Luka 9 - Livulu lya Shukulu Kalunga

Yesu atuma vandongisi likumi na vavali

¹ Yesu wasanene vandongisi likumi na vavali vaije kuli ikeye, co wavanene nzili na moko yakutundisa minzinzime yakujwala yoshe nakukangwisa mishongo.

² Co wavatumine kuya nakwambulula Vumwene vwa Njambi nakukangwisa vaka-kuvinja,

³ wavalekele ngwendi, “Kesi mwambate cuma cimo a vungenzi vweni, nambe mulamu, nambe lipakumuna, nambe vyakulya, nambe vimbongo, nambe vikoveyo vivali.

⁴ Kwoshe kuje kuvakamitambula mwamuvwa, tumbameni ku njuvo ije vene noo mukatunda mu nganda ije,

⁵ kwoshe kuje vakavyana kumitambula, co tundeni mu nganda ije, co totomoneni likungu ku myanja yeni ngeci cipwe cuma cakuvanangula.”

⁶ Co vandongisi vaile vendanganene mu membo oshe nakwambulula Vin̄anda Vyavivwa nakukangwisa vanu kwoshe-ikwoshe.

Citanga ca Helonde

⁷ Omo Helonde, muka-kushwana mu Ngalileya, wazivile vyuma vyoshe vije vyalingiwile, co wakele na citanga, omwo vanu vamo vakele nakwendeka ngwavo, “Yowano Muka-kumbwitika nasanguka ku vatsi.”

⁸ Co vamo ngwavo, “Elinja nasholoka,” vamo ngwavo, “Umo wa vaka-kwimanena wa ku san̄ulu nasanguka lalo.”

⁹ Co Helonde wendekele ngwendi, “Yowano njamutapele mutwe, oloni iyajo ou munalume injilinakuziva vyendi?” Co washakele manene kumona Yesu.

Yesu alisa vanalume vakupwa 5,000

¹⁰ Miluwa va Yesu velukile vamulekele vyoshe vije vivalingile. Co waile amo navo wavatwalele kwavo lika ku nganda ivatumbwile Mbetesainda.

¹¹ Omo mbunga vazivile evi, co vamukavele. Wavatambwile nakuvambulwila vya Vumwene vwa Njambi nakukangwisa vaje vakele nakuvinja.

¹² Omo kwapwile cingwezi, vandongisi vaje likumi na vavali vezile kuli ikeye vendekele ngwavo, “Shandola vimbunga evi ngeci vaye ku membo na ku mahya awa amuyehi vakaliwaneneko vyakulya vakevo vavenya noku kwakulala, omwo muno munapu mu mambo yangoco.”

¹³ Oloni Yesu wendekele kuli vakevo ngwendi, “Yeni vene vaaneni vyakulya ngeci valye.” Co vamukumbulwile ngwavo, “Kutwesi na vyakulya vyeka kuvanga mikasha ya makende itanu na visi vavali. Kuma yove ushaka tuye nakulanda vyakulya vya mbunga yoshe eyi ndi?”

¹⁴ (Kwakele vanalume vakupwa 5,000 kuje.) Yesu wendekele kuli vandongisi vendi ngwendi, “Lekeni vanu vatumbame asi mu vimunga mu munga na munga mukale vanalume makumi atanu.”

¹⁵ Omo vandongisi valingile ngacije,

¹⁶ Yesu watambwile ije mikasha ya makende itanu na visi vavali, wakengele mwilu, co wakandelelele kuli Njambi, co wavipazwile, wavyanene kuli vandongisi vendi ngeci vavipangezelele vimbunga vya vanu.

¹⁷ Voshe valile, vakutile, co vandongisi vakungulwile vimbazuvwila vije vyasaleleo vashulisile mitonga likumi na ivali.

Petulu atava ngeci Yesu ikeye Kilistu Wakuvwavesa

¹⁸ Litangwa limo omo Yesu wakele nakulombela kwendi lika, vandongisi vendi vezile kuli ikeye. Co wavehwile ngwendi, “Vanu valinakunjitumbula ngwavo yange iya?”

¹⁹ Vamukumbulwile ngwavo, “Vamo valinakwendeka ngwavo yove Yowano Muka-kumbwitika, veka lalo ngwavo yove Elinja, vakwavo lalo ngwavo yove umo wa vaka-kwimanena valaja uje nasanguka.”

