Maako 20 - Livulu lya Shukulu Kalunga

VaIsalele valivwaesela nzita

¹ Vanu va Isalele voshe kutunda ku Ndani ku kunto kutwala ku Mbelesheva mu mbwela, amo na lifuti lya Ngilyande mu ngangela, valikungulwile na mbunge imo ku mesho a Shukulu Kalunga ku Mizipa.

² Co vantwama voshe va miyati ya vanu va Isalele, vakeleko kukulikungulula oku kwa vanu va Njambi, co kuje kwakele mashwalale vakulwa na mikwale vakupwa 400,000 vaje vendele asi.

³ Vanu va muyati wa Mbenjemani vazivile ngeci vaIsalele voshe vanalikungulwila amo ku Mizipa. Co vaIsalele vehwile ngwavo, “Tulekeniko, ou mulonga unaija vati?”

⁴ Co uje kaLevi wakele na lishano lyendi lya mbanja uje ivatsiile wakumbulwile ngwendi, “Yange na lishano lyange lya mbanja twaile ku Ngimbeya ya Mbenjemani mukukalala kuje vutsiki.

⁵ Co vanu va mu Ngimbeya vezile nakunjishakezeka, co vazengelekele njuvo ku vutsiki. Vakevo vakele na ciyongo cakunjitsiya, oloni valingile valalele na lishano lyange lya mbanja, co watsile.

⁶ Co yange njambatele muvila wendi, nakuuvatozola vipuka-vipuka, njatumine vipuka vyendi ku muyati umo na umo wa vanu va Isalele. Vanu ava vanalingi cuma cacivi na vukolokomba mu Isalele.

⁷ Kengeni, yeni voshe munapu mu vaIsalele. Co vatijo tulingao a cuma eci?”

⁸ Co vanu voshe vemanene amolika vendekele ngwavo, “Naumo wai wa ali yetu akaya ku mbalaka nambe ku njuvo yendi.

⁹ Co citukalinga na vanu va Ngimbeya eci, tukata n̄ela nakwangula vanalume vamo vakalwe na Ngimbeya.

¹⁰ Co litambelo limo lyamulikumi lya vanu va Isalele, vakaana vyakulya kuli mashwalale, co veka vakaya mukulwisa Ngimbeya, omwo a vilinga vyavo vyavivi vivanalingi mu Isalele.”

¹¹ Ngecivene, vanu voshe va mu Isalele valikungulwile kupwa ngwe munu umo a vutumbe vuje vwakulwisa lije limbo.

¹² Miyati ya vanu va Isalele vatumine tunganda mu mitambela mwoshe mu miyati ya vanu va Mbenjemani vendekele ngwavo, “Mulonga ou wa cifwa cangacije mwaulingile vatijo?

¹³ Ololo twanenivo ava vaka-vuvi va mu Ngimbeya, ngeci tuvatsiye, nakutundisa vuvi ovu akati ka Isalele.” Oloni vanu va Mbenjemani kuvombileko mbunge kuli vakwavo vaIsalele.

¹⁴ VaMbenjemani vatundile mu membo avo, vezile ku Ngimbeya mukulwisa vanu va Isalele.

¹⁵ Co a litangwa lije vene, vaMbenjemani valavele mashwalale vakulwa na mikwale vakupwa 26,000 vakutunda mu membo avo, kupandakanako kuli vavenya lifuti lya Ngimbeya vanalume vakupwa 700 vaje vavaangwile.

¹⁶ Co akati ka mashwalale voshe ava akele vanalume vakupwa 700 vakwangula vaka-cimoshwe, vaje vasele kwasha mamanya n̄indi ya cin̄ambu kujeneka kuloja.

¹⁷ Co vanalume va Isalele, vaje kuvalipandakanene na vaMbenjemani, omwo vavalavele apwile 400,000 vanalume vakulwa na mikwale, voshe vapwile vaka-kulwa nzita.

Nzita yakulwisa vaMbenjemani

¹⁸ Co vaIsalele vaile ku mutambela wakulemesela ku Mbetele, kuje vehwile Njambi ngwavo, “Muyati ukajo ukalivanga kulwisa vaMbenjemani?” Co Shukulu Kalunga wavakumbulwile ngwendi, “Muyati wa Yunda ukewo ukalivanga.”

¹⁹ Ngecivene, alikaki mutondo, vaIsalele vatungile cilombo cavo kuyehi na Ngimbeya.

²⁰ Co vanalume va Isalele vaile mukulwa nzita na mashwalale va Mbenjemani, co vaakele mashwalale mu mitambela yavo kushungama na Ngimbeya.

²¹ Co mashwalale va Mbenjemani vatuukile mu nganda, omo litangwa kanda litoke vatsiile mashwalale va Isalele vakupwa 22,000.

²² Oloni vanalume va Isalele, valikolesele lalo, co vaakele mashwalale lalo mukulwa mu ngila ije vene ngwe muje muvalingile a litangwa lyakulivanga.

²³ Co vanu va Isalele vaile nakulilila ku mesho a Shukulu Kalunga noo ku cingwezi, co vehwile Shukulu Kalunga ngwavo, “Kuma tucishwenyesako lalo kulwa na vandolome vetu vaMbenjemani ndi?” Co Shukulu Kalunga wavakumbulwile ngwendi, “Yeni mukalwe.”

²⁴ Co vaile lalo nakulwa na mashwalale va Mbenjemani simbu yamucivali.

²⁵ Co vanu va Mbenjemani vatundile mu Ngimbeya, kukaliwana navo simbu yamucivali, co vatsiile mashwalale va Isalele vakulwa na mikwale vakupwa 18,000.

