Maako 13 - Livulu lya Shukulu Kalunga

Kusemuka kwa Samusoni

¹ Co vaIsalele valingile lalo vuvi ku mesho a Shukulu Kalunga, co Shukulu Kalunga wavakundikile ku mavoko a vaFilisitiya ngeci vavashwane myaka 40.

² Co a simbu ije kwakele munalume umo lizina lyendi Manowa wa ku limbo lya Zola. Wapwile wa ku muyati wa Ndani. Co munakazi wendi wapwile mumba.

³ Co kangelo ka Shukulu Kalunga washolokele kuli munakazi wendekele ngwendi, “Yove wapwa u mumba, oloni ololo ukemita, co ukakita mwana wa munalume.

⁴ Ololo kenga ngeci kesi unwe vinyu, nambe kunwa vwala, nambe kulya vyakulya vimo vya cizila embwe.

⁵ Co munima yakusemuka kwa munove wa munalume, kesi ukamuteule vin̄ambu vyendi, omwo kutunda a litangwa lyakusemuka kwendi, akapwa wakukundika kuli Njambi kupwa kaNazalite. Akashangumuka vipangi vyakwovola Isalele kuli vaFilisitiya.”

⁶ Asinoni uje munakazi waile nakulekako munalume wendi ngwendi, “Munu wa Njambi naija kuli yange, omo washolokele wazivisile lyova ngwe kangelo ka Njambi. Co kunjamwihwile kuje kwatundile, co lalo kanjilekele lizina lyendi.

⁷ Oloni nanjileka lika ngwendi njikemita, co njikakita mwana wa munalume. Nanjileka ngeci kesi njinwe vinyu nambe vwala, nambe kulya vyakulya vimo vya cizila, omwo mwanike akapwa wakukundika kuli Njambi kupwa kaNazalite matangwa oshe akuyoya kwendi.”

⁸ Asinoni Manowa walombelele kuli Shukulu Kalunga ngwendi, “Shukulu Kalunga, tava uje munu wa Njambi iwatumine eluke lalo kuli yetu, akutuleke vije vitunapande kulinga na mwanike omo akasemuka.”

⁹ Co Njambi wazivile kulomba kwa Manowa, co kangelo kendi welukile kuli munakazi omo vatumbamene mu lihya. Oloni Manowa kakeleko,

¹⁰ ngecivene, munakazi washatukile kukaleka munalume wendi ngwendi, “Kenga! Uje munalume wanjisholokelele lije litangwa naija lalo.”

¹¹ Co Manowa wakatukile nakukava munakazi wendi. Co waile kuli uje munalume nakumwihula ngwendi, “Yove uje munalume wendekele kuli munakazi wange ndi?” Ikeye wamukumbulwile ngwendi, “Eyo, yange vene.”

¹² Co Manowa wehwile ngwendi, “Ngecivene, ololo, omo majwi ove akapwa a vushunga, vatijo tukanyunga ou mwanike? Napande kukala vati mukuyoya kwendi?”

¹³ Co kangelo ka Shukulu Kalunga wakumbulwile Manowa ngwendi, “Mwa vushunga munakazi wove napande kunyanyama mukulinga vyuma vyoshe vije vinjamulekele.

¹⁴ Kapandele kulya cuma cimo cakutunda ku mukolovozi wa vushuka vwa vinyu, nambe kunwa vinyu, nambe vwala, nambe kulya vyakulya vya cizila. Anyunge vyuma vyoshe njinamushiki.”

¹⁵ Co Manowa wendekele kuli kangelo ka Shukulu Kalunga ngwendi, “Njakulombo, tutave kesi uciye, ngeci tukuvwaesele muna membe.”

¹⁶ Co kangelo ka Shukulu Kalunga wendekele kuli Manowa ngwendi, “Nga kumunjitavesa kuya, co kunjikali vyakulya vyeni, oloni nga mulivwaesela n̄ombelo ya kwenyeka, co ikombeleleni kuli Shukulu Kalunga.” Omwo Manowa kazivukile ngeci uje wapwile kangelo ka Shukulu Kalunga.

¹⁷ Co Manowa wamwihwile ngwendi, “Tuleke lizina lyove, ngeci tukusingimike omo majwi ove akapwa a vushunga.”

¹⁸ Co kangelo ka Shukulu Kalunga wamwihwile ngwendi, “Omwo vikajo ushaka kuzivuka lizina lyange? Likelyo lyapwa lizina lyakukomokesa.”

¹⁹ Ngecivene, Manowa wambatele muna membe na vunga vwakuseneta, co wavikombelelele a mutula wa limanya kuli Shukulu Kalunga. Co Shukulu Kalunga wapangele vyuma vyakukomokesa oku Manowa na munakazi wendi vanakengelela.

²⁰ Co omo mulangi waile mwilu kutunda a mutula, kangelo walondele mu mulangi, oku Manowa na munakazi wendi vanakengelela, co vatsikamene asi nakulemesa.

²¹ Co kangelo ka Shukulu Kalunga kasholokele lalo kuli Manowa na munakazi wendi. Asinoni Manowa wazivukile ngeci kuma ikeye wapwile kangelo ka Shukulu Kalunga.

²² Co Manowa wendekele kuli munakazi wendi ngwendi, “Mwa vushunga vene tutsa, omwo tunamono Njambi!”

²³ Oloni munakazi wendi wamukumbulwile ngwendi, “Nga Shukulu Kalunga nashakele kututsiya, nga katambwile n̄ombelo yetu ya muna membe, na vunga vwakuseneta, nga katusholwelele vyoshe evi, nambe kutuleka vyuma vya cifwa cangacije a simbu eyi.”

²⁴ Co munakazi wakitile munendi wa munalume, wamulukile lizina lyendi Samusoni. Mwanike wakolele, co Shukulu Kalunga wamuvezikisile.

²⁵ Co Munzinzime wa Shukulu Kalunga wezile na nzili ali ikeye omo wakele mukati ka Zola, na Eshetawole mu Cilombo ca Ndani.