Maako 11 - Livulu lya Shukulu Kalunga

KaNgilyande muka-nzili na muka-kusimpa

¹ Co Njefeta lishwalale wa cingenyenye watundile ku Ngilyande, ikeye wapwile mwana wa mu vupangala. Ishe wapwile Ngilyande,

² wakele na vana va vanalume vakwavo kuli munakazi wendi, co omo vana vaje vakolele, vashekele Njefeta hembo. Vamulekele ngwavo, “Nacimo cuma ciwushwana cakutunda kuli tatetu cai, omwo yove wapwa u mwana wa munalume wa kuli munakazi weka.”

³ Co Njefeta watewele kutunda kuli vandolome vendi, wakakele mu lifuti lya Tove. Kuje wakongumukile na munga ya vanu veka vangoco, co vendele amo nendi.

⁴ Co capwile ngeci, omo kuneti simbu, vaAmoni vezile nakulwa nzita na vaIsalele.

⁵ Omo eci calingiwile, vantwama va Ngilyande vaile nakukashaka Njefeta uje wakele ku lifuti lya Tove.

⁶ Co vamulekele ngwavo, “Ija ukatutwamenene ngeci tukalwe na vaAmoni.”

⁷ Oloni Njefeta wavakumbulwile ngwendi, “Ngwetu mwanjizindile manene, nakunjisheka ku njuvo ya tate. Omwo vikajo munezila kuli yange omo muli mu vukalu?”

⁸ Co vakumbulwile Njefeta ngwavo, “Tunaija kuli yove ololo omwo tukushaka uye amo netu tukalwe na vaAmoni, co ukapwa ntwama ya vanu voshe va mu Ngilyande.”

⁹ Njefeta wendekele kuli vakevo ngwendi, “Nga munjiilwisila kwimbo mukulwa na vaAmoni, co nga Shukulu Kalunga akavakundika ku mavoko ange, co njikapwa ntwama yeni.”

¹⁰ Co vamukumbulwile ngwavo, “Twatava. Shukulu Kalunga ikeye napu mukaleo wetu.”

¹¹ Ngecivene, Njefeta waile amo na vantwama va ku Ngilyande, co vanu vamupwisile ntwama na muka-kushika. Njefeta wendekele majwi endi oshe ku mesho a Shukulu Kalunga kuje ku Mizipa.

¹² Asinoni Njefeta watumine tunganda kuli mwene wa vaAmoni wendekele ngwendi, “Vimata vyove netu vinapu vika? Omwo vikajo unaija nakulwisa vanu na lifuti lyange?”

¹³ Co uje mwene wa vaAmoni wakumbulwile tunganda va Njefeta ngwendi, “Omo vaIsalele vatundile mu lifuti lya Ingito, vatambwile lifuti lyange kutunda ku Ndonga ya Alenone, nakweta ku Ndonga ya Njavoke, na ku Ndonga ya Yondau. Co ololo munapande mwecele lifuti lyange mu kwoloka.”

¹⁴ Njefeta watumineko lalo tunganda kuli mwene wa vaAmoni,

¹⁵ wamulekele ngwendi, “Oco kesi ca vushunga ciwunendeka, vaIsalele kuvatambwile lifuti lya vaMowavi nambe lifuti lya vaAmoni embwe.

¹⁶ Oloni omo vaIsalele valamatele kutunda mu Ingito, vendele mu mambo nakweta ku Lishali Lyakuvenga, co vetele ku Kandeshe.

¹⁷ Co vatumine tunganda kuli mwene wa ku Endome, vamulombele lisesa lyakwita mu lifuti lyendi. Oloni mwene wa ku Endome kavatavele kwita mu lifuti lyendi. Co lalo valombele kuli mwene wa ku Mowavi, oloni na ikeye lalo kavatavele kwita mu lifuti lyendi. Ngecivene, vaIsalele vakele ku Kandeshe.

¹⁸ Co vatuvakanene mu mambo, vaile nakulizenga mu lifuti lya Endome na mu lifuti lya Mowavi, noo vezile ku mutambela wa mu ngangela ya Mowavi, ku mutambela ukwavo wa Ndonga ya Alenone. Co vatungile cilombo cavo kuje, oloni kuvajavukile Alenone omwo ikeyo yapwile nginga ya Mowavi.

¹⁹ Asinoni vaIsalele vatumine tunganda kuli Sihone, mwene wa vaAmoli wa ku Heshevone, vamulombele lisesa lyakwita mu lifuti lyendi ngeci vaye ku lifuti lyavo.

²⁰ Oloni Sihone katavele Isalele kujomboka nginga yendi. Wanenele nzita yendi yoshe amolika, vatungile cilombo cavo ku Njahaze, co valwisile Isalele.

