Mako 8 - Livulu lya Shukulu Kalunga

Yesu alisa vanu vakupwa 4,000

¹ A matangwa aje mbunga yakama vakungulukile amo. Co vanu kuvakele na vyakulya, co Yesu wasanene vandongisi vendi vaije kuli ikeye, co wendekele ngwendi,

² “Njazivila vanu ava mema ku mbunge, omwo vanatumbama nange matangwa atatu, co kuvesi na vyakulya ngeci valye.

³ Co kunjishaka kuvashandola nanjala, kutewa vatsa lusike mu ngila, omwo vamo vanatundu kulyala manene.”

⁴ Co vandongisi vendi vamwihwile ngwavo, “Kulijo tuwana vyakulya vyakupwamo vyakulisa mbunga eyi yakama muno mu mambo?”

⁵ Co Yesu wavehwile ngwendi, “Muli na mikasha ya makende ingai?” Vamulekele ngwavo, “Itanu na ivali.”

⁶ Co Yesu washikile ije mbunga vatumbame asi. Asinoni watambwile ije mikasha ya makende itanu na ivali, wakandelelele kuli Njambi, waapazwile, co waanene kuli vandongisi vendi vapangele ije mbunga, co vandongisi vendi vapangezelele vanu.

⁷ Co vakele lalo na visi vamo vavandondo. Yesu wakandelelele evi, walekele vandongisi ngeci vapangezele vanu.

⁸ Co voshe valile vakutile, asinoni vandongisi vakungulwile vimbazuvwila vije vyasaleleo vashulisile mitonga itanu na ivali.

⁹ Co vanu vaje vakeleko vapwile 4,000.

¹⁰ Co Yesu washandwele vanu ngeci vaye, co aje vene wakovelele mu vwato amo na vandongisi vendi, co vaile ku lifuti lya Ndalamanuta.

VaFaliseo valomba cizivukiso

¹¹ VaFaliseo vamo vezile kuli Yesu, co vashangumukile kulinga nendi vimata. Vashakele kumweseka, vamulombele ngeci alinge cizivukiso cije cimwesa ngeci Njambi namutava.

¹² Oloni Yesu walisisumwine, co wendekele ngwendi, “Omwo vikajo vanu valelo valinakulomba kuvamwesa cizivukiso? Mwa vushunga njimileka ngwange, embwe! Kukwesi cizivukiso cakwana kuli vanu ava!”

¹³ Co wakatukile waile, wakovelele mu vwato, co wajavukile kuya musambwa ya lishali ku mutambela ukwavo.

Musima wa vaFaliseo na Helonde

¹⁴ Vandongisi vevalele kwambata makende, co vakele lika na mukasha umo wa likende mu vwato.

¹⁵ Co Yesu wavanangwile ngwendi, “Nyanyameni, co linyungeni ku musima wa vaFaliseo na ku musima wa Helonde.”

¹⁶ Co vashangumukile kulikanangana akati kavo ngwavo, “Alinakwandeka evi omwo kutwambatele makende.”

¹⁷ Co Yesu wazivukile vika vakele nakwendeka, ngecivene, wavehwile ngwendi, “Vikajo mulinakulikanangana akati keni ngweni omwo kumwambatele makende? Kuma na ololo kanda muzivuke nambe kuzivisisa ndi? Kuma mucili na mana a vulema ndi?

¹⁸ Yeni muli na mesho, kuma kumwasa kumona? Yeni muli na matwi, kuma kumwasa kuziva? Co kuma yeni kumwasa kwanuka

¹⁹ muje njapazwile mikasha ya makende itanu ali vaje vanu 5,000 ndi? Mitonga ya vimbazuvwila ingai mwashulisile a vije vyasaleleo?” Co vamukumbulwile ngwavo, “Likumi na ivali.”

²⁰ Co Yesu wavewile ngwendi, “Omo njapazwile ije mikasha ya makende itanu na ivali kuli vaje vanu 4,000, mitonga ingai mwashulisile a vije vyasaleleo?” Co vamukumbulwile ngwavo, “Itanu na ivali.”

