Maako 9 - Livulu lya Shukulu Kalunga

Avimeleke

¹ Avimeleke muna Ngilyone waile ku limbo lya Shekeme, kuje kwakele vavushoko vwa vaina voshe, co wavalekele

² kulomba vanalume va ku Shekeme ngwendi, “Cikajo cimushaka? Kumishwana kuli vana va Ngilyone voshe vakupwa 70, nambe kumishwana kuli munalume umolika? Anukeni ngweni Avimeleke wapwa weni vavenya ku cisemwa ca maninga.”

³ Co vavushoko vwa vaina vendekele kuli vanalume va ku Shekeme ali ikeye, co vanalume va ku Shekeme vayongwele kukava Avimeleke, omwo ikeye wapwile kavushoko kavo.

⁴ Co vamwanene mavundungulu 70 a siliva akutunda ku njuvo ya Mbale, co na vimbongo vije wakumwine vilema kuvesi na seo kulipandakana nendi.

⁵ Co ikeye waile ku njuvo ya ishe ku Ofela, kuje akamwa ya limanya watsiilileo vandolome vendi 70, vana va Ngilyone va vanalume. Oloni Yotame, mutinikila wa Ngilyone, kamutsiile omwo wavandele.

⁶ Asinoni vanalume voshe va ku Shekeme, na ku Mbetemilo vakatukile amolika, vaile ku Shekeme ku muti wakujela wa Oke, kuje vakapwisile Avimeleke mwene.

⁷ Omo Yotame wazivileko, co walamatele akamwa ya Munkinda wa Ngelizime, co watambekele manene kuli vakevo ngwendi, “Njitolilileni, yeni vanalume va ku Shekeme, ngeci Njambi atolilile lalo kuli yeni!

⁸ Ku simbu ya ku san̄ulu miti ikeyo vavenya yaile nakulyangwile mwene ngwe vanu. Co ikeyo yendekele ku muti wa Olive ngwayo, ‘Pwa mwene yetu.’

⁹ Oloni muti wa Olive wakumbulwile ngwawo, ‘Akumishwana yeni, njinapande kulikela kutuwisa mazi aje vakapangesa mukusingimika vinjambi na vanu.’

¹⁰ Asinoni miti yendekele ku muti wa mukuyu ngwayo, ‘Ija upwe mwene yetu.’

¹¹ Oloni uje muti wa mukuyu wakumbulwile ngwawo, ‘Akumishwana yeni, njinapande kulikela kutuwisa vushuka vwange vwavuvwa vwakupwelelela.’

¹² Ngecivene, miti yendekele ku mukolovozi wa vushuka vwa vinyu ngwayo, ‘Ija upwe mwene yetu.’

¹³ Oloni muti wa mukolovozi wa vushuka vwa vinyu wakumbulwile ngwawo, ‘Akumishwana yeni, njinapande kulikela kutuwisa vushuka vwange vwa vinyu, vuje vukavwaelelesa vinjambi na vanu.’

¹⁴ Ngecivene, miti yoshe yendekele ku muti wa mambimbo wa mu shwata ngwayo, ‘Ija upwe mwene yetu.’

¹⁵ Co muti wa mambimbo wakumbulwile ngwawo, ‘Nga yeni mwa vushunga mushaka yange njipwe nji mwene yeni, ijeni oni mwakuhwimine mu munzinze wange. Nga sheni, co tuhya twa milangi tukatuuka ku minango ya mambimbo ange nakwenyeka miti ya Kendale ya ku Lembanone.’ ”

¹⁶ Asinoni Yotame watwaleleo ngwendi, “Kuma yeni mwapwile mu vaka-vushunga na kasingimiko omo mwapwisile Avimeleke mwene ndi? Kuma yeni mwasingimika vyendeka vya Ngilyone nakulinga mwamuvwa na naanga yendi, ngwe ku vilinga vyendi vyalingile kuli yeni ndi?

¹⁷ Anukeni ngeci tate walwile omwo yeni. Ikeye wecelele mwonyo wendi mukumyamena kuli vaMindyani.

¹⁸ Oloni ku litangwa lya lelo yeni munatengulukila naanga ya tate nakuyilwisa. Munatsii vana vendi va vanalume vakupwa 70 a limanya limolika, co munapwisa Avimeleke, munendi wa munalume yakitilile kuli ndungo yendi wa munakazi kupwa mwene wa ku Shekeme, omwo wapwa kavushoko keni.

