Mako 15 - Livulu lya Shukulu Kalunga

Yesu vamutwala kuli Pilato

¹ Co alikaki mutondo-tondo vakulunu va vaka-kukombelela na vakulunu, na valongisi va majwi a Lishiko, na vaka-Munga voshe, valiwanene vwasi-vwasi nakutumba matumbe. Co vakutile Yesu mu malyenge, vamutwalele nakumwana kuli Pilato.

² Co Pilato wamwihwile ngwendi, “Yove Mwene wa vaYunda ndi?” Co Yesu wamukumbulwile ngwendi, “Omu muunendeka mukemwo vene.”

³ Co vakulunu va vaka-kukombelela vavangelele Yesu vyuma vyavingi,

⁴ ngecivene, Pilato wamwihwile lalo ngwendi, “Kuma kuwasa kukumbulula ndi? Tolilila vyoshe evi valinakukuvangela!”

⁵ Oloni Yesu kakumbulwile lijwi nalimo lyai, ngecivene, Pilato walikomokelele manene.

Yesu vamusompela kutsa

⁶ A simbu yoshe ya Ciwano ca Pasovala, Pilato wakele na cilika cakwecela cinzinda uje vashakele vanu.

⁷ Co a simbu ije munalume umo lizina lyendi Mbalambasa wakele mu kamenga amo na vakwavo vaje vatsiile vanu na mpindangano.

⁸ Omo mbunga ya vanu vakungulukilile kuli Pilato, co wehwile ngeci avalingile ngwe muje akavalingila simbu yoshe

⁹ co wavehwile ngwendi, “Mushaka ngeci njimyecelele mwene ya vaYunda ndi?”

¹⁰ Omwo wazivukile mwamuvwa ngwendi vakulunu va vaka-kukombelela vakundikile Yesu ku mavoko endi omwo vakele na lifuwa.

¹¹ Oloni vakulunu va vaka-kukombelela vashongangeyeye ije mbunga vehwile Pilato ecele Mbalambasa.

¹² Co Pilato wendekele lalo ku mbunga ngwendi, “Vika mushaka ngeci njilinge nou mutumbula ngweni mwene ya vaYunda?”

¹³ Co vatambekele ngwavo, “Mushukike a cilindakano!”

¹⁴ Oloni Pilato wavehwile lalo ngwendi, “Mulonga ukajo wanalingi?” Oloni voshe vatambekele manene ngwavo, “Mushukike a cilindakano!”

¹⁵ Ngecivene, Pilato washakele kuvwaelelesa ije mbunga, ngecivene, wecelele Mbalambasa. Asinoni wapupile Yesu makote,co wavaneneye ngeci vakamushukike a cilindakano.

Mashwalale vashendumuna Yesu

¹⁶ Co mashwalale vakovelesele Yesu mukati ku cipango ca lipela lya nguvulu, co vasanene mbunga yoshe ya mashwalale.

¹⁷ Co vamuzikile cikoveyo cacilaja cakuvenga, co vavindile cilongo ca minango ya mambimbo, vacakele ku mutwe wendi.

¹⁸ Asinoni vashangumukile kumukandelela ngwavo, “A vulye mwene wa vaYunda!”

¹⁹ Co vamupupile na citi ku mutwe, co vamujekwilile mate, co vatsikamene a mavuli nakumulemesa.

²⁰ Omo vamanesele kumushendumuna, vamushulwile cikoveyo cakuvenga, co vamuzikile lalo vuzalo vwendi. Asinoni vamutwalele anja ngeci vakamushukike a cilindakano.

Yesu vamushukika a cilindakano

²¹ Co a ngila valiwanene na munalume umo lizina lyendi Simoni, uje wezile ku nganda kutunda kwimbo, co mashwalale vamusindiiye ngeci ambate cilindakano ca Yesu. (Simoni watundile ku Silene ishe ya Alekizanda na Lufuse.)

²² Co vatwalele Yesu ku mutambela uje vatumbwile ngwavo Ngolongota, kulumbunuka ngwawo, “Mutambela wa Cikola.”

²³ Co kuje vamwanene vinyu vyakukumbasana na miila, oloni Yesu kavinwile.

²⁴ Asinoni vamushukikile, co valipangelele vuzalo vwendi akati kavo, vatele n̄ela ngeci vawane munu na munu canapande kwambatao.

²⁵ Co yapwile simbu yamucitanu na viwana ku mutondo omo vamushukikile.

