Luka 23 - Livulu lya Shukulu Kalunga

Yesu vamutwala kuli Pilato

¹ Co mbunga yoshe vakatukile vatwalele Yesu kuli Pilato.

² Co vashangumukile kumuvangela ngwavo, “Tunawana ou munalume alinakutangula vanu vetu, alinakuvindika kufweta lisimu kuli Sezale nakulitumbula ikeye vavenya ngwendi ikeye Wakuvwavesa, mwene.”

³ Pilato wamwihwile ngwendi, “Yove mwene ya vaYunda ndi?” Yesu wamukumbulwile ngwendi, “Omo muunendeka mukemwo vene.”

⁴ Co Pilato wendekele kuli vakulunu va vaka-kukombelela na mbunga ngwendi, “Yange kunjawanene mulonga ali munu ou.”

⁵ Oloni vakevo vendekele na nzili ngwavo, “Ikeye alinakushongangeya vanu na vilongesa vyendi ngeci valinge mpindangono mu Yundeya mwoshe. Washangumukile mu Ngalileya, co ololo naija kuno.”

Yesu vamutwala kuli Helonde

⁶ Omo Pilato wazivile ngacije, co wehwile ngwendi, “Kuma ou munalume kaNgalileya ndi?”

⁷ Omo ikeye wazivukile ngeci Yesu watundile ku lifuti lije lyakele nakushwana Helonde, co wamutumine kuli Helonde, uje wakele mu Yelusalema a simbu ije.

⁸ Helonde wavwaelelele manene omo wamwene Yesu, omwo wazivile vyendi, co a matangwa a kunima washakele manene kumumona. Wakele na cinyangavili cakumona Yesu ngeci alinge cizivukiso cimo.

⁹ Ngecivene, Helonde wehwile Yesu vihula vyavingi, oloni Yesu kakumbulwile lijwi limo lyai.

¹⁰ Co vakulunu va vaka-kukombelela na valongisi va majwi a Lishiko vashwenyele kulutwe nakumuvangela vyuma vyavingi.

¹¹ Helonde na mashwalale vendi vamushendumwine nakumulinga mwamuvi, co vamuzikile nanga yailaja yaivwa, co vamwilwisilile lalo kuli Pilato.

¹² Co a litangwa lije vene Helonde na Pilato valikwatele vusamba, oloni laja valizindile.

Yesu vamusompela kutsa

¹³ Pilato wasanene vakulunu va vaka-kukombelela, na vantwama na vanu,

¹⁴ co wendekele kuli vakevo ngwendi, “Mwanenele ou munalume kuli yange nakwendeka ngweni alinakutanganesa vanu. Ngecivene, yange njinamwihwile kuno ku mesho eni, co kunjawanene mulonga wa cuma cimo cacivi cimunamuvangela.

¹⁵ Nambe Helonde omo namwilwisa kuli yetu, kawanene mulonga muli ikeye. Ou munalume kukwesi cuma canalingi ngeci vamwaneneco mulonga wa kutsa.

¹⁶ Ngecivene, njikamupupa lika, co njimwecela ngeci aye.”

¹⁷ A simbu yoshe ya Ciwano ca Pasovala, Pilato wakele nakwecela cinzinda umo uje vashakele vanu.

¹⁸ Co mbunga yoshe vatambekele ngwavo, “Mutsiye! Twane Mbalambasa!”

¹⁹ (Mbalambasa vamwakele mu kamenga omwo wakele nakulinga mpindangano mu nganda nakutsiya vanu.)

²⁰ Pilato washakele kwecela Yesu, co wendekele lalo ku mbunga.

²¹ Oloni vatambekele ngwavo, “Mushukike a cilindakano! Mushukike a cilindakano!”

²² Pilato wendekele navo lwamucitatu ngwendi, “Vuvi vuka vwanalingi? Yange kunjawanene cuma cakumutsiila! Njimupupa lika, co njimwecela aye.”

²³ Oloni vanu vatambeleke ngwavo Yesu vamushukike a cilindakano, co kutambeka kwavo cavahyanesele.

²⁴ Ngecivene, Pilato wavatwile n̄anda ije, ngwe muvalombele vakevo.

²⁵ Co wecelele uje munu ivashakele, uje ivaakele mu kamenga a mulonga wa mpindangano nakutsiya vanu. Co wavanene Yesu ngeci vamulinge mwaya cizango cavo.

Yesu vamushukika a cilindakano

²⁶ Mashwalale vatwalele Yesu, co omo vakele nakuya, valiwanene na munalume umo lizina lyendi Simoni wa ku Silene, uje wezile ku nganda kutunda ku mahya. Co vamukwatele vamutwikile cilindakano, co vamulekele ngeci akave Yesu munima.

²⁷ Mbunga yakama ya vanu vamukavele, akati kavo akele vanakazi vaje vakele nakulila nakulinyenga ali ikeye.

²⁸ Yesu watengulukilile kuli vakevo wendekele ngwendi, “Eni vanakazi va mu Yelusalema! Kesi mulilile yange, oloni lilileni yeni vavenya na vana veni!