¹⁹ Cooni ololo, nga evi vimunalingi litangwa lya lelo kuli Ngilyone, na ku naanga yendi vinapu vya vushunga na kasingimiko, co vwaeleleni na Avimeleke, co nendi lalo avwaelele amo neni.

²⁰ Oloni nga kesi ngoco, co tuhya tukatunde kuli Avimeleke, tukenyeke vanu va ku Shekeme, na ku Mbetemilo. Co tuhya tukatunde ku vanu va ku Shekeme, na ku Mbetemilo tukenyeke Avimeleke.”

²¹ Ngecivene, Yotame watewele waile ku Mbela, wakakele kuje omwo wakele na lyova lya ndolome yendi Avimeleke.

²² Co Avimeleke washwanene vaIsalele myaka itatu.

²³ Asinoni Njambi wakovelesele cizindo akati ka Avimeleke na vanu va ku Shekeme, co vakevo vatengulukilile Avimeleke nakumulwisa.

²⁴ Co eci calingiwile ngacije ngeci Avimeleke na vanu vaje va ku Shekeme, vaje vamushongangeyeye kutsiya vana va Ngilyone vakupwa 70, ngeci vase kufweta mulonga wavo.

²⁵ Co vanalume va ku Shekeme vashwekele vanu mukuvandamena Avimeleke ngeci vamulwise aje akamwa ya minkinda, vakevo vevilile munu na munu uje wetile mu ngila yavo. Co Avimeleke vamulekele vyuma evi.

²⁶ Asinoni Ngale muna Avende wezile ku Shekeme na vandolome vendi, co vanu va ku Shekeme vamukulaelele.

²⁷ Co voshe vaile mu mahya avo nakuvuya mikolovozi ya vushuka vwa vinyu, vavulingile vinyu nakulinga ciwano. Co vaile mu njuvo ya njambi yavo, kuje vakalile nakunwa, co vashendumwine Avimeleke.

²⁸ Ngale wendekele ngwendi, “Tunapu vanu va muyati uka yetu va ka Shekeme? Omwo vikajo tulinakupangela Avimeleke? Nambe ngoco, ou ikeye iyajo? Ikeye napu muna Ngilyone! Co Zevule wakele nakutambula mashiko kuli ikeye, oloni omwo vikajo tulinakumupangela? Singimikeni kukulwila yeni Hamole, ikeye vavenya cikota!

²⁹ Nga yange njatwamenenene vanu ava nga njatundisa Avimeleke! Nga njasa kumuleka ngwange, ‘Nga uli na mashwalale vavangi, ija twakulwe!’ ”

³⁰ Zevule, muka-kushwana nganda ije, waluvalele omo wazivile vije vyendekele Ngale.

³¹ Co watumine tunganda mu vushweke kuli Avimeleke ku Aluma nakwendeka ngwavo, “Ngale muna Evende na vandolome vendi vanaija ku Shekeme, co vakevo kuvakakutava ukale muno mu nganda embwe.

³² Ngecivene, ololo, yove na vanu vove munapande kuya vutsiki vuno vene mukavande mu mahya.

³³ Co mukenduka imene mutondo-tondo akutuuka kwa litangwa, co mukalwisa nganda mukuvakasumuna. Cooni omo Ngale na vanu vendi vakatuuka nakumilwisa, co mukalinga navo mwoshe mumukasela!”

³⁴ Ngecivene, Avimeleke na vanu vendi voshe vatundilemo vutsiki vuje vene, nakuvanda kuyehi na Shekeme mu vimunga viwana.

³⁵ Omo Avimeleke na vanu vendi vamwene Ngale atuuka nakwimana ku cikolo ca nganda, co vajombolokele kutunda ku mitambela yavo ije ivavandele.

³⁶ Co Ngale wavamwene, wendekele kuli Zevule ngwendi, “Kenga! Vanalume valinakwija nakushelumuka kutunda akamwa ya minkinda!” Zevule wendekele ngwendi, “Vaje kesi vanalume, inapu lika minzinzime ili a minkinda.”

