Luka 22 - Livulu lya Shukulu Kalunga

Vutumbe vwakutsiya Yesu

¹ Ciwano cakulya Makende Akujeneka Musima cakele muyehi, cije vatumbula ngwavo Ciwano ca Pasovala.

² Co vakulunu va vaka-kukombelela na valongisi va majwi a Lishiko vakele na lyova lya vanu, co vesekele kuwana ngila imo yakutsiya Yesu mu vushweke.

Yundasa atava kwenda Yesu vungungu

³ Co Satana wakovelele muli Yundasa, uje vatumbwile Isikalyote, umo wa vaje likumi na vavali.

⁴ Ngecivene, Yundasa waile nakwendeka kuli vakulunu va vaka-kukombelela na vamyata va vaka-kunyunga Njuvo ya Shukulu Kalunga kuwana ngila muka yakenda Yesu vungungu ngeci avaneye.

⁵ Co vakevo vavwaelelele, valizivasanene nendi kumwana vimbongo.

⁶ Co Yundasa watavele, co washangumukile kushakezeka ngila imo yaivwa yakwenda Yesu vungungu kujeneka vanu kuyizivuka.

Yesu alivwaesela kulya ku Ciwano ca Pasovala

⁷ Litangwa lyetele a simbu ya Ciwano ca Makende Akujeneka Musima, litangwa lije vatsiile vana va vimanga vakulya a Ciwano ca Pasovala.

⁸ Yesu watumine Petulu na Yowano ngwendi, “Yeni mukavwaesele cimweja Ciwano ca Pasovala ngeci tukalye.”

⁹ Co vamwihwile ngwavo, “Kulijo ushaka ngeci tukacivwaeseleko?”

¹⁰ Co wavakumbulwile ngwendi, “Omo mukakovela mu nganda, mukaliwana na munu nambata njava yakutekwila mema. Mukaveni nakweta kuje ku njuvo kwakakovela,

¹¹ endekeni kuli vavenya njuvo ngweni, ‘Mulongisi natutumu kuli yove ngwendi mulili ulikuli kwakalila Ciwano ca Pasovala na vandongisi vendi?’

¹² Co akamimwesa mulili wakama akamwa ya njuvo, vanauvwaesa cimweja, co mukatuvwaesele vyuma vyoshe.”

¹³ Co vaile vawanene vyuma vyoshe ngwe mwavalekele Yesu, vavwaesele vyakulya vya Ciwano ca Pasovala.

Mesa ya Mwene

¹⁴ Omo simbu yetele, Yesu watumbamene ku mesa amo na miluwa likumi na vavali.

¹⁵ Co wendekele kuli vakevo ngwendi, “Njashakele manene kulya eci Ciwano ca Pasovala amo neni simbu kanda njiyande!

¹⁶ Omwo njimileka ngwange, kutunda lelo kunjikacili lalo kuvanga noo cinalumbunuka mwamuvwa mu Vumwene vwa Njambi.”

¹⁷ Co Yesu wanonele nganja ya vinyu, wakandelelele kuli Njambi, co wendekele ngwendi, “Tambuleni nganja eyi mulishumwine akati keni,

¹⁸ njimileka ngwange, kutunda lelo kunjikanu lalo vinyu evi kuvanga noo Vumwene vwa Njambi vunaija.”

¹⁹ Co wanonele lalo likende, wakandelelele kuli Njambi, co walipazwile wavanenelyo ngwendi, “Eli linapu muvila wange uvanaana omwo yeni. Lingeni eci mukunjanuka yange.”

²⁰ Omo vanamanesa kulya wavanene nganja wendekele ngwendi, “Eyi nganja inapu cikumiiyo caciha ca Njambi civanakolesa na maninga ange aje anetikila ali yeni.

²¹ “Oloni kengeni, ou anjenda vungungu ali amo nange kuno ku mesa!

²² Muna Munu akatsa ngwe muje mwanayongola Njambi, oloni ngongo yendi uje amwenda vungungu!”

²³ Co miluwa vashangumukile kulihozola akati kavo ngwavo iyajo akalinga cuma eci.

Vimata ali uje napu wakama kutuvakana

²⁴ Co kwakele vimata akati ka vandongisi ngwavo iya umo akati kavo napu wakama.

²⁵ Co Yesu wendekele kuli vakevo ngwendi, “Vimyene va vaka-kujeneka kukulaela vali na nzili ali vanu vavo, co vaka-kushika valinakuvatumbula ‘Vasamba va Vanu.’