²⁰ Co Yesu wavehwile ngwendi, “Yeni oni munjitumbula ngweni yange iya?” Petulu wamukumbulwile ngwendi, “Yove Wakuvwavesa wa Njambi.”

Yesu endeka a tuyando twendi na a kutsa kwendi

²¹ Asinoni Yesu wavasin̄ikile ngwendi kesi valekeko munu umo cuma eci.

²² Co wendekele lalo kuli vakevo ngwendi, “Muna Munu napande kuyanda manene, co vakulunu vakamuvyana na vakulunu va vaka-kukombelela, na valongisi va majwi a Lishiko. Co vakamutwala ku kutsa, oloni munima ya matangwa atatu akasanguka.”

²³ Co wendekele kuli vakevo lalo ngwendi, “Nga munu ashaka kunjikava, napande kulivyana ikeye vavenya, ambate cilindakano cendi a litangwa na litangwa, co anjikavangeye.

²⁴ Omwo munu woshe ashaka kunyunga mwonyo wendi auzimbalesa, oloni munu uje azimbalesa mwonyo wendi omwo lizina lyange akauwana.

²⁵ Omwo nga munu afuka kaye koshe, oloni azimbalesa mwonyo wendi nambe kumufungulula vika awanao? Mwa vushunga vene nacimo cai!

²⁶ Nga munu anjizivila shwamwa na vilongesa vyange, co na Muna Munu lalo nendi akamuzivila shwamwa omo akaija mu vumpau vwendi na mu vumpau vwa Ishe na mu vumpau vwa tungelo vakujela.

²⁷ Mwa vushunga njimileka ngwange, kuli vamo kuno, kuvakatsi kuvanga vanamono Vumwene vwa Njambi.”

Kulimuka kwa Yesu

²⁸ Munima ya matangwa atanu na avali omo wendekele vyuma evi, Yesu waile amo na Petulu, na Yowano, na Yakomba ku munkinda nakulombela.

²⁹ Simbu wakele nakulombela, cihanga cendi cemukile, co vuzalo vwendi vwatokele too ngwe ceke.

³⁰ Vwasi-vwasi vanalume vavali vakele nakwendeka nendi. Vakevo vapwile Mosesa na Elinja,

³¹ vaje vasholokele mu vumpau vwa mwilu vakele nakwendeka na Yesu a ngila ije yakushulisilamo vwasi vutumbe vwa Njambi a kutsa kwendi mu Yelusalema.

³² Petulu na vaje vaakele navo vakele mu tulo, oloni omo vendukile vamwene vumpau vwa Yesu na vanalume vavali vaje vemanene navo.

³³ Omo vaje vanalume vasezele Yesu, co Petulu wendekele kuli ikeye ngwendi, “Shukulu, mwamuvwa kuli yetu nga tukala kuno! Tutunga mambalanda atatu, limo lyove, limo lya Mosesa, limo lya Elinja.” (Kazivukile vije vyakele nakwendeka.)

³⁴ Simbu Petulu wakele nakwendeka, lishelwa lyezile nakuvafwika, co vandongisi vazivile lyova omo lishelwa lyavafwikile.

³⁵ Co lijwi lyatundile mu lishelwa lyendekele kuli vakevo ngwalyo, “Ou ikeye Munange injinaangula, mutolilileni!”

³⁶ Omo lijwi lyolokele, Yesu wakele endi lika. Co vandongisi volokele kuluu a vyuma vyoshe evi, co a simbu ije kuvalekeleko munu umo vyuma vije vivamwene.

Yesu akangwisa mukwenje uje wakele na munzinzime wakujwala

³⁷ Alikaki Yesu na vandongisi vendi vatatu vashelumukile ku munkinda, mbunga yakama valiwanene na Yesu.

³⁸ Munalume umo watundile aje a mbunga watambekele ngwendi, “Mulongisi! Njikulambelela, Kenga munange, munange umolika!

³⁹ Omo munzinzime wakujwala umuwana, co atambeka nakushinya, co atutumuna lifulu ku kanwa, umuvetwesa manene, co kuumwecela vwasi.

⁴⁰ Njalambelelele vandongisi vove ngwange vamutundiseye, oloni kuvasele.”

⁴¹ Co Yesu wakumbulwile ngwendi, “Yeni vaka-kujeneka kukulaela na vanu vaka-vuvi! Visimbu vingaijo njikakala neni? Visimbu vingaijo njinapande kuyanda omwo yeni?” Asinoni wendekele kuli uje munalume ngwendi, “Nena kuno munove.”