³⁷ Co Ngale wendekele lalo ngwendi, “Kenga! Kuli vanalume valinakushelumukila mu ngila ya ku munkinda, co munga imo ilinakushwangesa ngila yakutunda ku muti wa Oke wa vaka-kulukiya!”

³⁸ Co Zevule wendekele kuli ikeye ngwendi, “Visimutwiya vyove vili kulijo? Yove watulombele ngeci omwo vikajo tulinakupangela Avimeleke. Ava vakevo vanalume munakele nakushendumuna. Tuuka anja ololo nakuvalwisa.”

³⁹ Co Ngale watwamenenene vanalume va ku Shekeme anja nakulwa na Avimeleke.

⁴⁰ Ngale watewele, co Avimeleke wamushekele. Vavangi vavetwele, co vungi vwavo vetele na ku cikolo ca nganda.

⁴¹ Avimeleke wakele mu Aluma, co Zevule washekele Ngale na vandolome vendi kutunda mu Shekeme, ngecivene, kuvasele kukala muje lalo.

⁴² Alikaki vanu va ku Shekeme vaile ku mahya, co valekele Avimeleke,

⁴³ ngecivene, watwalele vanu vendi, wavaangunwine mu vimunga vitatu, co vavandele mu mahya, nakuvandamena. Omwo wamwene vanu valinakutuuka mu nganda, co wajombolokele kuje wavandele nakuvalwisa.

⁴⁴ Avimeleke na munga yendi vavandamenene ku cikolo ca nganda, co vije vimunga vikwavo vivali vyalwisile vaje vanu vakele mu mahya nakuvatsiya voshe.

⁴⁵ Avimeleke walwisile vaje vanu vakele mu nganda litangwa lije lyoshe. Co watambwile ije nganda nakutsiya vaje vanu. Co wanyongesele ije nganda, wakuvileo mwongwa.

⁴⁶ Omo vantwama voshe va vanalume va mu cimpaka ca ku Shekeme vazivileko, co vaile ku cimpaka ca ku njuvo kukavandako.

⁴⁷ Omo Avimeleke wazivile ngeci vakevo valikungulwile kuje,

⁴⁸ co ikeye walamatele ku Munkinda wa Zalemone amo na vanu vendi. Co wambatele njaviti, wavatwile munango wa muti, wawambatele a citsili cendi. Co walekele vanu vendi ngeci vazambule kulinga ngwe muje mwalingile ikeye.

⁴⁹ Ngecivene, munu na munu wavatwile munango wa muti, co vakavele Avimeleke, valundikile ije minango akamwa ya cije cimpaka. Co vashwamekeleo tuhya, vanu voshe vakele muje mu cimpaka vatsilililemo, vapwile 1,000 vanalume na vanakazi.

⁵⁰ Asinoni Avimeleke waile ku Teveze, wazengelekele ije nganda, co waifungulwile.

⁵¹ Mukati ka nganda mwakele cimpaka cakukola, muje muvatewelele vanalume voshe, na vanakazi voshe va muje mu nganda, kwakao na vantwama. Co valishokelelelemo, co valondele a ciluli ca cimpaka.

⁵² Avimeleke wezile nakulwisa cimpaka, co waile ku cikolo ca cimpaka mukukashwamekako tuhya.

⁵³ Oloni munakazi wamumbilile limanya lyakulolela vunga a mutwe wendi, co lyatavwile cikola cendi.

⁵⁴ Asinoni Avimeleke wasanene vwasi mukwenje uje wambatele vitwa vyendi wamulekele ngwendi, “Shomona mukwale wove unjitsiye. Kesi vakendeke ngwavo munakazi nanjitsii embwe.” Ngecivene, mukwenje wamutivile mukwale, co watsile.

⁵⁵ Omo vaIsalele vamwene ngeci Avimeleke natsi, co voshe velukile ku membo avo.

⁵⁶ Ngecivene, Njambi walingile shambandinga kuli Avimeleke a mulonga uje walingile, wakulwisa ishe nakutsiya vandolome vendi vakupwa 70.

⁵⁷ Co Njambi lalo wamwesele vanu va ku Shekeme tuyando omwo vuvi vwavo, ngwe Yotame muna Ngilyone wendekele ngeci mukemwo vene muvakafwa omwo wavasingile.