Luka 6 - Livulu lya Shukulu Kalunga

Cihula ca a Litangwa Lyakuhwima

¹ Yesu wakele nakwita mu mahya a tiliku a Litangwa Lyakuhwima. Vandongisi vendi vashangumukile kushutozola mitwe ya tiliku, vaitsenene mu mavoko avo, co valile vinona.

² Co vaFaliseo vamo vehwile ngwavo, “Omwo vika mulinakulinga evi kuvesi kulinga a Litangwa Lyakuhwima?”

³ Yesu wavakumbulwile ngwendi, “Kuma kanda mulave vije vyalingile Ndaviti na vaje vakele amo nendi omo vazivile njala ndi?

⁴ Wakovelele mu Njuvo ya Shukulu Kalunga, wanonele aje makende avakombelelele kuli Njambi, waalile, co waaneneko lalo vanu vendi. Makende aje kuwapandele kuwalya kuli munu woshe-iwoshe kuvanga vaka-kukombelela lika.”

⁵ Co Yesu wamanesele ngwendi, “Omwo Muna Munu ikeye Mwene wa Litangwa Lyakuhwima.”

Munalume wakusekwa livoko

⁶ A litangwa Lyakuhwima likwavo Yesu wakovelele mu sinangonge, co walongesele. Mwakele munalume umo wakusekwa livoko lya cilyo.

⁷ Co valongisi va majwi a Lishiko na vaFaliseo vamo vashakele kashwilo ali Yesu ngeci vamuwaneneo mulonga, ngecivene, vamukengele shwii muyehi-yehi ngeci vamone nga ikeye akangwisa uje munu a Litangwa Lyakuhwima.

⁸ Oloni Yesu wazivukile viyongola vyavo, co wendekele kuli uje munalume wakusekwa livoko ngwendi, “Katuka wije kuno kulutwe.” Co uje munalume wakatukile wemanene kuje.

⁹ Asinoni Yesu wendekele kuli vakevo ngwendi, “Njimihula ngwange, cuma muka vanatutavesa ku Lishiko lyetu kucilinga a Litangwa Lyakuhwima? Kukwasa indi kuvulumuna? Kwamena mwonyo wa munu indi kuunyongesa?”

¹⁰ Wakengele kuli vakevo voshe, asinoni wendekele kuli uje munalume ngwendi, “Olola livoko lyove.” Wolwele livoko lyendi, co lyakangukile nakupwa amo na likwavo.

¹¹ Oloni vakele na matoto, co valyendekesele akati kavo vije vivapandele kulinga kuli Yesu.

Yesu aangula miluwa likumi na vavali

¹² A simbu ije Yesu walamatele ku munkinda nakulombela, co wakele nakulombela vutsiki vwoshe kuli Njambi.

¹³ Omo litangwa lyatuukile, co wasanene vandongisi vendi ngeci vaije kuli ikeye, co waangwileo likumi na vavali, vaje vaatumbwile miluwa,

¹⁴ Simoni (uje yalukile Petulu) na ndolome yendi Anduleo, Yakomba na Yowano, Filipu na Mbatolomeo,

¹⁵ Mateo na Tomasi, Yakomba muna Alufeya, na Simoni (uje ivatumbwile “Zelote” )

¹⁶ Yundasa muna Yakomba, na Yundasa Isikalyote, uje wamwendele vungungu.

Yesu alongesa nakukangwisa

¹⁷ Omo Yesu washelumukile amo na miluwa vendi ku munkinda, co wemanene ku mutambela wakukunama na mbunga yakama ya vandongisi vendi. Co mbunga yakama ya vanu vatundile ku Yundeya na ku Yelusalema, na vaje vatundile ku vinganda vyakele ku cikuma ca ku Tile na ku Sindone,

¹⁸ vezile nakumutolilila nakuvakangwisa ku mishongo yavo. Voshe vaje vakele nakuyanda na minzinzime yakujwala vezile, co wavakangwisile.

¹⁹ Co mbunga yoshe vesekele kumukambeka mavoko, omwo nzili yafumine kuli ikeye nakuvakangwisa voshe.

Kuvezika nakuviilila

²⁰ Yesu wakengele vandongesi vendi, co wendekele ngwendi, “Mwavezika yeni vaka-kuutwa, omwo Vumwene vwa Njambi vunapu vweni!

²¹ “Mwavezika yeni muli na njala ololo, omwo mukakuta! “Mwavezika yeni mulinakulila ololo, omwo mukajolela!

²² “Mwavezika omwo vanu vamizinda nakumivyana nakumishaula nakumitumbula ngwavo muvavavi, omwo lizina lya Muna Munu!

²³ Joleleni omo eci cilingiwa, co kineni nakujolela, omwo vanamitulikila cikandelela ceni cakama mwilu. Omwo vakukulwila vavo valingile ngacije kuli vaka-kwimanena.

²⁴ “Oloni tuyando tweni yeni munafuku ololo, omwo mwatambula laja kuyoya kwakuvwa!

²⁵ “Tuyando tweni yeni munakuta ololo, omwo mukaziva njala! “Tuyando tweni yeni mulinakujolela ololo, omwo mukalinyenga nakulila!

