Lute 3 - Livulu lya Shukulu Kalunga

Lute awana munalume wakumwambata

¹ Litangwa limo Naumi wendekele kuli Lute ngwendi, “Njinapande kukutondela munalume wakukwambata ngeci ukale mwamuvwa.

² Anuka ngwove Mbowasi ali na vangamba va vanakazi vaje unakele nakupanga navo, wapwa muka-vulo vwetu. Ololo tolilila oni, ku cingwezi cino cikeco akaleleka mbale ije vanajungula.

³ Co jwela nakulikwita mazi akunika lwengo lwaluvwa, zala vuzalo vwove vuje vwavuvwa manene. Asinoni ya kuje alinakulelekela mbale, oloni kesi ukasholoke kuli ikeye embwe, noo namanesa kulya nakunwa.

⁴ Unapande kunyanyama umone kulijo akalala, co omo nai mu tulo, ya ukafukule lipai ku mendi endi, co ukalala kuje. Ikeye akakuleka vati ukalinga.”

⁵ Co Lute wamukumbulwile ngwendi, “Njikalinga vyuma vyoshe viwunendeka.”

⁶ Asinoni Lute waile ku lijungwilo, co walingile ngwe muje muvamulekele vainamweno.

⁷ Omo Mbowasi wamanesele kulya nakunwa, wavwaelelele manene. Co waile ku mutumbo wa mbale, walalele kuje. Asinoni Lute wezile nakulimwenga, wafukwile lipai ku mendi a Mbowasi, co walalele.

⁸ Mukati ka vutsiki Mbowasi wakasumukile mu tulo. Co omo watengulukile, walikomokelele manene akuwana munakazi nalala ku mendi endi.

⁹ Co wehwile ngwendi, “Yove iyajo?” Lute wamukumbulwile ngwendi, “Mwane, yange Lute. Omwo yove wapwa muka-vulo vwetu wakutukundama, yove uli na moko yakunjinyunga. Ngeci njilinakukulomba ngwange unjikongweye.”

¹⁰ Asinoni Mbowasi wendekele kuli Lute ngwendi, “Shukulu Kalunga akuvezikise munange. Eci ulinakulinga camwesa vukama vwa kasingimiko kakama mu naanga, kutuvakana vije viwalingile kuli vanyokomweno. Yove wapandele kuya nakushakezeka mukwenje, nambe wakufuka nambe kautu, oloni kuwalingilemo.

¹¹ Co ololo, kesi ulinyenge embwe, njikakulingila vyuma vyoshe viwunalombo. Vanu voshe va muno mu nganda vazivuka ngeci yove wapwa u munakazi wamuvwa wa kulongwa.

¹² Mwa vushunga yange njapwa nji muka-vulo vwove wakukukundama. Co lalo njili na moko yakukunyunga, oloni kwali munu umo ikeye kavushoko ketu wa a mbunge kutuvakana yange.

¹³ Ngecivene, kala kuno noo kukya, co imene mutondo tukamona nga ashaka, nambe kashaka kukwambata. Nga shendi, co yange njilisinga ali Shukulu Kalunga wakuyoya ngwange njikakukongweya. Co ololo lala kuno noo mutondo.”

¹⁴ Ngecivene, Lute walalele kuje ku mendi a Mbowasi, oloni watuukile a mungulungengu, waile kutewa vamumona, omwo Mbowasi kashakele munu umo azivuke ngeci Lute nakele kuje.

¹⁵ Co Mbowasi wendekele kuli Lute ngwendi, “Jala nanga yove.” Co Lute wajalele nanga yendi, ngecivene, Mbowasi wetilileo mbale yakupwa makilo makumi avali, co wamutwikile a citsili cendi. Asinoni Lute welukile kwimbo.

¹⁶ Omo wetele ku njuvo, vainamweno vamwihwile vije vyalingiwile. Co Lute wamulekele vyuma vyoshe vije vyalingile Mbowasi kuli ikeye.

¹⁷ Co wendekele lalo ngwendi, “Mbowasi nanjilekele ngwendi kunjapandele kwiluka mavoko-voko kuli yove embwe, ngeci nanjana mbale yoshe eyi.”

¹⁸ Co Naumi wendekele kuli Lute ngwendi, “Ololo simpa munange, noo ukamona vati vyuma vyoshe evi muvyendela. Lelo Mbowasi kakahwima noo namanesa vyuma vyoshe evi.”