesa mwanike wamundondo ngeci kesi akulaele kuli yange, mwamuvwa munu wangacije kumukutiiya limanya lyakama lyakulolela vunga mu mukoshi wendi nakumumbila mu mema a kalunga.

⁴³ Co nga livoko lyove likutanukisa ngeci uzimbalese kukulaela kwove, livatuleko! Mwamuvwa kuli yove kukovela mu mwonyo wa myaka yoshe na livoko limo kutuvakana kukala na mavoko oshe avali ngeci vakumbile mu tuhya twa myaka yoshe tuje kutwesi kuzima.

⁴⁴ Muje mainyo amwo aje alinakuvalya kuwesi kutsa, na tuhya tuje tuvenyeka kutwesi kuzima.

⁴⁵ Co nga lindi lyove likutanukisa ngeci uzimbalese kukulaela kwove, livatuleko! Mwamuvwa kuli yove kukovela mu mwonyo wa myaka yoshe na lindi limo kutuvakana kukala na mendi avali ngeci vakumbile mu tuhya twa myaka yoshe tuje kutwesi kuzima.

⁴⁶ Muje mainyo amwo aje alinakuvalya kuwesi kutsa, na tuhya tuje tuvenyeka kutwesi kuzima.

⁴⁷ Co nga lisho lyove likutanukisa ngeci uzimbalese kukulaela kwove, licakuvulemo! Mwamuvwa kuli yove kukovela mu Vumwene vwa Njambi na lisho limo kutuvakana kukala na mesho oshe avali ngeci vakumbile mu tuhya twa myaka yoshe tuje kutwesi kuzima.

⁴⁸ Muje mainyo amwo aje alinakuvalya kuwesi kutsa, na tuhya tuje tuvenyeka kutwesi kuzima.

⁴⁹ “Omwo munu woshe vakamujelesa na tuhya ngwe muvakajelesa n̄ombelo na mwongwa.

⁵⁰ “Mwongwa wapwa wauvwa, oloni nga ushamuka, utovala vatijo? “Co kaleni na mwongwa wa vusamba vwa kulitombola akati keni, kaleni mu kwoloka umo na mukwavo.”