Mako 2 - Livulu lya Shukulu Kalunga

Yesu akangwisa muka-kayekele

¹ Co omo kwetile lika matangwa amandondo Yesu welukile ku Kapenauma, co muzimbu washandokele ngwavo ali kwimbo.

² Ngecivene, vanu vavangi vezile vakungulukilile kuje amolika ngeci kukwakele mwela wai, nameme ku cikolo ca njuvo. Co Yesu wambulwile lijwi kuli vakevo

³ co vanalume vawana vezile, vanenele munalume muka-kayekele kuli Yesu.

⁴ Co omo mbunga ya vanu, kuvasele kwetesa uje munalume kuli Yesu. Vajambunwine akamwa ya njuvo muje mwakele Yesu, co omwo vatuvile mbengwa, vasoselele uje munu asi aje ashungamene Yesu, oku anga nalala a linala.

⁵ Co omo Yesu wamwene kukulaela kwavo, wendekele kuli uje munalume muka-kayekele ngwendi, “Munange, vivi vyove vanavisambesa.”

⁶ Vamo valongisi va majwi a Lishiko vatumbamene kuje vendekele akati kavo ngwavo,

⁷ “Omwo vikajo nakaluka kwendeka ngeci? Oku kunapu kushaula Njambi! Njambi lika ikeye muka-kusambesa vivi!”

⁸ Co aje vene Yesu wazivukile viyongola vyavo, ngeci wavehwile ngwendi, “Vikajo mulinakuyongwela vyuma vyangacije?

⁹ Cacasi cika, kwendeka kuli ou munalume muka-kayekele ngwange, ‘Vivi vyove vanavisambesa,’ nambe kwendeka ngwange, ‘Katuka, ambata linala lyove wende?’

¹⁰ Oloni njimimwesa ngeci muzivuke ngweni kuma Muna Munu ali na moko ano asi yakusambesa vivi.” Ngecivene, wendekele kuli uje muka-kayekele ngwendi,

¹¹ “Njikuleka ngwange, katuka, ambata linala lyove, ya kwimbo lyove!”

¹² Omo voshe vakele nakukengelela, uje munalume wakatukile, wambatele linala lyendi, co watuukile vwasi. Co voshe valikomokelele, co vashangazalele Njambi, vendekele ngwavo, “Kanda tumone vyuma vyakufwa ngacije!”

Yesu asana Levi

¹³ Yesu welukile lalo ku kenge ya lishali lya Ngalileya. Co mbunga ya vanu vezile kuli ikeye, co washangumukile kuvalongesa.

¹⁴ Co omo watundile ku mutambela uje, co wamwene muka-kutambula lisimu, Levi muna Alufeya, natumbama mu njuvo yendi muje mwakutambwila lisimu. Co Yesu wendekele kuli ikeye ngwendi, “Njikave.” Co Levi wakatukile wamukavele.

¹⁵ Co munima yevi Yesu wakele nakulya ku mesa mu njuvo ya Levi. Vaka-kutambula lisimu vavangi na vaka-vuvi, vakavele Yesu, co vavangi vatumbamene amo na Yesu na vandongisi vendi ku mesa.

¹⁶ Co vamo valongisi va majwi a Lishiko, vaje vapwile va Faliseo, omo vamwene Yesu alinakulya na vaka-vuvi na vaka-kutambula lisimu, ngecivene, vehwile vandongisi vendi ngwavo, “Omwo vikajo alinakulya amo na vaka-kutambula lisimu na vaka-vuvi?”

¹⁷ Co omo Yesu wazivileko, wendekele navo ngwendi, “Vakangule kuvesi kusetela cimbanda embwe, kuvanga vaka-kuvinja lika. Yange kunjezile mukusana vanu vaje vanalimono vakevo vavenya ngwavo vaka-vushunga, oloni vanu vaje vaka-vuvi.”

Cihula ca a kulikela kulya

¹⁸ Simbu imo vandongisi va Yowano Muka-kumbwitika na vaFaliseo valikelele kulya. Co vanu vamo vezile kuli Yesu nakumwihula ngwavo, “Omwo vikajo vandongisi va Yowano Muka-kumbwitika na vandongisi va vaFaliseo vakalikela kulya, oloni vandongisi vove kuvesi kulikela?”

¹⁹ Co Yesu wavakumbulwile ngwendi, “Kuma yeni mukengelela vangenzi ku ciwano ca vulo ngeci vaye na njala ndi? Mwa vushunga vene embwe! Omo vavenya vulo acili navo amo, kuvapandele kulinga ngacije.

²⁰ Oloni litangwa likaija omo vakatundisa vavenya vulo akati kavo, asinoni vakalikela kulya.

²¹ “Naumo wai atongela citopeko ca nanga yaiha a kazaku kalaja, omwo cije citopeko caciha citavula nanga yalaja, co cikaseza mbengwa yakama.

²² Nameme ngoco kuvesi kulongela vinyu vyaviha mu vinjeke vya vilambu vyalaja embwe, nga valingamo, vije vinjeke vya vilambu vikatuvika, co vinyu viitikila mwangoco. Oloni vinyu vyaviha vavilongela mu vinjeke vya vilambu vyaviha.”

Cihula ca a Litangwa Lyakuhwima

²³ Yesu wakele nakwita mu mahya a tiliku a Litangwa Lyakuhwima. Co vandongisi vendi vendele amo nendi, vashangumukile kushutozola mitwe ya tiliku.

²⁴ Ngecivene, vaFaliseo vendekele kuli Yesu ngwavo, “Kenga, omwo vikajo vandongsi vove valinakulinga evi kuvesi kulinga a Litangwa Lyakuhwima!”

²⁵ Co Yesu wavakumbulwile ngwendi, “Kuma kanda mulave vije vyalingile Ndaviti omo wajenekele vyakulya ndi? Ikeye na vanu vendi vakele na njala.

²⁶ Ngecivene, wakovelele mu Njuvo ya Shukulu Kalunga nakulya aje makende avakombelelele kuli Njambi. Eci calingiwile omo Aviyatale wapwile Muka-kukombelela Wakama. Ngwe ku Lishiko lyetu, kuvanga vaka-kukombelela kuli Njambi lika vakevo vanapande kulya makende awa, oloni Ndaviti waalile, co waaneneko lalo vanu vendi.”

²⁷ Co Yesu wamanesele ngwendi, “Litangwa Lyakuhwima valipangele omwo munu, kesi munu ivatangelele Litangwa Lyakuhwima.

²⁸ Ngecivene, Muna munu ikeye Mwene nameme a Litangwa Lyakuhwima.”