²⁹ Omwo matangwa alinakwija omo vanu vakendeka ngwavo, ‘Vanavezika vanakazi vaje kuvesi na vana, vaje kuvakitile vimbututu vaje kuvalelele!’

³⁰ Ije ikeyo ikapwa simbu omo vanu vakendeka ku minkinda ngwavo, ‘Tuwileni!’ Na ku malundu ngwavo, ‘Tufwikeni!’

³¹ Omwo nga valinga vyuma evi ku muti wakutonola, cooni vakalinga vati ku muti wakuma?”

³² Co lalo kwakele mapwepwe vavali va vanalume vavatwalele amo na Yesu nakukavatsiya.

³³ Omo vetele ku mutambela umo uvatumbwile ngwavo, “Cikola,” co vashukikile Yesu a cilindakano, na vaje mapwepwe vavali, umo ku cilyo mukwavo ku cimoshwe.

³⁴ Yesu wendekele ngwendi, “Tate vasambese! Omwo kuvazivuka vika valinakulinga.” Co valipangelele vuzalo vwendi akati kavo akuta n̄ela.

³⁵ Co vanu vemanene kuje nakukengelela a simbu ije vantwama va vaYunda vamushendumwine ngwavo, “Wovwele vakwavo, alyovole ikeye vavenya nga ikeye Wakuvwavesa uje yanaangula Njambi!”

³⁶ Co na mashwalale lalo vamushendumwine, vezile kuli ikeye vamwanene vinyu,

³⁷ vendekele ngwavo, “Lyovole yove vavenya nga u mwene ya vaYunda!”

³⁸ Vasonekele majwi awa akamwa ya cilindakano cendi ngwavo, “Ou ikeye Mwene ya vaYunda.”

³⁹ Co lipwepwe umo ivashukikile amo nendi wendekele majwi akumushaula ngwendi, “Kuma kesi yove Wakuvwavesa ndi? Lyovole yove vavenya netu lalo utwovole!”

⁴⁰ Ngecivene, uje mukwavo lipwepwe wamukandele ngwendi, “Kuma yove kuwesi kukomoka Njambi ndi? Yove watambula cihiso ngwe ikeye.

⁴¹ Cihiso cetu cinatupande, omwo tutambula fweto ya vilinga vyetu, oloni munalume ou kesi na vuvi.”

⁴² Co wendekele kuli Yesu ngwendi, “Yesu njanuke, omo ukaija mu vumwene vwove.”

⁴³ Yesu wamulekele ngwendi, “Mwa vushunga njikuleka ngwange, lelo vene ukakala nange mu Citungu ca Njambi.”

Kutsa kwa Yesu

⁴⁴ Omo simbu yapwile akati ka litangwa, co litangwa lyazivalele, kwakele lisusulungu mu lifuti lyoshe lije lyakeleko noo a maola atatu,

⁴⁵ co nanga ije yajenjelele mu Njuvo ya Shukulu Kalunga yatavukile akati.

⁴⁶ Yesu watambekele na lijwi lyakama ngwendi, “Tate! Njikundika munzinzime wange mu mavoko ove.” Omo wamanesele kwendeka ngeci, co watulile mwonyo wendi.

⁴⁷ Co mukulunu wa mashwalale wamwene vije vyalingiwile, washangazalele Njambi wendekele ngwendi, “Mwa vushunga munalume ou wapwile muka-vushunga!”

⁴⁸ Omo vanu vaje vakungulukile kuje ku mutambela vamwene vije vyuma vyalingiwile, velukile ku membo avo valipupangele a vinulo vyavo mu vusiwa.

⁴⁹ Co voshe vaje vazivukile Yesu a mutunu wendi, amo na vanakazi vaje vamukavele kutunda ku Ngalileya, vemanene alyala nakukengelela vyuma evi.

Yesu vamutsinda

⁵⁰ Kwakele munalume umo lizina lyendi Yosefa wa ku nganda ya Alamatiya mu Yunda. Wapwile munalume wamuvwa wa kasingimiko,

⁵¹ uje wakele nakukengelela kwija kwa Vumwene vwa Njambi. Nameme wapwile umo wa mu Munga, oloni katavele ku vutumbe vwavo na vilinga vyavo.

⁵² Waile kuli Pilato nakulomba muvila wa Yesu.

⁵³ Washukwile muvila wa Yesu a cilindakano, co wauzengelele a nanga ya linyu, co waulangekele mu mbumbo ije ivacokwele mu limanya, muje kanda vatsindemo munu.

⁵⁴ Lyapwile litangwa lyamucitanu omo Litangwa Lyakuhwima kanda lyete.

⁵⁵ Vanakazi vaje vakavele Yesu kutunda ku Ngalileya vaile amo na Yosefa, co vakamwene mbumbo nomu valangekelemo muvila wa Yesu.

⁵⁶ Co velukile kwimbo vavwaesele n̄undu na mazi akunika lwengo ngeci vakuvwavese muvila wendi. Co a Litangwa Lyakuhwima vahwimine, ngwe ku Lishiko.