²¹ Oloni Shukulu Kalunga, Njambi ya Isalele, wakundikile Sihone na mashwalale vendi ku mavoko a vaIsalele. Ngecivene, vaIsalele vatambwile lifuti lyoshe lya vaAmoli vaje vakele mu lifuti lije.

²² Co vatambwile mutambela woshe wa vaAmoli kutunda ku Alenone mu mbwela kutwala ku Njavoke ku kunto, co kutunda mu mambo mu ngangela nakutwala ku Yondau mumkangombe ka yambi.

²³ Ngecivene, Shukulu Kalunga, Njambi ya Isalele, ikeye washekele vaAmoli mu lifuti lyavo omwo vanu vendi vaIsalele.

²⁴ Co mushaka kutambula mutambela wavo ndi? Wasa kunyunga vyoshe vije vyanakwana njambi yove Kemoshe. Co yetu lalo tunyunga vyuma vyoshe vije vyanatwana Shukulu Kalunga Njambi yetu.

²⁵ Kuma yove unatuvakana Mbalake muna Zipole, mwene wa Mowavi ndi? Nalumo lwai washungwiiye Isalele, indi walingilemo? Kuma ikeye wezile nakulwa nzita netu ndi?

²⁶ A myaka 300 vaIsalele vatambwile Heshevone, na Aloele, na membo aje avizengelekele, na vinganda vyoshe vije vyakele a ngenge ya Ndonga ya Alenone. Omwo vikajo yeni kumwavitambwile mu simbu yoshe ije?

²⁷ Embwe, yange nacimo cacivi cinjinalingi kuli yove cai. Yove ulinakulinga mwamuvi akulwa nzita nange. Shukulu Kalunga apwe lyaako. Ikeye ayongole ku litangwa lya lelo akati ka vaIsalele na vaAmoni.”

²⁸ Oloni mwene wa ku Amoni katolilile ku lijwi lya Njefeta.

²⁹ Asinoni Munzinzime wa Shukulu Kalunga wezile ali Njefeta. Co Njefeta waile ku Ngilyande na Manase, welukile lalo ku Mizipa mu Ngilyande, co waile ku Amoni.

³⁰ Co Njefeta wakulaesele Shukulu Kalunga ngwendi, “Nga yove ukakundika vaAmoni ku mavoko ange,

³¹ co njikakombelela cuma cakuyoya kupwa n̄ombelo ya kwenyeka, cije cikatuuka mu njuvo yange nakunjishesha omo njikeluka mu kwoloka kutunda mukufungulula. Co njikacana kuli yove kupwa n̄ombelo.”

³² Ngecivene, Njefeta wajavukile ndonga mukulwa na vaAmoni, Shukulu Kalunga wamuhyanesele.

³³ Co wavalwisile kutunda ku Aloele nakweta ku mutambela uje wazengelekele Minite, co vyoshe vyapwile vinganda makumi avali, wetele na ku Avele Kalamime. Co kuje kwakele kulitsiya kwakama, vaAmoni vavafungulwile kuli vaIsalele.

Muna Njefeta wa munakazi

³⁴ Omo Njefeta welukile kwimbo ku Mizipa, co kuje kwakele munendi wa munakazi wezile nakumushesha, nakukina nakwimba kambulumbumba. Wapwile munendi umolika.

³⁵ Omo ikeye wamumwene, co watavwile vuzalo vwendi mukuviilila, wendekele ngwendi, “Ove munange! Ulinakuvavalesa mbunge yange! Omwo vikajo cuma cangacije ciija ali yove? Njinalingi laja cikulaeso kuli Shukulu Kalunga, co kunjasa kucipokola lalo mbwe!”

³⁶ Co ikeye wamulekele ngwendi, “Tate, nga yove unakulaesa laja Shukulu Kalunga, co linga kuli yange cuma cije ciwunakulaesa, omwo Shukulu Kalunga nakulingilako shambandinga vitozi vove vaAmoni.”

³⁷ Oloni ikeye walombele ishe ngwendi, “Njitave kunjilingila cuma cimo eci. Njecele a vingonde vivali tai, ngeci njiye na vasamba vange mukwendangana navo mu minkinda, nakulila ngeci njinapande kutsa njicili nji mumbanda kanda njilimone na munalume.”

³⁸ Ishe wamulekele ngeci aye, co wamutumine kulyala a vingonde vivali. Ikeye na vasamba vendi valamatele ku minkinda, nakulinyenga omwo ikeye akatsa muzike nakujeneka vana.

³⁹ Munima ya vingonde vivali, welukile kuli ishe. Co ishe walingile vije vyakulaesele Shukulu Kalunga. Co watsile acili mumbanda kanda alimone na munalume. Eci cikeco capwile vushangumukilo vwa cilika mu Isalele,

⁴⁰ ngeci a mwaka na mwaka a matangwa awana, vambanda vaile mukulila muna Njefeta wa ku Ngilyande.