²⁶ Co vasonekele canukiso cakumuvangela ngwavo, “Mwene ya vaYunda.”

²⁷ Co vakevo lalo vashukikile vanu vavali amo na Yesu, umo ku cilyo mukwavo ku cimoshwe.

²⁸ Mu ngila eyivene visoneka vyapwilemo vije vyendekele ngwavyo, “Vamulavelele amo mu luvinda lwa vaka-kutsiya.”

²⁹ Co vanu vaje vakele nakwita kuje vaningangesele mitwe yavo nakushaula Yesu ngwavo, “Lelo tumona! Yove washakele kusiwula Njuvo ya Shukulu Kalunga, co ukayitunga lalo a matangwa atatu!

³⁰ Ololo shulukao oho a cilindakano ngeci ulyamene yove vavenya!”

³¹ Ngecivene, mu ngila eyi vene vakulunu va vaka-kukombelela na valongisi va majwi a Lishiko vamushendumwine, nakwendeka kuli umo na mukwavo ngwavo, “Wovwele vakwavo, oloni kasa kulyovola ikeye vavenya!

³² Tumoneni Wakuvwavesa, mwene wa Isalele, ashuluka a cilindakano ololo, co tukulaela kuli ikeye!” Co vaje lalo vavali vavashukikile amo na Yesu vamutengulukilile nakumushaula.

Kutsa kwa Yesu

³³ Co omo litangwa lyakele akati ka mutwe, kwakele lisusulungu mu lifuti lyoshe a maola atatu.

³⁴ Co a ola yamucitatu, Yesu watambekele na lijwi lyakama ngwendi, “Eloi, Eloi, lama sambakatani?” Kulumbununa ngwavo, “Njambi yange, Njambi yange, vikajo unanjisezela?”

³⁵ Co vamo vaje vemanene kuje, vazivileko vendekele ngwavo, “Tolilileni, alinakusana Elinja!”

³⁶ Co umo wavo washatukile vwasi, wanonele mupelo, waujavekele mu vinyu vyakulula, wawakele ku shongo ya lihongo. Asinoni waakele uje mupelo ku kanwa ka Yesu wendekele ngwendi, “Vandamena! Tumone nga Elinja aija nakumutundisa a cilindakano!”

³⁷ Co Yesu watambekele na lijwi lyakama manene, co watsile.

³⁸ Co nanga ije yajenjelele mu Njuvo ya Shukulu Kalunga yatavukile akati, kutunda kwilu nakweta asi.

³⁹ Co mukulunu wa mashwalale uje wemanene kulutwe lwa cilindakano omo wamwene muje mwatsile Yesu wendekele ngwendi, “Mwa vushunga munalume ou wapwile Muna Njambi!”

⁴⁰ Kuje lalo kwakele vanakazi vamo vakele kuje, vakele kulyala nakukengelela, akati kavo akele Maliya Mandalena, na Maliya vaina ya Yakomba na Yosefa, na Salome.

⁴¹ Vaje vakevo vakavele Yesu omo wakele ku Ngalileya nakumukwasa. Vanakazi vakwavo lalo vavangi vaje vezile amo nendi ku Yelusalema navo vakele kuje.

Yesu vamutsinda

⁴² Co omo vetele ku cingwezi, lyapwile Litangwa Lyakulivwaesela, te kanda Litangwa Lyakuhwima lya vaYunda lyete,

⁴³ Yosefa wa ku Alamatiya wezile. Wapwile wa kasingimiko mu Munga yavo, wavandamenene kwija kwa Vumwene vwa Njambi, wasimpile waile kuli Pilato nakulomba muvila wa Yesu.

⁴⁴ Co Pilato walikomokelele akuziva ngwavo Yesu natsi laja. Co wasanene uje mukulunu wa mashwalale nakumwihula nga Yesu natsi laja.

⁴⁵ Omo wazivile vukaleo kuli uje mukulunu wa mashwalale, co Pilato walekele Yosefa ngeci akambate muvila wa Yesu.

⁴⁶ Co Yosefa walandele nanga ya linyu, co washukwile muvila a cilindakano, wauzengelele a nanga ya linyu, co waulangekele mu mbumbo ije ivacokwele mu limanya. Co waandumwinine ku cikolo limanya lyakama.

⁴⁷ Maliya Mandalena na Maliya vaina ya Yosefa vakele nakukengelela, co vamwene kuje valangekele muvila wa Yesu.