Luka 21 - Livulu lya Shukulu Kalunga

Mulambu wa fwile

¹ Yesu wakengezekele, co wamwene vaka-kufuka valinakulambula vwana vwavo mu mbango ya mu Njuvo ya Shukulu Kalunga,

² co wamwene lalo fwile umo wa kautu walambwile tumo tumbongo tuvali twatundondo twa vunengu.

³ Co Yesu wendekele ngwendi, “Mwa vushunga njimileka ngwange ou fwile wa kautu nalambula vyavingi kutuvakana voshe.

⁴ Omwo veka vanakala nakulambula vyakusalao ku vufuko vwavo, oloni ikeye nalambula vyose vyanakele navyo ngwe ku vuutu vwendi, nalambula vyoshe vyanakele navyo vyakulikwasa navyo.”

Yesu endeka a kunyonga kwa Njuvo ya Shukulu Kalunga

⁵ Vandongisi vamo vakele nakwendeka a Njuvo ya Shukulu Kalunga, vuvwa vwayo na vuvwa vwa mamanya, na vwana vakele nakulambula kuli Njambi. Co Yesu wendekele ngendi,

⁶ “Vyoshe evi munamono, simbu ikaija omo vitozi veni vakatundisa limanya lyoshe lya njuvo mu mutambela walyo, co vinjuvo vyoshe vikasiwuka.”

Tuyando na mapakeso

⁷ Co vamwihwile ngwavo, “Mulongisi, mwaka uka evi vyoshe vikasholoka? Na cizivukiso mukajo tukazivuka naco ngwetu simbu inete ngeci vyuma vyoshe evi vilingiwe?”

⁸ Yesu wendekele ngwendi, “Nyanyameni kesi vamikwise. Vanu vavangi vakaija mu lizina lyange nakwendeka ngwavo, ‘Yange vene ikeye!’ Co lalo ngwavo, ‘Simbu inete!’ Oloni kesi mukavakavangeye.

⁹ Omo mukaziva vinzita nakulitengulukila, kesi mukajujeke, vyuma evi vinapande kusholoka, oloni kuvilumbununa ngeci kukotoka kwa kaye kunete.”

¹⁰ Co wendekele lalo ngwendi, “Lifuti limo likalwa nzita na lifuti likwavo, co vumwene vukalwisa vumwene vukwavo.

¹¹ Kukakala mandunduma akama, na njala ya lyangengela, na mishongo yakulitambwisa kwoshe-ikwoshe, kukakala vyuma vyakujujwisa nakukomokesa vikatunda mwilu.

¹² Omo simbu kanda vyuma evi visholoke, vakamikwata nakumiyandesa, vakamitwala ku masinangonge avo nakukamisompa nakumyaka mu tumenga, co vakamitwala kuli vimyene na kuli vaka-kushwana omwo lizina lyange.

¹³ Co eyi ikapwa simbu yaivwa kuli yeni yakwambulula Vin̄anda Vyavivwa.

¹⁴ Ngecivene, vyakeni mu vimbunge vyeni kesi muyongwele cimweja ngweni vati tukendeka,

¹⁵ omwo njikamyana majwi na mana ngeci vitozi veni kuvakasa kumivayesa nambe kuvyana vimukendeka.

¹⁶ Oloni visemi veni, na vandolome veni, na vavushoko vweni, na vasamba veni vakevo vakamisholola, co vamo akati keni vakavatsiya.

¹⁷ Voshe vakamizinda omwo lizina lyange.

¹⁸ Oloni nambe cin̄ambu cimo ca ku mutwe weni kucikazimbala.

¹⁹ Koleseni, co mukaamena myonyo yeni.

Yesu endeka a kunyonga kwa Yelusalema

²⁰ “Omo mukamona Yelusalema vanaizengeleka ku mbunga ya mashwalale, zivukeni ngweni kunyonga kwayo kuli muyehi.

²¹ Asinoni vaje vali mu Yundeya vakatewela ku malundu, co vaje vali mu nganda vanapande kutundamo, co vaje vali anja ya nganda ku mahya kesi vakovelemo.

²² Omwo aje akewo matangwa akunyanyamesa ngeci vyuma vyoshe vije vivendekele mu visoneka vipwe vya vushunga.

²³ Oloni luvinda ku vanakazi vaje vakakala na tufumba na vanakazi vaje vakajamwesa a simbu ije! Tuyando twakama tukaija a lifuti eli, na vukalu vwa Njambi vukaija ali vanu ava.

²⁴ Vamo vakavatsiya na mukwale, co vakwavo vakavatwala vunzinda ku mafuti eka, co vaka-kujeneka kukulaela vakalyatangela Yelusalema noo simbu yavo inete.

Kwija kwa Muna Munu

²⁵ “Co vyuma vyakukomokesa vikalingiwa ku litangwa na ku ngonde na ku vingongonosi. Miyati yoshe ya asi vakajeneka cinyangavili, vakaziva lyova lya kuluma kwa mema a kalunga nakukuma kwa mankimba ao.

²⁶ Vanu vakatsa kavela-vela omo vakavandamena vije vikasholoka ano asi oshe, omwo vyuma vyoshe vya nzili vyakala mwilu vikatunda mu myela yavyo.

²⁷ Asinoni Muna Munu akasholoka akaija a mashelwa na nzili yakama na vumpau.

²⁸ Omo vyuma evi vikashangumuka kulingiwa, katukeni mukenge kwilu, omwo kupatuka kweni kuli muyehi.”

Cilongesa ca muti wa mukuyu

²⁹ Asinoni Yesu wavatelelele cisimo eci ngwendi, “Singanyekeni a muti wa mukuyu na miti yeka yoshe.

³⁰ Omo mumona maputa ayo ashangumuka kujovelela, mwazivuka ngweni nyangao ili muyehi.

³¹ Mu cifwa eci vene, omo mukamona vyuma evi vilingiwa, mukazivuka ngeci Vumwene vwa Njambi vuli muyehi.

³² “Anukeni ngeci vyuma vyoshe evi vikalingiwa simbu kanda vanu voshe ava valinakuyoya ololo vatse.

³³ Lilu na asi vikaita, oloni majwi ange kuwakaiti.

Munapande kukengelela

³⁴ “Nyanyameni! Kesi mushote manene vimbunge vyeni akulya na akunwa na a vishoti vya mwonyo ou, kutewa Litangwa lije likamikasumuna ngwe muukamwashuka mweto.

³⁵ Omwo litangwa lije likaija ku vanu voshe vali ano asi.

³⁶ Nyanyameni nakulombela simbu yoshe ngeci mukakale na nzili yakuhyana vyoshe vije vikalingiwa nakwimana ku mesho a Muna Munu.”

³⁷ Yesu wakele nakulongesa mu Njuvo ya Shukulu Kalunga matangwa aje, co ku simbu ya cingwezi, watundilemo waile ku Munkinda wa Oliveta kukakalako vutsiki vwoshe.

³⁸ Co mutondo-tondo vanu voshe vakele nakuya ku Njuvo ya Shukulu Kalunga nakumutolilila.