Mako 6 - Livulu lya Shukulu Kalunga

Yesu vamuvyana ku Nazaleta

¹ Yesu watundile kuje welukile kwimbo lyendi, co vandongisi vendi vamukavele.

² Co a Litangwa Lyakuhwima washangumukile kulongesa mu sinangonge. Vanu vavangi vakele kuje, co omo vamuzivile, valikomokelele valihozwele ngwavo, “Kulijo nawana evi vyoshe?” Co vendekele lalo ngwavo, “Kuli nawana mana awa? Vati alinakulinga vizivukiso vyakufwa ngacije?

³ Kuma kesi ikeye muka-kushonga, muna Maliya, na ndolome ya Yakomba, na Yosefa, na Yundasa, na Simoni ndi? Co kuma kutwesi na vandokazi vendi kuno ndi?” Co vakevo vamuvyanene.

⁴ Co Yesu wendekele kuli vakevo ngwendi, “Muka-kwimanena kesi na kasingimiko hembo lyendi na ku vavushoko vwendi na ku naanga yendi kuvanga kweka.”

⁵ Co kasele kulinga cizivukiso cimo kuje, kuvanga lika wakambekele mavoko endi ali vanu vavandondo vaka-kuvinja, co wavakangwisile.

⁶ Co walikomokelele, omwo vanu kuvakulaelele. Asinoni Yesu waile ku membo akwatako, walongesele vanu.

Yesu atuma vandongisi likumi na vavali

⁷ Co wasanene vandongisi likumi na vavali vaije kuli ikeye, co wavatumine vavali, vavali. Co wavanene moko yakutundisa minzinzime yakujwala,

⁸ co wavashikile ngwendi, “Kesi mwambate cuma cimo a vungenzi vweni kuvanga mulamu lika, kesi mwambate likende, nambe lipakumuna, nambe vimbongo mu vinkombe vyeni.

⁹ Oloni zaleni vin̄aku, kesi mwambate lalo cikoveyo ceka camucivali.”

¹⁰ Co wavalakele lalo ngwendi, “Kwoshe kuje kuvakamitambula mwamuvwa, tumbameni ku njuvo ije vene noo mukatunda ku mwela uje.

¹¹ Co nga muketa ku nganda imo kuje vanu kuvakamitambula mwamuvwa nambe kumitolilila, tundeniko, co totomoneni likungu ku myanja yeni. Eci cikapwa vukaleo kuli vakevo.”

¹² Ngecivene, vaile nakwambulula kuli vanu ngeci vatenguluke ku vingila vyavo vyavivi.

¹³ Co vatundisile minzinzime yakujwala yaingi, co vavwavesele mazi vaka-kuvinja vavangi nakuvakangwisa.

Kutsa kwa Yowano Muka-kumbwitika

¹⁴ Mwene Helonde wazivile evi vyoshe, omwo lutsimo lwa Yesu lwaile kwoshe-ikwoshe. Vanu vamo vakele nakwendeka ngwavo, “Yowano Muka-kumbwitika nasanguka ku vatsi! Mukemwo ali na nzili yakama yakulinga vizivukiso.”

¹⁵ Oloni vamo vendekele ngwavo, “Ou ikeye Elinja.” Vakwavo vendekele ngwavo, “Ikeye muka-kwimanena, wakulifwa na umo wa vaje vaka-kwimanena va ku san̄ulu.”

¹⁶ Oloni omo Helonde wazivileko, wendekele ngwendi, “Ikeye Yowano Muka-kumbwitika, uje njatapele mutwe, oloni nasanguka lalo ku vatsi!”

¹⁷ Omwo Helonde washikile ngeci vakwate Yowano, co wamukutile nakumwaka mu kamenga. Helonde walingile evi omwo ali Helondiya, uje yambatele Helonde, wapwile munakazi wa ndolome yendi Filipu.

¹⁸ Omwo Yowano Muka-kumbwitika walekele Helonde ngwendi, “Kesi mwamuvwa kwambata munakazi wa shongo yove!”

