Mako 7 - Livulu lya Shukulu Kalunga

Vilongesa vya vakukulwila

¹ VaFaliseo vamo na valongisi va majwi a Lishiko vaje vatundile ku Yelusalema vakungulukilile kuli Yesu.

² Vamwene ngeci vandongisi vendi vamo valile vyakulya vyavo kujeneka kujwela ku mavoko, kuvajwelele ngwe mu ngila ije ivendekele vaFaliseo ku vanu ngeci valingemo. (

³ Omwo vaFaliseo, na vaYunda, vakavele vilongesa vije vatambwile kuli vakukulwila vavo, kuvasele kulya ngoco kuvanga kujwela mwamuvwa ku mavoko avo,

⁴ co lalo kuvasele kulya cuma cakutunda kuje kwakulandesela kuvanga vacikushe akulivanga. Vakavangeyeye mashiko akwavo amangi aje avatambwile, ngwe kukusha vinganja, na vindeo, na malonga, na milili.)

⁵ Ngecivene, vaFaliseo na valongisi va majwi a Lishiko vehwile Yesu ngwavo, “Omwo vikajo vandongisi vove vakaleulula vilongesa vya vakukulwila vetu? Vakevo kuvesi kujwela ku mavoko omo valya!”

⁶ Co Yesu wavakumbulwile ngwendi, “Yeni vaka-civembulu! Isaya Muka-kwimanena wambulwile mwamuvwa vyeni ngwendi, ‘Njambi ngwendi, vanu ava valinakunjisingimika lika na majwi avo, oloni vimbunge vyavo vili kulyala nange.

⁷ Cinapu cangoco kuli vakevo kunjilemesa omwo vakevo valinakulongesa mashiko a vanu ngwe akewo anapu mashiko ange!’

⁸ “Yeni munaka mashiko a Njambi kumukulo, co mulinakwononoka vilongesa vya vanu.”

⁹ Co Yesu wendekele lalo ngwendi, “Yeni munaleulula mashiko a Njambi ngeci mukave vilongesa vyeni.

¹⁰ Omwo Mosesa washikile ngwendi, ‘Singimika isho na vanyoko.’ Co, ‘Woshe uje asinga ishe nambe vaina vanapande kumutsiya.’

¹¹ Oloni yeni mukalongesa ngweni, nga munu ali na cuma cimo cije asa kukwasa naco ishe nambe vaina, oloni endeka ngwendi, ‘Evi vinapu Ngolevani,’ (kulumbununa ngwavo, eci cakundama kuli Njambi,)

¹² asinoni ikeye nalisambesa akukwasa ishe nambe vaina.

¹³ Mu ngila eyivene munatengulula majwi a Njambi kuwapwisa angoco na vilongesa mulinakulongesa vakweni. Co kuvili vyuma vyavingi vyakufwa ngacije vije vimukalingi.”

Vyuma vije vilingisa munu kupwa wakujwala

¹⁴ Asinoni Yesu wasanene ije mbunga vaije kuli ikeye, co wendekele navo ngwendi, “Njitolilileni yeni voshe, co muzivisise.

¹⁵ Navimo vyai vili anja vikovela muli munu, vyasa kumuviisa. Oloni vije vituuka muli munu, vikevyo vimuviisa.”

¹⁶ Tolilileni, uje woshe ali na matwi, azive!

¹⁷ Co omo Yesu wasezele ije mbunga wakovelele mu njuvo, vandongisi vendi vamwihwile a cisimo eci. Co Yesu wendekele kuli vakevo ngwendi,

¹⁸ “Kuma neni lalo kumuzivuka mwaila mana awa kutuvakana veka ndi? Kuma kumwazivukile? Navimo vyai vili anja vikovela muli munu vyasa kumuviisa,

¹⁹ omwo kuvikovela mu mbunge yendi embwe, oloni vikovela mwimo lyendi, co vituuka lalo anja kutunda mu muvila wendi.” (Akwendeka evi, Yesu watavesele ngeci vyakulya vyoshe vanapande kuvilya.)

²⁰ Co Yesu wendekele lalo ngwendi, “Vije vitunda muli munu vikevyo vimuviisa.

²¹ Omwo mukati, mu mbunge ya munu, mukemwo mukatundu viyongola vyavivi vije vimutwamenena ku vyuma vya vuvi, kwiva, kutsiya,

²² kulinga vupangala, kuliveya, nakulinga vyuma vyoshe vya vivi, kukwisa, mashungu amavi, cipululu, vungumba, kulyalesa, na vulema,

²³ evi vyuma vyoshe vyavivi vikevyo vituuka mukati ka munu nakumuviisa.”

Kukulaela kwa munakazi

²⁴ Asinoni Yesu watundile ku mutambela uje waile ku lifuti lya kuyehi na nganda ya Tile. Co wakovelele mu njuvo kashakele munu umo amuzivuke ngeci ali kuje, oloni kasele kuvanda.

²⁵ Co munakazi umo, munendi wakele na munzinzime wakujwala, wazivile Yesu, co aje vene wezile kuli Yesu wawililile ku myanja yendi.

²⁶ Munakazi uje kesi kaYunda, wasemukilile mu Fonisiya mu Silya. Co walambelelele Yesu ngeci atundise munzinzime wakujwala muli munendi.

²⁷ Oloni Yesu wamukumbulwile ngwendi, “Akulivanga tuciliseni vanike tai. Kesi mwamuvwa kwana vyakulya vya vanike ku tutali.”

²⁸ Oloni wamukumbulwile ngwendi, “Eyo mwane, oloni nameme vene tutali vakali vungululu vuje vukau ku mesa ya vanike!”

²⁹ Ngecivene, Yesu wendekele kuli ikeye ngwendi, “Omwo akukumbulula kwangacije, njikuleka ngwange ya kwimbo, ukawana munzinzime wakujwala unatundu laja muli munove!”

³⁰ Co welukile kwimbo, co wakawanene mwanike nalala a vulili, uje munzinzime wakujwala watundile muli munendi.

Yesu akangwisa kasinda-matwi na vuveveve

³¹ Asinoni Yesu watundile ku lifuti lya Tile, co waile ku Sindone nakweta ku Lishali lya Ngalileya, co watuvakanene mu lifuti lya Vinganda Likumi.

³² Co vanu vamo vamunenelele munalume umo wakusinda-matwi, co wakele lalo na kalaka, co valambelelele Yesu ngeci akambeke mavoko endi ali ikeye.

³³ Ngecivene, Yesu wamutwalele kwendi lika, kulyala na vanu, co waakele milavo yendi mu matwi a uje munalume, wajekwile mate, co wakwatele ndaka ya uje munalume.

³⁴ Asinoni Yesu wakengele mwilu, walisisumwine, wendekele kuli uje munalume ngwendi, “Efefata.” Kulumbununa ngwavo, “Shokolola!”

³⁵ Co aje vene matwi endi azikukile, na kalaka lalo kamutundile, washangumukile kwendeka mwamuvwa.

³⁶ Asinoni Yesu wasin̄ikile vanu ngeci kesi valekeko munu a cuma eci, oloni nameme wavasin̄ikile ngeci kesi vambulule, vakevo vambulwile na nzili.

³⁷ Co voshe vaje vavizivile valikomokelele ngwavo, “Alinakulinga vyoshe mwamuvwa! Nameme tusinda-matwi vaziva na tuveveve vendeka!”