Maako 10 - Livulu lya Shukulu Kalunga

Tola

¹ Munima ya kutsa kwa Avimeleke, Tola muna Puwa mutekulu wa Ndondo, wezile mukwamena Isalele. Ikeye watundile ku muyati wa Isakale, wakele ku Shamile mu lifuti lya malundu lya Efalime.

² Wapwile ntwama ya Isalele myaka 23, co watsile, co vamutsindile mu Shamile.

Njaile

³ Munima ya Tola, kwezile Njaile wa ku Ngilyande. Ikeye washwanene Isalele myaka 22.

⁴ Ikeye wakele na vana va vanalume 30 vaje valondele a vimulu 30. Co vakele na vinganda 30 mu lifuti lya Ngilyande, vije vivatumbula na lelo ngwavo membo a Njaile.

⁵ Njaile watsile, co vamutsindile ku Kamone.

Njefeta

⁶ Co lalo vaIsalele valingile vuvi ku mesho a Shukulu Kalunga akulemesa Mbale, na Asitalete, vinjambi va Silya, na Sindone, na Mowavi, na Amoni, na Filisitiya. Valikelele kulemesa Shukulu Kalunga nakujeneka kumupangela.

⁷ Ngecivene, Shukulu Kalunga waluvalele na vaIsalele, co wavakundikile ku mavoko a vaFilisitiya, na vaAmoni ngeci vavafungulule.

⁸ Vayandesele nakupangesa vaIsalele voshe myaka likumi na itanu na itatu vaje vakele mu lifuti lya vaAmoli, mu ngangela musambwa ya Ndonga ya Yondau mu Ngilyande.

⁹ Co vaAmoni vajavukile Yondau mukulwa na miyati ya vanu va Yunda, na Mbenjemani, na Efalime. Ngeci muyati wa vanu va Isalele vayandele manene.

¹⁰ Asinoni vaIsalele valililile kuli Shukulu Kalunga vendekele ngwavo, “Tunalingi vuvi ku mesho ove, omwo tunaseza yove, Njambi yetu, co tunalemesa Mbale.”

¹¹ Co Shukulu Kalunga wavakumbulwile ngwendi, “Omo vaka-Ingito, na vaAmoli, na vaAmoni, na vaFilisitiya,

¹² na vaSindone, na vaAmaleke, na vaMowavi, vamiyandesele kunima, co mwalililile kuli yange. Kuma kunjamyamenene kuli vakevo ndi?

¹³ Oloni munanjiseza nakulemesa vinjambi veka, ngecivene, kunjikamyamena lalo embwe.

¹⁴ Yeni mukalilile kuli vinjambi vaje munaangula. Vakevo vamyamene omo muli mu tuyando.”

¹⁵ Oloni vanu va Isalele vendekele kuli Shukulu Kalunga ngwavo, “Tunalingi vuvi. Linga mwoshe muushaka, oloni Shukulu, twovole ku litangwa lya lelo.”

¹⁶ Ngecivene, vatundisile vinjambi vavo veka, co valemesele Shukulu Kalunga, co ikeye wazivile ku mbunge kuvavala a tuyando twa vaIsalele.

¹⁷ Asinoni mashwalale va vaAmoli valivwaeselele kulwa nzita, valikungulwile nakutunga cilombo cavo ku Ngilyande. Co vanu vaIsalele valikungulwile nakutunga cilombo cavo ku Mizipa mu Ngilyande.

¹⁸ Kuje vanu na vantwama va miyati ya vanu va Isalele valihwile umo na mukwavo ngwavo, “Iyajo akatwamenena nzita kuli vaAmoni? Woshe acilinga ikeye akapwa ntwama ya voshe vali mu Ngilyande.”