Mako 1 - Livulu lya Shukulu Kalunga

Kwambulula kwa Yowano Muka-kumbwitika

¹ Evi vikevyo Vin̄anda Vyavivwa vya ali Yesu Kilistu, Muna Njambi.

² Ngwe mwasonekele Isaya muka-kwimanena ngwendi, “Njambi nendeka ngwendi, ‘Kengeni njikatuma muluwa wange kulutwe lwove uje akavwaesa ngila yove.’

³ Lijwi lya umo atambeka mu mambo ngwendi, ‘Vwaeseni tapalo ya Shukulu Kalunga, sheveni mu ngila yendi ngeci akwitilemo!’ ”

⁴ Ngecivene, Yowano washolokele mu mambo, wakele nakumbwitika vanu nakwambulula ngwendi, “Tengulukeni ku vivi vyeni ngeci vamimbwitike, co Njambi akamisambesa ku vivi vweni.”

⁵ Co vanu vavangi vatundile ku lifuti lya Yundeya na ku nganda ya Yelusalema vezile kuli Yowano nakumutolilila. Valitavelele ku vuvi vwavo, co wavambwitikile mu Ndonga ya Yondau.

⁶ Yowano wazalele vuzalo vwa maaka a kamelo, na mwiva wa cipapa mu mbunda yendi, co walile vimbimba mikumbi na vuki.

⁷ Co wambulwile kuli vanu ngwendi, “Munu ou alinakwija munima yange wakama kutuvakana yange. Kunjapandele nameme kutsikama nakuzitula mikole ya a vin̄aku vyendi embwe.

⁸ Yange njimimbwitika mu mema, oloni ikeye akamimbwitika mu Munzinzime Wakujela.”

Kumbwitika na vyeseko vya Yesu

⁹ A matangwa aje vene Yesu watundile ku Nazaleta mu lifuti lya Ngalileya, co Yowano wamumbwitikile mu Ndonga ya Yondau.

¹⁰ Co vwasi-vwasi omo watumukile mu mema, wamwene lilu linashokoloka, co Munzinzime watundile mwilu watongamene ali ikeye ngwe katela.

¹¹ Co mwilu mwatundile lijwi ngwalyo, “Yove u Munange injazema. Njilinakuvwaelela ali yove.”

¹² Aje vene Munzinzime wamutwalele mu mambo,

¹³ muje mwakakele matangwa makumi awana, nakumweseka kuli Satana. Co wakele amo na tusitu kuje, oloni tungelo vezile nakumukwasa.

Yesu asana vaka-kujevela visi vawana

¹⁴ Omo Yowano vanamwaka laja mu kamenga, Yesu waile ku Ngalileya nakwambulula Vin̄anda Vyavivwa vya Njambi.

¹⁵ Wendekele ngwendi, “Simbu yaivwa ineete, co Vumwene vwa Njambi vuli muyehi! Tengulukeni mu vimbunge vyeni ngeci mutunde ku vuvi, co kulaeleni ku Vin̄anda Vyavivwa!”

¹⁶ Omo Yesu wakele nakushwangesa Lishali lya Ngalileya, wamwene vandolome vavali vaka-kujevela visi, Simoni na ndolome yendi Anduleo, vakele nakutsiya visi mu lishali a linimbwa.

¹⁷ Yesu wendekele kuli vakevo ngwendi, “Njikaveni, co njikamipwisa vaka-kujevela vanu.”

¹⁸ Co vwasi-vwasi vasezele manimbwa avo, co vakavele Yesu.

¹⁹ Omo washwenyeseleko wamwene lalo vandolome vavali, Yakomba na Yowano, vana va Zembendeo. Vakele mu vwato nakutungulula manimbwa avo.

²⁰ Co omo Yesu wavamwene, wavasanene, co vasezele ishavo Zembendeo mu vwato amo na vaje vanu vaka-vipangi, co vakavele Yesu.

Munalume muka-munzinzime wakujwala

²¹ Co Yesu na vandongisi vendi vezile mu nganda ya Kapenauma, co a Litangwa Lyakuhwima Yesu wakovelele mu sinangonge washangumukile kulongesa.

²² Co vanu vaje vamuzivile vakomokele manene kulongesa kwendi, omwo ikeye kalifwile ngwe valongisi va majwi a Lishiko, oloni ikeye walongesele na moko.