⁴² Omo mukwenje wakele nakwija, co munzinzime wakujwala wamuwisilile asi nakumushinyisa manene. Co Yesu washikile uje munzinzime wakujwala, uje mukwenje wakangukile, co wamwanene kuli ishe.

⁴³ Co vanu voshe valikomokelele a nzili yakama ya Njambi. Vanu vacikele nakulikomokela a vyuma vyoshe vije vyalingile Yesu, omo wendekele kuli vandongisi vendi ngwendi,

Yesu endeka lalo a kutsa kwendi

⁴⁴ “Kesi mwivale evi vinjimileka! Muna Munu ololo vamwana ku nzili ya vanu.”

⁴⁵ Oloni vandongisi kuvazivukile mucalumbunukilile cuma eci. Vavashwekeleleco ngeci kesi vacizivuke, co vazivile lyova lyakumwihula cuma eci.

Uje napu wakama kutuvakana

⁴⁶ Kwakatukile vimata akati ka vandongisi ngeci iyajo wakama akati kavo.

⁴⁷ Yesu wazivukile viyongola vya mu vimbunge vyavo, ngecivene, wasanene mwanike wamundondo, wamwimikile ku mati yendi,

⁴⁸ co wendekele kuli vakevo ngwendi, “Woshe atambula mwanike ou mu lizina lyange, co natambula yange vene, woshe uje anjitambula, natambula lalo uje wanjitumine. Omwo woshe uje napu wamundondo akati keni muvavoshe, ikeye napu wakama.”

Woshe uje kamilwisa ikeye ali amo neni

⁴⁹ Yowano wendekele ngwendi, “Shukulu, twamwene munalume umo wakele nakutundisa minzinzime yakujwala mu lizina lyove, co twamulekele ngeci alikele, omwo ikeye kesi wa mu munga yetu embwe.”

⁵⁰ Yesu wamulekele nakuleka lalo vandongisi vakwavo ngwendi, “Kesi mweseke kumuvindika embwe, omwo woshe uje kamilwisa ikeye ali amo neni.”

Yesu vamuvyana kumutambula mu limbo limo lya mu Samaliya

⁵¹ Omo matangwa ashwenyele kuyehi ngeci Yesu vamutwale mwilu, watengulwile viyongola vyendi, co waile ku Yelusalema.

⁵² Watumine miluwa kulutwe lwendi, co vaile nakukovela mu limbo lya mu Samaliya ngeci vakamuvwaesele cimweja vyuma vyoshe.

⁵³ Oloni vanu vakele kuje kuvamutambwile, omwo casholokele ngeci vungenzi vwendi vwapwile vwakuya ku Yelusalema.

⁵⁴ Omo vandongisi vendi Yakomba na Yowano vamwene evi, vendekele ngwavo, “Mwene, kuushaka ngeci tusane tuhya twa mwilu twije nakuvanyongesa ndi?”

⁵⁵ Yesu watengulukililile kuli vakevo wavavindikile ngwendi, “Kumuzivuka Munzinzime uka uje umulinawo, omwo Muna Munu kezile nakunyongesa myonyo ya vanu, oloni wezile ngeci avovole.”

⁵⁶ Asinoni Yesu na vandongisi vendi vaile ku limbo likwavo.

Vaje vashaka kukavangeya Yesu

⁵⁷ Omo vakele nakuya mu ngila, munalume umo wendekele kuli Yesu ngwendi, “Njikakukava kwoshe kuuya.”

⁵⁸ Yesu wendekele kuli ikeye ngwendi, “Vimbanje vali na mena, co tuzila lalo vali na mashwa, oloni Muna Munu kesi naa akusatela mutwe wendi.”

⁵⁹ Co Yesu wendekele kuli munalume mukwavo ngwendi, “Njikave.” Oloni uje munalume wendekele ngwendi, “Shukulu, akulivanga njitave njiiluke njikatsinde tai tate.”

⁶⁰ Yesu wamukumbulwile ngwendi, “Seza vatsi valitsinde vakevo vavenya. Yove ya nakwambulula vya Vumwene vwa Njambi.”

⁶¹ Munalume mukwavo wendekele ngwendi, “Njikakukava Shukulu, oloni akulivanga njitave njiye njikasaleseo tai vavushoko vwange.”

⁶² Yesu wendeklele kuli ikeye ngwendi, “Naumo wai uje nashangumuka kulima na vingombe, co akenga-kenga kunima apwa wa seo mu Vumwene vwa Njambi.”