²⁶ Asinoni vanu voshe va Isalele valamatele ku Mbetele nakukalililako. Co kuje vakatumbamene ku mesho a Shukulu Kalunga, kujeneka kulya a litangwa lije noo ku cingwezi. Co vakombelelele vin̄ombelo vya kulitombola, na vin̄ombelo vimo vya kwenyeka vyamutunu vyoshe ku mesho a Shukulu Kalunga.

²⁷ Co vaIsalele vehwile cihula kuli Shukulu Kalunga, omwo Cikasa ca Cikumiiyo ca Njambi cakele kuje ku Mbetele mu matangwa aje,

²⁸ Finehase muna Elyazale, muna Alone, ikeye wapwile muka-kucinyunga a matangwa aje, vehwile ngwavo, “Tunapande kuya nakukalwisa vandolome vetu vaMbenjemani lalo, indi tulikele?” Co Shukulu Kalunga wendekele ngwendi, “Yeni mukalwe navo, imene njikavakundika ku mavoko eni.”

²⁹ Ngecivene, vaIsalele vavandesele mashwalale vamo kuzengeleka Ngimbeya.

³⁰ Co a litangwa lyamucitatu lalo vaIsalele vaile nakulwisa mashwalale vaMbenjemani, vaakele mashwalale vavo mu mitambela kushungama na Ngimbeya, ngwe muje muvalingile akulivanga.

³¹ Co va Mbenjemani vaile nakulwa, vavatwamenenene kulyala kutunda ku nganda ngwe muje muvalingile akulivanga, co vashangumukile kutsiila vaIsalele vamo mushandangala yangoco, na mu vitapalo vyakuya ku Mbetele, na ku Ngimbeya. Co vatsiile vaIsalele vakupwa 30.

³² VaMbenjemani vendekele ngwavo, “Tunavafungulula ngwe muje mutwavafungulwile akulivanga.” Oloni vaIsalele vendekele ngwavo, “Twilukeni munima tuvatwale kulyala ku vitapalo vya ku nganda.”

³³ Ngecivene, vaIsalele voshe vatundile kuje kuvakele, velukile munima, valipangele mu vimbunga ku Mbeletamale, co vanalume vazengelekele Ngimbeya, ngecomu vaIsalele vajombolokele kuje ku mitambela ivavandele muje mushandangala yangoco mu mamanya, co vazengelekele nganda.

³⁴ Co vanalume vakupwa 10,000 vaje vaangukile kuli vaIsalele valwisile Ngimbeya, co ije nzita yaamene manene. Co vaMbenjemani kuvazivukile ngeci vali kuyehi nakunyonga embwe.

³⁵ Co Shukulu Kalunga wahyanesele vaIsalele ku nzita ya vaMbenjemani. VaIsalele vanyongesele vaMbenjemani vaka-kulwa na mikwale vakupwa 25,100 a litangwa lije,

³⁶ co vaMbenjemani vamwene ngeci vanavafungulula. Mbunga ya vaIsalele velukile kutunda kuli vaMbenjemani, omwo vakulaelele ali vanalume vaje vavandele nakuzengeleka Ngimbeya.

Muje muvahyanene vaIsalele

³⁷ Vanalume ava vashatukile vwasi kushungama na Ngimbeya, co valishandokelele mu nganda nakutsiya vanu voshe muje mu nganda na moko ya mukwale.

³⁸ Oloni cizivukiso civalishikile vanalume va vaIsalele na vaje vaka-kuvandamena cikeco eci, vaje vaka-kuvandamena vakajundula lishelwa lyakama lya vwisi kukondoka mwimbo.

³⁹ Co vaIsalele vatengulukile kuje ku mutambela wa nzita. A simbu ije vaMbenjemani valivwaeselele kutsiya vaIsalele vakupwa 30. Co vendekele ngwavo, “Tunavafungulula ngwe muje mutwavafungulwile akulivanga.”

⁴⁰ Cooni cimweso casholokele, lishelwa lyakondokele vwisi vwakuya mwilu kutunda mwimbo. VaMbenjemani vakengele kunima yavo, co valikomokelele omo vamwene nganda yoshe ikondoka vwisi.

⁴¹ Asinoni vaIsalele vatengulukile, co vaMbenjemani valijujukilile omwo vamwene vukalu vunavawana.

⁴² Vatewele kutunda kuli vaIsalele nakukengesela mu mambo, oloni kuvasele kuputumuka embwe. Co vavakwatelele mukati ka mbunga ya mashwalale, na vanalume vaje vatundile mu nganda. Co vavatsiile nakuvanyongesa.

⁴³ VaIsalele vatelelele nganjo vitozi vavo nakuvasheka noo vavetesele ku ngangela ya ku Ngimbeya, vavatsiile oku valinakuya.

⁴⁴ Co vatsiile mashwalale va vaMbenjemani vakupwa 18,000 voshe vaje vapwile vanalume vakutakama.

⁴⁵ Co vakwavo vatengulukile kutewela kulutwe mu mambo ku Limanya lya Limone. VaIsalele vatsiile vanu vakupwa 5,000 mu tapalo. Co vaIsalele vatwaleleo kukava vaje vasaleleo na ku Ngindome, co vatsiileo vanalume vakupwa 2,000.

⁴⁶ A litangwa lije, mashwalale va vaMbenjemani vakupwa 25,000, vakutakama, vavatsiile.

⁴⁷ Oloni vanalume vakupwa 600 vaputumukile vatewelele mu mambo ku Limanya lya Limone, kuje vakakele vingonde viwana.

⁴⁸ VaIsalele vatengulukile kulwisa vaMbenjemani vaje vasaleleo, vatsiile voshe vanalume na vanakazi na vanike na vimuna. Co venyekele membo oshe a mu mutambela uje.