Maako 2 - Livulu lya Shukulu Kalunga

Kangelo ka Shukulu Kalunga aija ku Mbokime

¹ Co kangelo ka Shukulu Kalunga watundile ku Ngilingale walamatele ku Mbokime, wendekele kuli vaIsalele ngwendi, “Yange njakamitundisile ku Ingito, njaminenele mu lifuti lino njakulaesele vakukulwila veni. Co njendekele ngwange, ‘Kunjikapokola cikumiiyo cange neni.

² Co kesi mukalikumiiye cikumiiyo na vanu vaje valinakuyoyela mu lifuti lino. Mukasiwula mitula yavo.’ Oloni yeni kumwalingile vije vinjamilekele. Munalingi mweka.

³ Ngecivene, ololo yange njimileka ngwange kunjikasheke vanu ava embwe, ngwe omo yeni mulinakuya kulutwe. Co vakevo vakapwa ngwe mambimbo kuli yeni, co vinjambi vavo vakapwa ngwe nganjo kuli yeni.”

⁴ Omo kangelo ka Shukulu Kalunga wendekele majwi awa kuli vakevo, co vanu va Isalele voshe vashangumukile kulila nakutambakana manene,

⁵ omu mukemwo muvatumbwile mwela uje ngwavo Mbokime. Co vakombelelele vin̄ombelo kuli Shukulu Kalunga.

Kutsa kwa Yoshwa

⁶ Yoshwa watumine vaIsalele mu vingila vyavo, munu na munu waile ku mutambela uje vamwanene ngeci awushwane.

⁷ Co vanu va Isalele vapangelele Shukulu Kalunga, matangwa oshe akuyoya kwa Yoshwa, na matangwa aje a vakulunu vaje vayoyele munima ya Yoshwa, vaje valimwenenene vakevo vavenya vyuma vyoshe vyakama vije vyalingile Shukulu Kalunga kuli vaIsalele.

⁸ Co Yoshwa muna Nune ngamba ya Shukulu Kalunga, watsile omo wakele na myaka 110.

⁹ Co vamutsindile mu mutambela wa vushwana vwendi, ku Timenate Sela ku lifuti lya malundu lya Efalime, ku kunto ya Munkinda wa Ngashe.

¹⁰ Co cisemwa coshe cije catsile, co munima ya cije cisemwa, cisemwa cikwavo cashangumukile, vaje kuvazivukile Shukulu Kalunga nameme kuzivuka vije vyalingile ali vaIsalele.

VaIsalele valikela kulemesa Shukulu Kalunga

¹¹ Ngecivene, vaIsalele valingile mwamuvi ku mesho a Shukulu Kalunga, co vashangumukile kulemesa vaMbale.

¹² Co vasezele kulemesa Shukulu Kalunga, Njambi ya vakukulwila vavo, Njambi uje wavatundisile mu Ingito, co vashangumukile kulemesa vinjambi veka, vinjambi va vaje vanu vavazengelekele. Co vatsikamenene vaje vinjambi nakuvalemesa, ngeci vashangumwine vukalu vwa Shukulu Kalunga.

¹³ Vasezele kulemesa Shukulu Kalunga, co vapangelele vaMbale, na vaAsitalete.

¹⁴ Ngecivene, Shukulu Kalunga waluvalele manene na vaIsalele, co wavakundikile ku mavoko a vezi vaje vevile vyavo. Co Shukulu Kalunga wavakundikile ku vitozi vavo vaje vavazengelekele, ngeci kuvasele lalo kwimana ku mesho a vitozi vavo.

¹⁵ Kwoshe-ikwoshe kuje vakele nakuya ku nzita, Shukulu Kalunga wavavindamesele, ngwe muje mwendekele, na muje mwalisingile kuli vakevo. Co vakele mu vukalu vwakama manene.

¹⁶ Asinoni Shukulu Kalunga waanene vaIsalele maako vaje vavamenene ku vezi vaje vevile vyavo.

¹⁷ Oloni vaIsalele anga kuvatolililile kuli maako vavo embwe. VaIsalele vajenekele kulongwa kuli Shukulu Kalunga, co valemesele vinjambi veka. Vatangukile vwasi mu ngila ije vendele vakukulwila vavo, ngila yakwononoka mashiko a Shukulu Kalunga.

¹⁸ Oshe aje Shukulu Kalunga aana vaIsalele lyaako, co Shukulu Kalunga wakele amo na lyaako, nakuvamena ku mavoko a vitozi vavo kutwala ku matangwa oshe akuyoya kwa uje lyaako. Shukulu Kalunga wavazivilile mema ku mbunge omo vakele nakukemanga ku mesho a vaje vavapakesele nakuvayandesa.

¹⁹ Oloni capwile ngeci omo uje lyaako natsi, co vanu va Isalele veluka lalo mu vingila vyavo vyavivi kutuvakana vije vya vakukulwila vavo. Vakavele vinjambi veka nakuvapangela, nakuvalemesa, vavyanene kuseza vilinga vyavo vya kupenga-penga.

²⁰ Ngecivene, Shukulu Kalunga waluvalele manene na vaIsalele nakwendeka ngwendi, “Omwo muyati wa vanu ava vanapokola cikumiiyo cije njalikumiiye na vakukulwila vavo, co vakevo kuvanjononokele,

²¹ co yange kunjikasheke miyati ije yasezele Yoshwa mu lifuti omo watsile.

²² Njikapangesa vaIsalele mukuveseka ngeci njimone nga vakanyunga ngila yange nakwenda mu ikeyo nambe embwe ngwe muje muvalingile vakukulwila vavo.”

²³ Ngecivene, Shukulu Kalunga watavele miyati ya vanu vaje ngeci vatumbame mu lifuti, ikeye kavashekelemo vwasi, co lalo kavakundikile ku mavoko a Yoshwa embwe.