¹⁹ Ngecivene, Helondiya wakele na likiti-kiti ali Yowano, co washakele kumutsiya, oloni kasele omwo ya Helonde.

²⁰ Omwo Helonde wakele na lyova ali Yowano omwo ikeye wazivukile ngeci Yowano wapwile muka-vushunga, co wakujela, co wamunyungile mwamuvwa. Helonde wazemene manene kutolilila kuli Yowano, nameme ikeye wakele nakumuzivisa longoto ku mbunge simbu yoshe yamutolililile.

²¹ Oloni akukotoka Helondiya wawanene ngila. Omo litangwa lyakwanuka kusemuka kwa Helonde, walingilile ciwano cakama vaka-kushwana vendi voshe, na vaka-kushika nzita, na vanu va vulemu va mu Ngalileya.

²² Co muna Helondiya wa munakazi wezile wakinine, wavwaelelesele Helonde na vaje vangenzi vakelemo. Ngecivene, mwene wendekele kuli uje mumbanda ngwendi, “Njilombe cuma coshe ciwushaka, co njikakwanaco.”

²³ Co wendekele nakulisinga kuli ikeye ngwendi, “Njilisinga ngwange cuma coshe ulomba njikakwanaco, nameme litambelo lya vumwene vwange!”

²⁴ Ngecivene, uje mumbanda waile kuli vaina, co wavehwile ngwendi, “Vika njinapande kukalomba kuli Helonde?” Co vaina vamukumbulwile ngwavo, “Mutwe wa Yowano Muka-kumbwitika.”

²⁵ Co uje mumbanda welukile vwasi-vwasi kuli mwene nakumulomba ngwendi, “Njishaka munjane ololo vene mutwe wa Yowano Muka-kumbwitika a lilonga!”

²⁶ Co mwene wakele na vusiwa manene, oloni kasele lalo kumuvyana omwo a cikulaeso cije walisingile ku mesho a voshe vaje vatumbamene nendi amo ku mesa.

²⁷ Ngecivene, watumine muka-kunyunga nakumushika ngwendi vanene vwasi mutwe wa Yowano. Muka-kunyunga watuukile, waile ku kamenga, co wakatapele Yowela mutwe,

²⁸ asinoni waunenele a lilonga wawanene kuli uje mumbanda, co uje mumbanda wautwalele kuli vaina.

²⁹ Omo vandongisi va Yowano vazivile vyuma evii, vezile nakwambata muvila wendi, co vakautsindile.

Yesu alisa vanalume vakupwa 5,000

³⁰ Miluwa va Yesu velukile valiwanene na Yesu, vamulekele vyoshe vije vivalingile nakulongesa.

³¹ Co vanu vavangi vakele nakulyendasana, co Yesu na vandongisi vendi kuvasele nameme kuwana simbu yakulya. Ngecivene, Yesu wendekele kuli vakevo ngwendi, “Tuyeni ku mambo kwetu lika tukahwimeko tai.”

³² Ngecivene, vakovelele mu vwato vaile ku mambo kwavo lika.

³³ Vanu vavangi vavamwene omo vaile, co vavazivukile, ngecivene, vasezele membo avo oshe vashatukilile lumbisi a nunda nakweta ku mutambela uje kulutwe lwa Yesu na vandongisi vendi.

³⁴ Omo Yesu watundile mu vwato, wamwene mbunga yakama, co wavazivilile mema ku mbunge, omwo vapwile ngwe vimanga vakujeneka kanyungi. Ngecivene, washangumukile kuvalongesa vyuma vyavingi.

³⁵ Co omo kwapwile cingwezi, vandongisi vendi vezile kuli ikeye vendekele ngwavo, “Litangwa linatoko laja, co muno mu mambo.

³⁶ Shandola vimbunga evi, ngeci vaye ku mahya na ku membo amuyehi vakalilandele vyakulya vakevo vavenya.”

