Maako 5 - Livulu lya Shukulu Kalunga

Mwaso wa Ndembola na Mbalake

¹ A litangwa lije Ndembola na Mbalake muna Avinowame vembile mwaso ou ngwavo,

² Shangazaleni Shukulu Kalunga! Omwo vana va vimyene mu Isalele vatwamene kulutwe, omwo vanu valyanene na cizango vakevo vavenya.

³ Tolilileni, yeni vimyene! Zivilileni, yeni vaka-kushwana! Njikembila Shukulu Kalunga, njikembila Shukulu Kalunga vishangala. Ikeye Njambi ya Isalele.

⁴ Omo Shukulu Kalunga watundile ku minkinda ya ku Seila, omo watundile mu lifuti lya vaEndome, kaye kajajele, na nyonzi yanyokele kutunda mwilu. Eyo, mema atundile mu mashelwa etikile.

⁵ Minkinda yajajele ku mesho a Shukulu Kalunga wa Sinai, ku mesho a Shukulu Kalunga Njambi ya Isalele.

⁶ Mu matangwa a Shamengale muna Anate, mu matangwa a Njaele, matanga kuwakele nakwita mukati ka lifuti, co vaka-kwenda vakele nakwitila kumukulo, mu tungila twakulizenga-zenga.

⁷ Co membo a vaIsalele asalele vingundu vyangoco, noo yange Ndembola njezile, njezile ngwe cisemi kuli vaIsalele.

⁸ Omo vaangwile vinjambi vavaha, co mu lifuti mwakele nzita. Akati ka vanu 40,000 mu Isalele, kuma kuli munu umo wambatele ntelo nambe likunga ndi?

⁹ Mbunge yange ili amo na vana va vimyene va mu Isalele, vaje valyanene vakevo vavenya na cizango akati ka vanu. Shangazaleni Shukulu Kalunga!

¹⁰ Cambululeni, yeni munalondo a vimulu vakutoka, oku munatumbama a visileyi. Neni vaka-kwenda na mendi, cambululeni kwoshe kuje kumukaya.

¹¹ Tolilileni muyoyo wa mbunga ya vanu, vaje valizengeleka ku masima, valinakwendeka akuhyana kwa Shukulu Kalunga, akuhyana kwa vanu va Isalele! Asinoni vanu va Shukulu Kalunga vashelumukile mu vinganda vyavo.

¹² Induka, induka, yove Ndembola! Induka, induka wimbe mwaso! Katuka, yove Mbalake utwale vinzinda vove, yove muna Avinowame.

¹³ Asinoni vanalume vaje vendele mu mikana, vezile kuli vaka-vukama, co vanu va Shukulu Kalunga vezile kuli yange, vendele ngwe vaka-kulwa.

¹⁴ Vatundile ku Efalime nakwija mu cana, valilile ngwavo, “Tunaija nakumikwasa, yeni vanu va Mbenjemani, vavushoko vweni vali kuno.” Co vaka-kushika vezile kutunda kuli Makile, co vamyata vashelumukile kutunda kuli Zembuloni.

¹⁵ Vantwama va Isakale vezile amo na Ndembola, eyo, Isakale wezile na Mbalake lalo, co vakevo vamukavele mu cana. Oloni muyati wa vanu va Luvena valyangunukile, vakevo kuvayongwele kwija embwe.

¹⁶ Omwo vikajo vasalele munima na vimanga? Kutolilila kuli tunyungi valinakwimba milozi mukusana matanga? Eyo, muyati wa vanu va Luvena valyangunukile, vakevo kuvayongwele kwija embwe.

¹⁷ Co muyati wa vanu va Ngande vasalele mu ngangela ya Yondau, co muyati wa vanu va Ashele vasalele ku cikuma ca mema a kalunga, eyo, vasalele ku ngenge ya cikuma ca mema a kalunga.

¹⁸ Oloni vanu va Zembuloni na Nafetali, valambwile myonyo yavo ku nzita.

¹⁹ Co ku Tanake, ku ngenge ya muna ndonga Mengindo, vimyene vezile nakulwa, co vimyene va ku Kanana valwile, oloni kuvambatele siliva embwe.

²⁰ Co vingongonosi vyalwile mwilu, vyalwile omo vyakele nakwenda mwilu, co vyalwisile Sisela.

²¹ Co livazi lya mu Kishone lyavakupwile, ndonga ya ku san̄ulu, Ndonga ya Kishone. Njikenda, nakwenda kutwalao na nzili!

²² Asinoni tuvalu vashatukile na misindo, co asi vaakeleo vimweso na vimbemba vyavo.

²³ Co kangelo ka Shukulu Kalunga wendekele ngwendi, “Singa Meloze cisingo, cisingo ali vaje valinakuyoya muje. Vakevo kuvezile mukukwasa Shukulu Kalunga embwe, kuvezile ngwe mashwalale mukumulwilako.”

²⁴ Njaele ikeye munakazi wakuvezika, kutuvakana vanakazi voshe, munakazi wa Hevele kaKeni. Munakazi wakuvezika kutuvakana vanakazi voshe vaje vakele mu vimbalaka.

²⁵ Sisela walombele mema, oloni ikeye wamwanene mavele, co ikeye wamunenelele mavele akukonda mu lilonga lyalivwa.

²⁶ Co wambatele pampalingo ya mbalaka mu livoko limo, na kavulo ka muka-kufula mu livoko likwavo, co wapupile Sisela, co wamutavwile mutwe, nakumupulyasana, co wautavozwele tumbazuvwila-tumbazuvwila.

²⁷ Co watsikamene a mavuli, wawililile asi anga nalalela, Sisela watsikamene wawililile ku mendi a Njaele, watsikamene wawililile asi nakutsa.

²⁸ Co vaina ya Sisela vashumbililile mu njanena. Vashumbililile kunima ya njanena yakushela mesho a vwanda. Wehwile ngwendi, “Omwo vikajo litemba lyendi lineshwala kwija? Omwo vikajo tuvalu twendi vaneshwala kwiluka?”

²⁹ Co vanakazi vendi vaka-mana vamukumbulwile, co walihwile ikeye vavenya kushwakumo ngwendi,

³⁰ “Valinakushakezeka lika kuwana vyuma vyakupukula nakulipangelavyo, mumbanda umolika nambe vavali kuli lishwalale na lishwalale, na vuzalo vwavuvwa kuli Sisela, na vinanga vyakwola vya mu mukoshi wa vamwene.”

³¹ Ngecivene, Shukulu Kalunga vitozi vove voshe vakatsa ngacije vene, oloni vaje vakuzema vakavyazima ngwe misha yakutuuka kwa litangwa! Co kwakele kwoloka mu lifuti myaka makumi awana.