²³ Aje vene munalume umo wakele na munzinzime wakujwala wakovelele mu sinangonge watambekele ngwendi,

²⁴ “Ushaka kulinga vika netu, yove Yesu wa ku Nazaleta? Kuma unaija kuno nakutunyongesa ndi? Njakuzivuka, yove wapwa u muluwa wakujela wa Njambi!”

²⁵ Asinoni Yesu washikile uje munzinzime ngwendi, “Oloka kuluu, co tunda muli munu ou!”

²⁶ Co uje munzinzime wakujwala wapindisile uje munalume manene, watambekele manene, co watundile muli ikeye.

²⁷ Co vanu voshe valikomokelele manene vashangumukile kulyendekesa umo na mukwavo ngwavo, “Vika evi? Oku kunapu kulongesa kwakuhwa ndi? Munu ou ali na moko yakushika minzinzime yakujwala, co ikeyo imwononoka!”

²⁸ Co aje vene lutsimo lwa Yesu lwashandokelele mu lifuti lya Ngalileya mwoshe.

Yesu akangwisa vanu vavangi

²⁹ Co Yesu na vandongisi vendi, amo na Yakomba na Yowano, vatuukile mu sinangonge vaile ku njuvo ya Simoni na Anduleo.

³⁰ Vainamweno ya Simoni vavinjile lisika-sika valalele a vulili, co omo Yesu wetele kuje vamulekele vya ali vainamweno ya Simoni.

³¹ Co waileko, wamukwatele ku livoko, wamwindwile. Co lisika-sika lyamutundile, co washangumukile kuvapangela.

³² Ku cingwezi akulauka kwa litangwa, vanu vanenele kuli Yesu voshe vaka-kuvinja na vaje vakele na minzinzime yakujwala.

³³ Co vanu voshe va mu nganda vakungulukilile ku njuvo ya Petulu.

³⁴ Co Yesu wakangwisile vavangi vaje vakele nakuvinja mishongo yakuliseza-seza, co watundisile lalo minzinzime yakujwala yaingi. Co katavele minzinzime yakujwala yendeke cuma cimo, omwo ikeyo yamuzivukile.

Yesu ambulula mu Ngalileya

³⁵ Co alikaki mutondo-tondo, simbu kanda kukye, Yesu wendukile, co watuukile mu njuvo. Waile mu mambo endi lika nakulombela.

³⁶ Oloni Simoni na vasamba vendi vaile nakumushakezeka,

³⁷ co omo vamuwanene, vendekele ngwavo, “Vanu voshe valinakukushakezeka.”

³⁸ Oloni Yesu wavakumbulwile ngwendi, “Tunapande kuya kulutwe ku membo akwavo akwatako. Njinapande kwambulula kuli vakevo lalo, omwo evi vikevyo vinjezilile.”

³⁹ Ngecivene, wetile mu Ngalileya mwoshe, wambulwile mu masinangonge nakutundisa minzinzime yakujwala.

Yesu akangwisa muka-mbumba

⁴⁰ Co munu umo wakele nakuyanda na mushongo wa mbumba wezile kuli Yesu, watsikamene ku mesho endi, co wamulambelelele ngwendi, “Shukulu, nga mushaka, mwasa kunjijelesa.”

⁴¹ Yesu wamuzivilile mema ku mbunge, co wolwele livoko lyendi, wamukwatele, wendekele ngwendi, “Njishaka, jela!”

⁴² Co aje vene mbumba yamutundile, co wajelele.

⁴³ Asinoni Yesu wamusin̄ikile, co aje vene wamutumine kweka,

⁴⁴ wendekele kuli ikeye ngwendi, “Kesi ulekeko munu umo a cuma eci embwe. Oloni ya ukalisholole kuli muka-kukombelela akakwilule, asinoni ukakombelele n̄ombelo ije yashikile Mosesa, ngweci voshe vakazivuke ngwavo vanakukangwisa.”

⁴⁵ Oloni uje munalume waile, co washangumukile kushandola ije n̄anda kwoshe-ikwoshe. Mwa vushunga vene, wambulwile manene ngeci Yesu kasele kuya mu nganda citona-mesho. Oloni wakele kwendi lika, co vanu vezile kuli lkeye vatundile kwoshe-ikwoshe.