Mako 11 - Livulu lya Shukulu Kalunga

Yesu akovela na vumpau mu Yelusalema

¹ Omo vashwenyele kuyehi na Yelusalema, ku vinganda vya Mbetefanje na Mbetaniya, vetele ku Munkinda wa Oliveta. Yesu watumine vandongisi vendi vavali kulutwe,

² co wavashikile ngwendi, “Yeni ku limbo lije lili kulutwe lweni. Co omo muketa kuje, mukawana muna cimulu vanamukutu uje kanda alondeo munu. Muzituleni munjineneleye.

³ Nga munu umo amihula ngwendi omwo vika mumuzitwila, mulekeni ngweni Shukulu amushaka, co akamwilwisa vwasi.”

⁴ Ngecivene, vaile, co vakawanene uje muna cimulu kumukulo wa tapalo, vanamukutiiya ku cikolo ca njuvo. Co vamuzitwile.

⁵ Co vanu vamo vemanene kuje vavehwile ngwavo, “Vika mulinakulinga, mulinakuzitula ou muna cimulu?”

⁶ Co vavakumbulwile ngwe muje mwavalekele Yesu, co vaje vanu vavatavesele ngeci vaye nendi.

⁷ Co vanenele uje muna cimulu kuli Yesu, co vajalele vikoveyo vyavo a mwongo wa uje cimulu, co Yesu watumbameneo.

⁸ Co vanu vavangi vajalele vikoveyo vyavo mu ngila, co vamo vatetele minango ya mashakavale vaijalele lalo mu ngila.

⁹ Co vanu vaje vatwamene kulutwe na vaje vakavele munima yendi vashangumukile kutambeka ngwavo, “Shangazaleni Njambi! Njambi amuvezikise ou aija mu lizina lya Mwene!

¹⁰ Njambi avezikise vumwene vuje vulinakwija vwa Mwene Ndaviti, tatetu! Shangazaleni Njambi!”

¹¹ Co Yesu wakovelele mu Yelusalema, co waile mu Njuvo ya Shukulu Kalunga, co wakengele-kengele ku vyuma vyoshe. Oloni omwo litangwa lyatokele, waile ku Mbetaniya na vaje vandongisi likumi na vavali.

Yesu asinga muti wa mukuyu

¹² Alikaki, omo vatundile ku Mbetaniya, Yesu wazivile njala.

¹³ Co wamwene mukuyu uli alyala kamandondo na maputa awo akuzivuluka, ngecivene, waileko kukaumona nga akawanako vushuka vumo. Oloni omo weteleko, wawaneneko lika maputa, omwo kuyapwile simbu yawo yakwima vushuka.

¹⁴ Co Yesu wendekele ku muti uje ngwendi, “Naumo wai lalo akalya ku vushuka vwove!” Co vandongisi vendi vamuzivile.

Yesu aya ku Njuvo ya Shukulu Kalunga

¹⁵ Omo vetele mu Yelusalema, co Yesu wakovelele mu Njuvo ya Shukulu Kalunga washangumukile kushekamo voshe vaje vakele nakulanda nakulandulwilamo. Co wafulumikile vimesa vya vaje vakele nakulandakana vimbongo na vitumbamo vya vaje vakele nakulandesa mayembe,

¹⁶ co katavesele munu naumo wai ngeci ambate vivala avitise mu cipango ca Njuvo ya Shukulu Kalunga.

¹⁷ Co walongesele vanu ngwendi, “Kuma kuvasonekele mu visoneka ngwavo Njambi wendekele ngwendi, ‘Njuvo yange vakaitumbula Njuvo yakulombelela vanu va miyati yoshe.’ Oloni yeni munaipwisa mwela mwakuvanda vezi!”

¹⁸ Co vakulunu va vaka-kukombelela na valongisi va majwi a Lishiko akuziva evi, vashakezekele ngila imo ngeci vamutsiilemo Yesu. Vakele na lyova ali ikeye, omwo mbunga yoshe valikomokelele a vilongesa vyendi.

¹⁹ Omo vetele ku cingwezi, Yesu na vandongisi vendi vatundile mu nganda.

Cilongesa ca a muti wa mukuyu

²⁰ Alikaki mutondondo, omo vakele nakuya mu ngila, vamwene uje muti wa mukuyu. Woshe womine cau na ku mizi yawo.

²¹ Co Petulu wanukile vije vyalingiwile wendekele kuli Yesu ngwendi, “Kenga, Mulongisi, muti wa mukuyu uwasingile unomu!”

²² Co Yesu wavakumbulwile ngwendi, “Kulaeleni kuli Njambi.

²³ Mwa vushunga njimileka ngwange woshe uje akendeka ku lilundu eli ngwendi katuka ulyumbile mu mema a kalunga, co kalingi vimata mu mbunge yendi, oloni akulaela lika ngeci vije alinakwendeka vikalingiwa, vakamulingilavyo.

²⁴ Ngecivene, omwo a cuma eci njimileka ngwange, omo mulomba cuma, kulaeleni ngeci munacitambula, co vyoshe mulomba vakamyanavyo.

²⁵ Co omo mwimana nakulombela, sambesa mukweni nga uli na vimo nendi, ngeci Ishweni ali mwilu akamisambesa neni lalo ku milonga yeni munalingi.

²⁶ Nga kumusambesa vakweni ku milonga yavo, Ishweni lalo ali mwilu kakamisambesa ku milonga yeni.”

Cihula ca moko ya Yesu

²⁷ Co velukile lalo mu Yelusalema. Omo Yesu wakele nakwendangana mu Njuvo ya Shukulu Kalunga, vakulunu va vaka-kukombelela vakama, na valongisi va majwi a Lishiko, na vakulunu vezile kuli ikeye

²⁸ co vamwihwile ngwavo, “Moko yeyajo ulinakulinga nayo vyuma evi? Nambe iya nakwana moko eyi?”

²⁹ Yesu wavakumbulwile ngwendi, “Nange lalo njimihula cihula cimo, co nga munjikumbululaco, asinoni nange lalo njikamileka kunjinawana moko yakulinga vyuma evi.

³⁰ Moko yambwitikile nayo Yowano yatundile kuli Njambi indi yatundile kuli vanu? Njikumbululeni.”

³¹ Co vashangumukile kulikanangana akati kavo ngwavo, “Vatijo twendeka? Nga tukumbulula ngwetu, ‘Yatundile kuli Njambi,’ endeka ngwendi, ‘Omwo vikajo kumwamukulaelele Yowano?’

³² Oloni nga twendeka ngwetu, ‘Yatundile kuli vanu?’ ” (Vakele na lyova lya vanu, omwo voshe vazivukile ngeci Yowano wapwile muka-kwimanena.)

³³ Ngecivene, vakumbulwile Yesu ngwavo, “Kutuzivuka.” Co Yesu wendekele kuli vakevo ngwendi, “Nameme yange lalo kunjimileka kunjinawana moko eyi njilinakulinga nayo vyuma evi.”