Mako 13 - Livulu lya Shukulu Kalunga

Yesu endeka a kunyonga kwa Njuvo ya Shukulu Kalunga

¹ Co omo Yesu watuukile mu Njuvo ya Shukulu Kalunga, umo wa vandongisi vendi wamulekele ngwendi, “Kenga, Mulongisi, vuvwa vwa mamanya na vuvwa vwa vinjuvo!”

² Co Yesu wakumbulwile ngwendi, “Munamono vinjuvo vyoshe evi ndi? Kukukakala limanya limo likasala mu mutambela walyo, oshe akasiwuka.”

Tuyando na mapakeso

³ Co Yesu watumbamene a Munkinda wa Oliveta, kushungama na Njuvo ya Shukulu Kalunga, omo Petulu, na Yakomba, na Yowano, na Anduleo vezile kuli ikeye kwavo lika vamwihwile ngwavo,

⁴ “Tuleke mwaka uka evi vyoshe vikasholoka, na cizivukiso mukajo tukazivuka naco ngwetu simbu inete ngeci vilingiwe?”

⁵ Co Yesu wendekele kuli vakevo ngwendi, “Nyanyameni, ngeci kesi mutave umo amitangule.

⁶ Vavangi vakaija mu lizina lyange vakendeka ngwavo, ‘Yange vene ikeye!’ Vakatangula vavangi.

⁷ Co omo mukaziva muyoyo wa vinzita na muzimbu wa vinzita, oloni kesi mukajujuke. Evi vinapande kusholoka, oloni kuvilumbununa ngeci kukotoka kunete.

⁸ Omwo lifuti limo likalwa nzita na lifuti likwavo, co vumwene vukalwisa vumwene vukwavo. Kukakala mandunduma ku mitambela yakuliseza-seza na njala ya lyangengela. Evi vinapu ngwe kushangumuka kwa mushongo wakukita mwana.

⁹ “Oloni munapande kunyanyama. Omo vakamikwata nakumitwala ku vimbanja nakumisompa. Co vakamipupa mu masinangonge avo, co vakamimika ku mesho a vaka-kushwana na kuli vimyene omwo lizina lyange, mukavaleke Vin̄anda Vyavivwa.

¹⁰ Oloni omo simbu kanda yete, Vin̄anda Vyavivwa vakavyambulula kuli vanu voshe.

¹¹ Co omo vakamikwata nakumitwala ku vimbanja, kesi mukalinyenge nakuyongola ngweni vika tukendeka, oloni omo simbu inete, mukendeka vyoshe vivakamyana. Omwo majwi amukendeka kesi ngwe eni embwe, oloni akatunda kuli Munzinzime Wakujela.

¹² Co musamba akatwala musamba wendi ku kutsa, co vaishavo lalo vakalinga cuma cimo kuli vana vavo. Co vana vakatengulukila visemi vavo nakuvatwala ku kutsa.

¹³ Co voshe vakamizinda omwo lizina lyange. Oloni woshe uje akakateya na ku shongo akovoka.

Cimweso ca Vunyengwe

¹⁴ “Oloni mukamona cimweso ca Vunyengwe cinemana kuje kucapandele kukala.” (Yove ulinakulava zivisisa muvinalumbunukila!) “Asinoni vaje vali mu Yundeya vakatewele ku malundu.

¹⁵ Munalume uje ali akamwa ya njuvo yendi kesi akashulukeo nakwambata vije vili mu njuvo yendi.

¹⁶ Co munalume uje ali mu lihya lyendi kesi akeluke ku njuvo yendi nakwambata cikoveyo cendi.

¹⁷ Co luvinda kuli vanakazi vaje vakakala na tufumba, na vanakazi vaje vakajamwesa a simbu ije!

¹⁸ Lombeleni kuli Njambi ngeci vyuma evi kesi vikalingiwe a simbu ya cisika!

¹⁹ Omwo a matangwa aje kukakala n̄avava ije kanda vaimoneo laja ano a kaye tunde akushangumuka omo Njambi watangele kaye kweta nalelo lino. Nambe kulutwe kuyikakalako lalo.

²⁰ Co nga Shukulu Kalunga kakeesele matangwa aje, nga munu naumo wai akovoka. Oloni naakeesa omwo vanu vendi vaje vaangwile.

²¹ “Asinoni, nga munu umo akamileka ngwendi, ‘Kengeni, ali kuno Kilistu!’ Nambe ‘Kengeni, uje ali kuje!’ Kesi mukamukulaela.

²² Omwo kukasholoka vaKuvwavesa va makuli na vaka-kwimanena va makuli vakamwesa vizivukiso na vikomokeso vyakama, vakatangule nga citava nameme vaje vavaangwile kuli Njambi.

²³ Oloni nyanyameni! Njinamilekela cimweja vyuma vyoshe omo simbu kanda yete.

Kwija kwa Muna Munu

²⁴ “Oloni a simbu ije vene omo tuyando tuneti, litangwa likazivala vwii, co ngonde kuyikatu lyezi,

²⁵ co vingongonosi vikawila asi, co vinzili vya mwilu vikaninganga.

²⁶ Asinoni Muna Munu akasholoka, akaija a mashelwa na nzili yakama na vumpau.

²⁷ Co akatuma tungelo ku vimbango viwana vya ano asi, co vakakungulula vanu va Njambi vaje vaangwile kutunda ku shongo imo ya kaye nakweta ku shongo ikwavo ya kaye.

Cilongesa ca muti wa mukuyu

²⁸ “Lilongeseni mana ku cisimo ca muti wa mukuyu. Omo minango yawo ijovelela, mwazivuka ngweni nyangao ili muyehi.

²⁹ Ngecivene, mu cifwa eci vene, omo mukamona vyuma evi vilingiwa, mwazivuka ngweni ikeye ali muyehi, ku cikolo vene.

³⁰ Mwa vushunga njimileka ngwange vyuma vyoshe evi vikalingiwa simbu kanda vanu ava valinakuyoya ololo voshe vatse.

³¹ Lilu na asi vikaita, oloni majwi ange kuwakaiti embwe.

Naumo wai azivuka litangwa nambe simbu

³² “Oloni litangwa lije, nambe simbu ije naumo wai avizivuka, nambe tungelo va mwilu, nameme Mwana, kuvanga Ishe lika ikeye azivuka.

³³ Nyanyameni, kengeleleni, omwo kumuzivuka simbu omo ikaija.

³⁴ Eci cikapwa ngwe munu atunda ku njuvo yendi aya vungenzi, omo aseza njuvo yendi, mu mavoko a vangamba vendi, munu na munu wakele na vipangi vyendi vyalingile, co muka-kunyunga ku cikolo wamushikile ngwendi akengelele.

³⁵ Toneni, omwo kumuzivuka simbu ije yakeluka vavenya njuvo, nambe ku cingwezi, nambe akati ka vutsiki, nambe a vindemba, nambe ku mutondo.

³⁶ Nga aija vwasi-vwasi, kesi amiwane anga munalala tulo.

³⁷ Co evi njendeka kuli yeni, asinoni njilinakuvyendeka kuli voshe ngwange, kengeleleni!”