²¹ Co wavehwile ngwendi, “Kuma anga kanda muzivuke ndi?”

Yesu akangwisa munalume wa kapuputwa ku Mbetesainda

²² Co vezile ku Mbetesainda, co vanu vamo vamunenelele umo kapuputwa wa munalume valambelelele Yesu ngeci amukambeke mavoko.

²³ Co Yesu wakwatele uje munalume wa kapuputwa a livoko, co wamutwalele anja ya limbo. Co wamujekwilile mate ku mesho endi, co Yesu waakele mavoko endi ali ikeye, wamwihwile ngwendi, “Wasa kumona cuma cimo ndi?”

²⁴ Co uje munalume wakengele mwilu wendekele ngwendi, “Eyo, njasa kumona vanu, oloni vakevo vanafu ngwe miti ilinakulizenga.”

²⁵ Asinoni Yesu welukilileo lalo kukambeka mavoko a mesho a uje munalume. A simbu eyi uje munalume wamwene mwamuvwa njwa, mesho endi atonene ngwe laja, co wamwene vyuma vyoshe nakutungukwa.

²⁶ Co Yesu wamutumine kwimbo lyavo wamushikile ngwendi, “Kesi wiluke mu limbo lije lalo.”

Petulu atava ngeci Yesu ikeye Kilistu Wakuvwavesa

²⁷ Asinoni Yesu na vandongisi vendi vaile kulyala ku membo aje akuyehi na Sesaliya Filipu. Co a ngila wavehwile ngwendi, “Njilekeniko, vanu valinakunjitumbula ngwavo yange iya?”

²⁸ Vamukumbulwile ngwavo, “Vamo valinakwendeka ngwavo yove Yowano Muka-kumbwitika, veka lalo ngwavo yove Elinja, vakwavo lalo ngwavo yove umo wa vaka-kwimanena.”

²⁹ Co wavehwile ngwendi, “Yeni oni munjitumbula ngweni yange iya?” Petulu wamukumbulwile ngwendi, “Yove Wakuvwavesa.”

³⁰ Asinoni Yesu wavasin̄ikile ngwendi, “Kesi mulekeko munu umo vya ali yange.”

Yesu endeka a tuyando twendi na a kutsa kwendi

³¹ Asinoni Yesu washangumukile kulongesa vandongisi vendi ngwendi, “Muna Munu napande kuyanda manene, co vakulunu vakamuvyana, na vakulunu va vaka-kukombelela, na valongisi va majwi a Lishiko. Co vakamutwala ku kutsa, oloni omo kuneti matangwa atatu akasanguka.”

³² Co wendekele mwamuvwa kuli vakevo. Ngecivene, Petulu wamutwalele kwavo lika, co wamukandele.

³³ Oloni Yesu watengulukile, co wakengele kuli vandongisi vendi, wendekele na Petulu ngwendi, “Tunda kuli yange ove Satana! Omwo viyongola vyove kesi vya Njambi, oloni vya vunu!”

³⁴ Asinoni Yesu wasanene ije mbunga na vandongisi vendi vaije kuli ikeye, co wendekele ngwendi, “Nga munu ashaka kunjikava, napande kulivyana ikeye vavenya, ambate cilindakano cendi, co anjikavangeye.

³⁵ Omwo munu woshe ashaka kunyunga mwonyo wendi auzimbalesa, oloni munu uje azimbalesa mwonyo wendi omwo lizina lyange na a muzimbu wauvwa akauwana.

³⁶ Omwo nga munu afuka kaye koshe, oloni azimbalesa mwonyo wendi vika awanao? Mwa vushunga vene nacimo cai!

³⁷ Omwo cuma mukajo munu asa kwingisa mu mwonyo wendi?

³⁸ Nga munu akanjizivila shwamwa na vilongesa vyange akati ka cisemwa eci ca vupangala na vuvi, asinoni Muna Munu lalo nendi akamuzivila shwamwa omo akaija mu vumpau vwa Ishe amo na tungelo vakujela.”