Maako 14 - Livulu lya Shukulu Kalunga

Samusoni na mumbanda wa ku Timena

¹ Litangwa limo, Samusoni waile ku Timena, kuje wakamwene mumbanda wa kaFilisitiya.

² Co welukile kwimbo wakulekeleko ishe na vaina ngwendi, “Ku Timena kuli mumbanda wa kaFilisitiya uje unjinakamwene, ngecivene, njendekeyeniye ngeci apwe munakazi wange.”

³ Oloni ishe na vaina vamwihwile ngwavo, “Omwo vikajo ushaka kuya kuli vaFilisitiya ava vaka-kujeneka kukulaela nakwambatelako munakazi? Kuma kuwasa kuwana mumbanda wa ku cikota cetu wa ku vushoko vwetu ndi?” Oloni Samusoni walekele ishe ngwendi, “Ikeye lika njishaka ngeci munjambateleye. Njimushaka nanjii ku mbunge.”

⁴ Visemi vendi kuvazivukile ngeci eci capwile cizango ca Shukulu Kalunga, ikeye watwamenenene Samusoni kulinga ngeci, omwo Shukulu Kalunga washakezekele ngila yakulwa na vaFilisitiya. A simbu ije vaFilisitiya vakele na moko mu Isalele.

⁵ Ngecivene, Samusoni waile ku Timena amo na ishe na vaina. Omo vakele nakwita mu mahya a mikolovozi ya vushuka vwa vinyu, co wamwene ndumba alinakwija kuli ikeye oku alinakwaana.

⁶ Co vwasi-vwasi Munzinzime wa Shukulu Kalunga wezile na nzili ali Samusoni, co watavozwele ndumba na mavoko endi vipuka-vipuka, ngwe atavozola muna membe. Oloni kalekeleko visemi vyendi vije vyalingile.

⁷ Asinoni waile nakusimutwiya na uje mumbanda, co Samusoni wazemene uje mumbanda.

⁸ Co omo kwetile matangwa amandondo, Samusoni welukilileko mukumwambata. Co a ngila waangunukile mu tapalo mukukenga ali uje ndumba yatsiile, co walikomokelele kuwanamo njame ya vimuka, na vuki mukati ka ndumba wa kutsa.

⁹ Co walombwele vuki, wavulile oku alinakwenda. Asinoni waile kuli ishe na vaina, co wavaaneneko vumo. Co na vakevo valile, oloni Samusoni kavalekele ngeci vuje vuki wavulombwele mu muvila wa ndumba wa kutsa embwe.

¹⁰ Co ishe waile ku njuvo ya uje mumbanda, co Samusoni walingile ciwano kuje. Eyi yapwile futisi mukati ka vakwenje.

¹¹ Omo vaFilisitiya vamumwene, co vatumine vakwenje vakupwa makumi atatu mukutumbama nendi.

¹² Co Samusoni wendekele kuli vakevo ngwendi, “Njitaveni njimitele kasau, nga mwasa kunjilekako, a matangwa awa atanu na avali a ciwano, nakukalumbununa, co njikamyana vuzalo vwa linyu vwakupwa makumi atatu, na vuzalo vwa ciwano vwakupwa makumi atatu.

¹³ Oloni nga kumwasa kunjilumbunwinako, co mukanjana vuzalo vwa linyu makumi atatu, na vuzalo vwa ciwano makumi atatu.” Co vendekele kuli ikeye ngwavo, “Ta kasau kove, ngeci tukazive.”

¹⁴ Co ikeye wavalekele ngwendi, “Ku muka-kulya kwezile vyakulya, ku muka-nzili kwezile vutovalesi.” Co vakevo kuvasele kulumbununa kaje kasau a matangwa atatu.

¹⁵ Co a litangwa lyamuciwana vendekele kuli munakazi wa Samusoni ngwavo, “Musoke-soke munalume wove, ngeci akuleke kulumbunuka kwa kasau aka. Nga kuulingimo, co tukakwenyeka yove na naanga ya isho. Kuma mwatusanene kuno ngeci mwakutwivile ndi?”

¹⁶ Ngecivene, munakazi wa Samusoni waile kuli munalume wendi nakulila, co wendekele ngwendi, “Wanjizinda! Kuwanjizemene! Unatela vasamba vange kasau, co kuwanjilekele kulumbunuka kwako!” Samusoni wamulekele ngwendi, “Kenga, kunjalekeleko tate nambe vanana. Omwo vikajo njikulekako yove?”

¹⁷ Co ikeye walilile noo matangwa oshe a ciwano ahwile, co Samusoni wamulekele kulumbunuka kwa kasau, omwo wamukakateyeye ngeci amulekeko. Asinoni munakazi wa Samusoni wakalekele vanu vendi vaFilisitiya.

¹⁸ Ngecivene, a litangwa lyamucitanu na avali, omo Samusoni kanda aciye ku vulili, co vanalume va muje mu nganda vendekele kuli ikeye ngwavo, “Vikajo vyahyana kutovala kutuvakana vuki? Vikajo vyahyana nzili kutuvakana ndumba?” Samusoni wavakumbulwile ngwendi, “Nga kumwalimine na ngombe yange wa lwavo, nga kumwazivukile kulumbunuka kwa kasau kange.”

¹⁹ Co Munzinzime wa Shukulu Kalunga wezile na nzili ali Samusoni, co waile ku Ashekelone, kuje wakatsiile vanalume vakupwa makumi atatu, co wavapukwile vyavo, waanene vuzalo vwavo kuli vaje vanalume valumbunwine kaje kasau. Munima ya vyuma evi, Samusoni waluvalele manene a vije vyalingiwile, co welukile ku njuvo ya ishe,

²⁰ co munakazi wa Samusoni vamwanene kuli musamba wendi, uje wamukwasele a simbu ya vushombolwa.