Luka 24 - Livulu lya Shukulu Kalunga

Kusanguka kwa Yesu

¹ A mungulungengu a litangwa lya Calumingo vanakazi vaile ku mbumbo, vambatele n̄undu ivavwaesele.

² Vawanene limanya vanalitundisa ku mbumbo,

³ co vakovelelemo, oloni kuvawanenemo muvila wa Mwene Yesu.

⁴ Vemanene muje oku vanalikomokela, co vwasi-vwasi vanalume vavali vanazala vuzalo vwakuvyazima manene vemanene kuyehi navo.

⁵ Co vaje vanakazi vazivile lyova, vakulamenene asi, omo vaje vanalume vendekele kuli vakevo ngwavo, “Omwo vika mushakezeka muka-kuyoya akati ka vatsi?

⁶ Waimo muno, nasanguka. Anukeni muje mwendekele kuli yeni omo wakele mu Ngalileya ngwendi,

⁷ ‘Muna Munu vanapande kumwana ku mavoko a vaka-vuvi, vakamushukika a cilindakano, co munima ya matangwa atatu akasanguka.’ ”

⁸ Co vaje vanakazi vanukile majwi endi,

⁹ vatundile ku mbumbo, co vambulwile vyuma vyoshe evi kuli vaje vandongisi likumi naumo, na vakwavo voshe lalo.

¹⁰ Vaje vanakazi vapwile Maliya Mangandalena na Yowana na Maliya vaina ya Yakomba na vanakazi vakwavo lalo vambulwile vyuma evi kuli miluwa.

¹¹ Oloni miluwa vayongwele ngeci vije vivendekele vanakazi vyapwile vyakujeneka seo, kuvavakulaelele.

¹² Oloni Petulu wakatukile washatukilile ku mbumbo, washumbililemo, wamwene lika vinanga mu mbumbo cuma ceka cai. Co welukile kwimbo nakulikomokela a vyuma vije vyalingiwile.

Kwenda kuya ku Emausi

¹³ A litangwa lije vene vandongisi va Yesu vavali vakele nakuya ku limbo limo livatumbwile Emausi, nunda yakwo yapwile makilomita likumi na imo kutunda ku Yelusalema,

¹⁴ vakale nakusimutwiya akati kavo a vyuma vyoshe vije vyalingiwile.

¹⁵ Omo vakele nakwendeka nakuyongola, Yesu vavenya washwenyele kuyehi, co wendele amo navo,

¹⁶ vamumwene, oloni kuvamunongonwene.

¹⁷ Yesu wendekele kuli vakevo ngwendi, “Vin̄anda muka mulinakusimutwiya oku mulinakwenda?” Vemanene, vihanga vyavo vyakele na vusiwa.

¹⁸ Co umo wavo lizina lyendi Kilyopase, wamukumbulwile ngwendi, “Yove lika u mungenzi mu Yelusalema uje kazivuka vika vinalingiwa a matangwa awa amandondo ndi?”

¹⁹ Co wavehwile ngwendi, “Vyuma muka?” Vamukumbulwile ngwavo, “Vya ali Yesu wa ku Nazaleta. Munalume ou wapwile muka-kwimanena, co Njambi na vanu voshe vamuyongwele kupwa muka-nzili mu vyuma vyoshe wendekele na vije vyalingile.

²⁰ Co vakulunu vetu va vaka-kukombelela na vaka-kushwana vamwanene ngeci vamutsiye, co vamushukikile a cilindakano.

²¹ Co twakele na cinyangavili ngeci, ikeye akapatula Isalele! Co lalo lelo linapu litangwa lyamucitatu kutunda aje vyalingiwile vyuma evi.

²² Vanakazi vamo va mu munga yetu vatukomokesele, vamenekelele ku mbumbo,

²³ oloni kuvakawanene muvila wendi. Co velukile nakwendeka ngwavo vanakamwene cimona ca tungelo vaje vavalekele ngwavo alinakuyoya.

²⁴ Co vamo va mu munga yetu vanaileko, co mwa vushunga vakawanene ngwe muje vene vendekele vanakazi, oloni kuvamumwene.”

²⁵ Co Yesu wendekele kuli vakevo ngwendi, “Eni vilema vaka-kwishwala kukulaela vije vyoshe vivendekele vaka-kwimanena!

²⁶ Kuma Wakuvwavesa kapandele kuyanda a vyuma evi nakukovela mu vumpau vwendi ndi?”