³⁷ Oloni Yesu wavakumbulwile ngwendi, “Yeni vene vaaneni vyakulya ngeci valye.” Co vamwihwile ngwavo, “Kuma yove ushaka tuye nakulanda makende a vimbongo vya siliva vyakupwa 200 ngeci vakulye ndi?”

³⁸ Co Yesu wavehwile ngwendi, “Muli na makende angai? Yeni mukaamone.” Omo vakaawanene, co vamulekele ngwavo, “Mikasha ya makende itanu na visi vavali.”

³⁹ Asinoni Yesu walekele vandongisi vendi ngeci valeke vanu voshe vatumbame asi mu vimbunga na vimbunga a mwila wakuzivuluka.

⁴⁰ Ngecivene, vanu vatumbamene asi mu mikana, mbunga imo vakele 100 na mbunga ikwavo vakele makumi atanu.

⁴¹ Asinoni Yesu watambwile ije mikasha ya makende itanu na visi vavali, wakengele mwilu, co wakandelele kuli Njambi. Wapazwile ije mikasha ya makende wayanene kuli vandongisi vendi ngeci vapangezele vimbunga vya vanu. Co na vaje visi vavali lalo wavapangezelele mukati kavo.

⁴² Co voshe valile vakutile.

⁴³ Asinoni vandongisi vakungulwile vimbazuvwila vije vyasaleleo vya makende na visi vashulisile mitonga likumi na ivali.

⁴⁴ Co vanu vaje valile vapwile vanalume 5,000.

Yesu enda akamwa ya mema

⁴⁵ Aje vene Yesu wasindiiye vandongisi vendi ngeci vakovele mu vwato valivange kuya kulutwe ku Mbetesainda, musambwa ya lishali, omo simbu ikeye acili nakushandola vanu ngeci vaye.

⁴⁶ Co omo walisalesele na vanu, walamatele ku munkinda nakulombela.

⁴⁷ Co omo litangwa lyatokele, vwato vwakele akati ka lishali, co Yesu wakele endi lika a nunda.

⁴⁸ Co wamwene ngeci vandongisi vendi vali mu vukalu vwakukasha vwato, omwo lihunzi lyakele nakuvapekumuna, a mungulungengu, Yesu wezile kuli vakevo alinakwenda akamwa ya mema. Walingile ngwe alinakuvongoloka,

⁴⁹ oloni omo vamumwene alinakwenda akamwa ya mema. Vayongwele ngwavo, “Ndumba ya munu!” Co vatambekele manene.

⁵⁰ Omo vamumwene, co voshe vazivile lyova. Oloni vwasi-vwasi Yesu wendekele navo ngwendi, “Simpeni! Yange, kesi muzive lyova!”

⁵¹ Asinoni wakovelele mu vwato muje muvakele, co lihunzi lyalendamene. Co vandongisi valikomokelele,

⁵² omwo kuvazivisisile mukwanungulukilile kulisa vanu vakupwa 5,000 mana avo kuwazivukile vije vyalingiwile.

Yesu akangwisa vaka-kuvinja mu Ngenesaleta

⁵³ Co omo vajavukile lishali vezile ku lifuti lya Ngenesaleta, co vakutile vwato vwavo mu cikuma.

⁵⁴ Omo vatundile mu vwato, vwasi-vwasi vanu vazivukile Yesu.

⁵⁵ Ngecivene, vashatukilile mu lifuti mwoshe, co kwoshe kuje vamuzivile ngwavo kwali, vamunenelele vaka-kuvinja anga vanalala a manala avo.

⁵⁶ Co kwoshe kuje kwaile Yesu, mu membo, na mu vinganda, na mu mahya, vanu vamutwalelele vaka-kuvinja kuje ku mitambela yakulandesela nakumulambelelela ngeci atave vaje vakele nakuvinja vakwate nameme ku mukundwilo wa cikoveyo cendi. Co vaje voshe vakwateleko vakangukile.