²⁶ “Tuyando tweni omo vanu voshe valinakumishangazala, omwo vakukulwila vavo valingile ngacije kuli vaka-kwimanena va makuli.

Kuzema vitozi

²⁷ “Oloni njimileka yeni vaka-kunjitolilila ngwange, zemeni vitozi veni, lingeni mwamuvwa kuli vaje vamizinda,

²⁸ vezikiseni vaje vamisinga, co lombeleleni vaje valinakumiyandesa.

²⁹ Nga munu akupupa ku nana imo, co mutengulwile akupupe ku nana ikwavo lalo, nga munu akunyeka kazaku kove, mwane lalo na cikoveyo cove.

³⁰ Munu uje amilomba mwaneni cuma canamilombo, omo munu ambata cuma cove, co kesi akwilwisileco lalo.

³¹ Ngecivene, vyuma vyoshe vimushaka ngeci vakweni vamilingilevyo, mukemwo vene, neni lalo valingilenivyo.

³² “Nga muzema lika vaje vamizema, omwo vikajo mutambwila cikandelela? Nameme vaka-vuvi vakazeme vaka-kuvazema!

³³ Nga mulinga likamwamuvwa kuli vaje vakamilingi mwamuvwa, omwo vikajo mutambwila cikandelela? Nameme vaka-vuvi mukemwo muvakalingi!

³⁴ Nga mukumwisa lika vaje mwakulaela ngweni vamiilwisila, omwo vikajo mutambwila cikandelela? Nameme vaka-vuvi lalo vakalikumwisa, ngeci vatambule ngwe muje muvanaana.

³⁵ Embwe! Zemeni vitozi veni, co lingeni mwamuvwa kuli vakevo, vakumwiseni oloni kesi mukulaele ngweni mukavitambula lalo. Co cikandelela ceni cikapwa cakama, mukapwa vana va Njambi wa Akamwa ya Akamwa. Omwo ikeye akatetela vaje kuvesi kumukandelela na vaje vaka-vuvi.

³⁶ Pweni vaka-kutetela ngwe Ishweni wapwa muka-kutetela.

Kuhisa vakweni

³⁷ “Kesi muhise vakweni, kutewa neni Njambi akamihisa, kesi mupaye vakweni, kutewa neni Njambi akamipaya, sambeseni vakweni, co Njambi akamisambesa.

³⁸ Aneni vakweni, co Njambu akamyana. Mwa vushunga vene, mukatambula vyavingi, vukwasi vwakushemutukwa, vakavwaka mu mavoko eni, vukwasi vuje vwoshe mwasa kukwata. Seteko ije musetaka nayo vakweni, ikeyo lalo yakamiseteka nayo Njambi.”

³⁹ Co Yesu wavatelelele cisimo eci ngwendi, “Kapuputwa umo kasa kutwamenena kapuputwa mukwavo, nga alingamo voshe vavali vakawila mu mbulu.

⁴⁰ Kukwesi ndongisi atuvakana mulongisi wendi oloni ndongisi woshe, omo namanesa kulilongesa kwendi, na ikeye lalo akapwa amo na mulongisi wendi.

⁴¹ “Omwo vikajo umona kacishoni kali a lisho lya mukweni, oloni kuuyongola mukambo uli mu lisho lyove?

⁴² Nambe vatijo wendeka na mukweni ngwove, ‘Mukwetu, tewa njikutundise kacishoni kali a lisho lyove,’ omo yove uli na mukambo mu lisho lyove? Ove muka-civembulu! Akulivanga tundisa mukambo uli mu lisho lyove, asinoni umone mwamuvwa akutundisa kacishoni kali a lisho lya mukweni.

Muti na vushuka vwawo

⁴³ “Muti wauvwa kuwasa kwima vushuka vwavuvi, nambe muti wauvi kuwasa kwima vushuka vwavuvwa.

⁴⁴ Muti woshe vauzivukila ku vushuka vwawo, omwo kuwasa kuvuya vushuka vwa mukuyu ku muti wa mambimbo, nameme ku muti wa mambimbo kuwasa kuvuyako mikolovozi ya vushuka vwa vinyu.

⁴⁵ Munu wamuvwa ikeye muka-kusholola vyuma vyavivwa ku vufuko vwendi vwavuvwa vwa mu mbunge, munu wamuvi akasholola vyuma vyavivi ku vufuko vwendi vwavuvi vwa mu mbunge. Omwo kanwa kakendeka vije vyashula mu mbunge.

Vaka-kutunga vinjuvo vavali

⁴⁶ “Omwo vika munjitumbula ngweni, ‘Mwene, Mwene,’ oloni kumulingi vinjimileka?

⁴⁷ Woshe uje aija kuli yange nakuzivilila majwi ange nakuwononoka, njimileka cifwa cendi.

⁴⁸ Nalifu ngwe munalume watungile njuvo yendi, wendile nakulovesa luvula a limanya. Livazi lyezile lyapupile kuje ku njuvo, oloni kuyaningangele, omwo luvula lwaije njuvo lwakele a limanya.

⁴⁹ Oloni woshe aziva majwi ange kujeneka kuwononoka napu ngwe munalume watungile njuvo yendi kujeneka kwinda luvula, omwo livazi lyapupile kuje ku njuvo, co yasiwukile, kuwa kwayo kwapwile kwakuvi manene!”