²⁷ Co Yesu washangumukile kuvanungulwila mu Visoneka vyoshe vyuma vije vendekele vyakutumbula ikeye, kushangumuka na mavulu a Mosesa nakutwala ku visoneka vya vaka-kwimanena voshe.

²⁸ Omo vetele kuyehi na limbo kuje vakele nakuya, Yesu walingile ngwe atuvakana kamandondo kuya kulutwe,

²⁹ oloni vamusindiiye ngwavo, “Unapande kukala netu kuno omwo litangwa linatoko.” Co waile nakukakala navo.

³⁰ Co watumbamene navo ku mesa nakulya, co wanonele likende nakulivezikisa, co walipazwile walyanene kuli vakevo.

³¹ Co mesho avo ashokolokele vanangukile ngwavo kuma ikeye, oloni walavukile ku mesho avo.

³² Co valyendekesele umo na mukwavo ngwavo, “Kuma vimbunge vyetu kuvyezukile omo nakele nakwendeka netu mu ngila nakutunungulwila vya mu Visoneka ndi?”

³³ Vakatukile a simbu ije vene velukile ku Yelusalema, vawanene vandongisi likumi na umo vanalikungulula na vaje vakwavo veka lalo

³⁴ vendekele ngwavo, “Mwa vushunga vene Mwene nasanguka! Nalisholola kuli Simoni!”

³⁵ Co vaje vavali valangulwile vije vyalingiwile mu ngila, nomu vanongonwene ngwavo kuma ikeye Mwene omo wapazwile likende.

Yesu alisholola kuli vandongisi vendi

³⁶ Simbu vaje vavali vakele nakuvaleka vyuma evi, vwasi-vwasi Yesu vavenya wemanene akati kavo wendekele kuli vakevo ngwendi, “Kwoloka kukale neni.”

³⁷ Vazivile lyova lyakama, omwo vayongwele ngwavo vanamono ndumba ya munu.

³⁸ Oloni wendekele kuli vakevo ngwendi, “Omwo vika munalijujukila? Omwo vika muli na vimata mu vimbunge vyeni?

³⁹ Kengeni mavoko ange na myanja yange, co moneni ngeci yange vene. Njikwateni, co muzivuka, omwo ndumba ya munu kakele na muvila na vitsiya, ngwe evi mwamono njilinavyo.”

⁴⁰ Wendekele evi, co wavamwesele mu mavoko endi na mu myanja yendi.

⁴¹ Nameme ngoco kuvakulaelele, vavwaelelele manene nakulikomokela, co wavehwile ngwendi, “Muli na vyakulya ndi?”

⁴² Co vamwanene mbazuvwila ya isi wakuteleka,

⁴³ co waitambwile nakuyilya ku mesho avo.

⁴⁴ Co wavalekele ngwendi, “Evi vikevyo vyuma vije njamilekele omo njakele neni ngwange, vyuma vyoshe vije vasonekele mu Lishiko lya Mosesa, na mu visoneka vya vaka-kwimanena, na mu Myaso vyakunjitumbula yange vinapande kulingiwa.”

⁴⁵ Co washokolwele mana avo ngeci vazivuke Visoneka,

⁴⁶ co wendekele kuli vakevo ngwendi, “Eci cikeco vasonekele ngwavo, Wakuvwavesa napande kuyanda, co akasanguka munima ya matangwa atatu,

⁴⁷ ngeci kutenguluka nakusambesa kwa vivi vakavyambulule mu lizina lyendi ku mafuti oshe, kushangumukila mu Yelusalema.

⁴⁸ Yeni munapu mu vakaleo va vyuma evi.

⁴⁹ Yange njikatuma kuli yeni vije vyanjikulaese Tate. Oloni munapande kuvandamena mu nganda noo nzili yakutunda kwilu inaija ali yeni.”

Yesu vamutwala mwilu

⁵⁰ Co watuukile navo mu nganda wavatwalele kuyehi na Mbetaniya, kuje wajundwile mavoko endi nakuvavezikisa.

⁵¹ Omo wakele nakuvavezikisa, co walyangunukile navo vamutwalele mwilu.

⁵² Vamulemesele, co velukile mu Yelusalema nakujolela manene,

⁵³ co simbu yoshe vakele mu Njuvo ya Shukulu Kalunga nakushangazala Njambi.