Mako 16 - Livulu lya Shukulu Kalunga

Kusanguka kwa Yesu

¹ Omo Litangwa Lyakuhwima lineti, Maliya Mandalena, na Maliya vaina ya Yakomba, na Salome valandele n̄undu ngeci vaye nakukavwavesa muvila wa Yesu.

² Co a mungulungengu a litangwa lya Calumingo, mutondo, vaile ku mbumbo.

³ Co a ngila valihozwele umo na mukwavo ngwavo, “Iya akatutundisilako limanya ku cikolo ca mbumbo?” (Lyapwile limanya lyakama manene.)

⁴ Asinoni vakengele kulutwe, vamwene ngeci limanya vanalitundisako laja ku cikolo.

⁵ Ngecivene, vakovelele mu mbumbo, vamwene munalume natumbama ku cilyo, nazala cikoveyo cacilaja cakutoka, co valikomokelele manene.

⁶ Co wendekele navo ngwendi, “Kesi mulikomokele, njazivuka ngeci mushakezeka Yesu wa ku Nazaleta, uje ivashukikile a cilindakano. Nasanguka, waimo muno! Kengeni, omu mukemwo mu mwela muvamulangekele.

⁷ Oloni mukalekeko vandongisi vendi, na Petulu lalo ngweni, ‘Nai laja kulutwe ku Ngalileya, kuje vene kukekwo mukamumwena, ngwe muje mwamilekele.’ ”

⁸ Ngecivene, vatuukilemo, co vashatukile kutunda ku mbumbo, vazivile lyova nakujaja. Co kuvambulwile ku munu naumo wai, omwo vazivile lyova. [

MAMANESELELO ALAJA A VIN̄ANDA VYAVIVWA Yesu alishololo kuli Maliya Mandalena

⁹ Omo Yesu wasangukile a mungulungengu a litangwa lya Calumingo, walisholwele akulivanga kuli Maliya Mandalena, uje yatundisile minzinzime yakujwala itanu na ivali.

¹⁰ Waile nakulekako vaje vakwavo vakele na Yesu. Vakele na vusiwa nakulila,

¹¹ co omo vazivile ngwavo Yesu alinakuyoya ngwendi ikeye vene namumono, kuvamukulaelele.

Yesu alisholola kuli vandongisi vendi vavali

¹² Munima ya vyuma evi, Yesu walisholwele mu cifwa ceka kuli vaje vavali omo vakele nakuya vungenzi vwavo.

¹³ Co velukile lalo nakukalekako vakwavo, oloni vakevo kuvakulaelele.

Yesu alisholola kuli vaje likumi na umo

¹⁴ Akukotoka, Yesu walisholwele kuli vandongisi likumi na umo omo vakele nakulya. Co wavaluvalesele, omwo kuvakulaelele, nomwo vakaluwisile vimbunge vyavo omwo kuvakulaelele vaje vamumwene omo wasangukile.

¹⁵ Co wendekele kuli vakevo ngwendi, “Yeni ku mafuti oshe a ano a kaye nakwambulula Vin̄anda Vyavivwa kuli vanu voshe.

¹⁶ Woshe uje akulaela nakumumbwitika akovoka, oloni woshe uje kakulaela vakamuhisa.

¹⁷ Co vaka-kukulaela vakavana nzili yakulinga vizivukiso, co vakatundisa minzinzime yakujwala mu lizina lyange, vakendeka vindaka vyaviha,

¹⁸ Vakakwata manyoka, co nambe nga vakanwa vyuma vya vushungu, kuvikavavulumuna, vakakambeka mavoko avo ali vaka-kuvinja, co vakenduka.”

Yesu vamutwala mwilu

¹⁹ Ngecivene, omo Mwene Yesu wamanesele kwendeka navo, co vamutwalele mwilu, co watumbamene ku livoko lya cilyo lya Njambi.

²⁰ Vandongisi vaile nakwambulula kwoshe, co Mwene wapangele amo navo nakushulisa ngeci kwambulula kwavo kwapwile kwa vushunga a vizivukiso vije vyalingiwile.] [ 9 Vanakazi vaile kuli Petulu na vasamba vendi, co vavalekele vukaleo vwa vyuma vyoshe vije vavalekele. 10 Munima yevi, Yesu ikeye vavenya watumine vandongisi vendi kutunda mu ngangela kutwala mu kangombe ka yambi ngeci vatwale lijwi lyakujela lyakwovoka kwa myaka yoshe.]