²⁶ Oloni eyi kesi ikeyo ngila akati keni, oloni woshe uje wakama akati keni napande kupwa wamundondo, co ntwama yeni napande kupwa ngwe ngamba.

²⁷ Iya wakama? Uje natumbama kukulya indi uje amwana vyakulya? Ngwetu uje natumbama kukulya ikeye wakama ndi? Oloni yange njili akati keni ngwe muka-kumipangela.

²⁸ “Yeni munakala nange mu tuyando twange twoshe,

²⁹ ngwe mwananjana Tate moko yakushwana, neni lalo njikamyana moko yakushwana.

³⁰ Yeni mukalya nakunwa nange mu Vumwene vwange, co mukatumbama a matanda nakusompa miyati likumi na ivali ya Isalele.

Yesu endeka ngeci Petulu akamuvyana

³¹ “Simoni, Simoni! Satana nalombo ngeci amyeseke yeni voshe, kwangununa vavavwa ku vavavi ngwe muka-kulima mwakaangununa tiliku ku lijungu.

³² Oloni yange njinakulombelela Simoni, ngeci kukulaela kwove kesi kuhwe. Co omo ukatenguluka nakwiluka kuli yange, unapande kukatakamesa vakweni.”

³³ Co Simoni wamukumbulwile ngwendi, “Mwene, njinalivwaesa laja kuya mu kamenga nakukatsa nove!”

³⁴ Yesu wamukumbulwile ngwendi, “Mwa vushunga Petulu njikuleka ngwange, vutsiki vuno vene simbu kanda ndemba atambeke, ukanjivyana visimbu vitatu ngwove kuunjizivuka.”

Lipakumuna, ngonga, na moko ya mukwale

³⁵ Yesu wehwile vandongisi vendi ngwendi, “Muje njamitumine kujeneka lipakumuna, ngonga nambe vin̄aku mwajenekele cuma cimo ndi?” Co vamukumbulwile ngwavo, “Embwe! Kutwajenekele cuma cimo cai.”

³⁶ Yesu wendekele kuli vakevo ngwendi, “Oloni simbu ino ou ali na lipakumuna nambe ngonga napande kwambata, co woshe kesi na mukwale napande kulandesa kazaku kendi alande moko ya mukwale.

³⁷ Omwo njimileka ngwange visoneka vije vyendeka ngwavyo, ‘Vamulavelele amo mu luvinda lwa vaka-kutsiya,’ co vinapande kulingiwa ali yange, omwo vije vivasonekele ali yange vilinakusholoka kupwa vya vushunga.”

³⁸ Co vandongisi vendekele ngwavo, “Mwene, kenga! Kuno kuli vimoko vya mikwale vivali!” Co wavakumbulwile ngwendi, “Mukemwo kunahu!”

Yesu alombela a Munkinda wa Oliveta

³⁹ Yesu watundile mu nganda, co waile, ngwe mwakele nakulinga, waile ku Munkinda wa Oliveta, co vandongisi vendi vamukavele.

⁴⁰ Omo wetele kuje wavalekele ngwendi, “Lombeleni kutewa mukakovela mu vyeseko.”

⁴¹ Co wavashondolokele kamandondo watsikamene, co walombelele,

⁴² ngwendi, “Tate, nga ushaka, nganja eyi ya kayando itunde kuli yange. Kesi ngwe mwaya cizango cange embwe, oloni cizango cove cilingiwe.”

⁴³ Co kangelo watundile mwilu washolokele kuli ikeye mukumutakamesa.

⁴⁴ Co omwo a tuyando twakama walombelele manene, co litukuta lyendi lyafwile ngwe maninga andwekelele asi.

⁴⁵ Omo wakatukile kutunda kukulombela, waile kuli vandongisi vendi wavawanene vanalala tulo, omwo vazeyele na vusiwa.

⁴⁶ Wendekele kuli vakevo ngwendi, “Omwo vika munalala? Indukeni mulombele, kutewa mukakovela mu vyeseko.”

Yesu vamukwata

⁴⁷ Omo Yesu wakele nakwendeka navo, mbunga ya vanu vetele, Yundasa umo wa vaje likumi na vavali watwamene kulutwe lwavo. Co washwenyele kuli Yesu nakumutsemba.

⁴⁸ Oloni Yesu wendekele kuli ikeye ngwendi, “Yundasa kuma wenda Muna Munu vungungu nakumutsemba ndi?”

⁴⁹ Omo vandongisi vaje vakele amo na Yesu vamwene vije vyalingiwile, vendekele ngwavo, “Mwene, tulwe na mikwale yetu ndi?”

⁵⁰ Co umo wavo wavatwile litwi lya ku cilyo lya ndungo ya Muka-kukombelela Wakama.

⁵¹ Oloni Yesu wendekele ngwendi, “Likele!” Co wakwatele litwi lya uje munalume nakuliilwisilako lalo.

⁵² Asinoni Yesu wendekele kuli vakulunu va vaka-kukombelela na vamyata va vaka-kunyunga Njuvo ya Shukulu Kalunga na vakulunu vaje vezile nakumukwata ngwendi, “Kuma munaija na mikwale na vimbweti ngwe nji lipwepwe ndi?

⁵³ Njakele neni mu Njuvo ya Shukulu Kalunga a litangwa na litangwa, kumwesekele kunjikwata. Oloni eyi ikeyo simbu yeni yakupanga, omo nzili ya lisusulungu ilinakushwana.”

Petulu avyana Yesu

⁵⁴ Vakwatele Yesu, co vamutwalele ku njuvo ya Muka-kukombelela Wakama, co Petulu wamukavele munima wakele alyala kamandondo.

⁵⁵ Vamo vavwekele tuhya mukati ka cipango vakele nakwota tuhya, co Petulu nendi watumbamene navo.

⁵⁶ Omo ngamba umo wamumbanda wamwene Petulu natumbama kuje ku tuhya, wamukengele shwii, co wendekele ngwendi, “Munalume ou lalo wakele amo na Yesu!”

⁵⁷ Oloni Petulu wavyanene ngwendi, “Ove munakazi, yange kunjimuzivuka!”

⁵⁸ Omo kwetile kasimbu kakandondo munalume weka lalo wamwene Petulu, co wendekele ngwendi, “Nove lalo uumo wavo!” Oloni Petulu wakumbulwile ngwendi, “Embwe, kesi yange!”

⁵⁹ Omo kwetile kasimbu lika, co munalume weka lalo wendekele na nzili ngwendi, “Ou munalume wakele amo na Yesu vene, omwo nendi lalo kaNgalileya!”

⁶⁰ Oloni Petulu wamukumbulwile ngwendi, “Ove munalum yange kunjizivuka evi ulinakwendeka!” Co aje vene, omo wakele nakwendeka, ndemba watambekele.

⁶¹ Co Mwene watengulukile wakengele kuli Petulu, co Petulu wanukile ngeci Mwene wamulekele ngwendi, “Simbu ndemba kanda atambeke vutsiki vuno vene, ukanjivyana visimbu vitatu ngwove kuunjizivuka.”

⁶² Co Petulu watuukile anja walilile manene.

Yesu vamushendumuna nakumupupa

⁶³ Vanalume vaje vanyungile Yesu vamushendumwine nakumupupa.

⁶⁴ Vamukutile nanga ku mesho, co vamwihwile ngwavo, “Tuleke! Iya nakupupu?”

⁶⁵ Co vendekele vyuma vyavingi vyakumushaula.

Vasompa Yesu ku mesho a munga

⁶⁶ Co omo kwakile, vakulunu, na vakulunu va vaka-kukombelela, na valongisi va majwi a Lishiko vakungulukile amo, co vanenele Yesu ku munga yavo.

⁶⁷ Co vamwihwile ngwavo, “Tuleke, yove Wakuvwavesa ndi?” Co wavakumbulwile ngwendi, “Nambe nga njimileka ngwange yange, kumwasa kunjikulaela,

⁶⁸ co lalo nga njimihula cihula cimo, kumwasa kunjikumbulula.

⁶⁹ Oloni kutunda lelo nakutwala kulutwe Muna Munu akatumbama ku livoko lya cilyo lya Njambi Muka-nzili yoshe.”

⁷⁰ Co voshe vamwihwile ngwavo, “Kuma yove u Muna Njambi ndi?” Ikeye wavakumbulwile ngwendi, “Omo mumunendeka mukemwo vene.”

⁷¹ Co vamukumbulwile ngwavo, “Vikajo lalo tucishakezekela vukaleo vweka? Yetu vavenya tunalizivila laja vije vyanendeka!”