Luka 20 - Livulu lya Shukulu Kalunga

Cihula ca moko ya Yesu

¹ A litangwa limo omo Yesu wakele nakulongesa mu Njuvo ya Shukulu Kalunga nakwambulula Vin̄anda Vyavivwa kuli vanu, co vakulunu va vaka-kukombelela na valongisi va majwi a Lishiko amo na vakulunu vezile

² co vendekele kuli ikeye ngwavo, “Tuleke, na moko yeyajo ulinakulinga nayo vyuma evi? Iyajo nakwana moko eyi?”

³ Yesu wavakumbulwile ngwendi, “Nange lalo njimihula cihula cimo. Njilekeni,

⁴ moko yambwitikile nayo Yowano yatundile kuli Njambi indi yatundile kuli munu?”

⁵ Co vashangumukile kulihozola akati kavo ngwavo, “Vatijo twendeka? Nga tukumbulula ngwetu, ‘Yatundile kuli Njambi,’ co akatwihula ngwendi, ‘Omwo vikajo kumwamukulaelele?’

⁶ Oloni nga twendeka ngwetu, ‘Yatundile kuli munu,’ Co eyi mbunga yoshe ilikuno vatwasha mamanya, omwo voshe vazivuka ngeci Yowano wapwile muka-kwimanena.”

⁷ Co vamukumbulwile ngwavo, “Kutuzivuka kuje kuyatundile.”

⁸ Yesu wendekele kuli vakevo ngwendi, “Nange kunjimileke eyi moko njilinakulinga nayo vyuma evi.”

Cisimo ca vaka-kupanga mu citungu ca mikolovozi ya vushuka vwa vinyu

⁹ Yesu watelelele vanu cisimo eci ngwendi, “Kwakele munalume umo wakele na citungu ca mikolovozi ya vushuka vwa vinyu, co wasezele cije citungu kuli vaka-kupanga, co waile vungenzi ku lifuti lyakulyala wakeshwaleleko simbu yakama.

¹⁰ Omo simbu yakuvuya vushuka yetele, watumine ndungo yendi kuli vaje vaka-kupanga mukutambulako litambelo lyendi ku vije vanateje. Oloni vaje vaka-kupanga vapupangele uje ndungo nakumwilwisa mavoko-voko.

¹¹ Co uje vavenya citungu watumineko lalo ndungo mukwavo, oloni vaje vaka-kupanga vamupupangele nakumulinga mwamuvi, co vamwilwisile mavoko-voko.

¹² Watumineko lalo ndungo wamucitatu, co vaje vaka-kupanga vamuvulumwine lalo, nakumumbila anja ya citungu.

¹³ Asinoni vavenya citungu wendekele ngwendi, ‘Vati njilinga? Njikatuma munange ou injazema, mwa vushunga vakamusingimika!’

¹⁴ Oloni omo vaka-kupanga vamumwene, co valyendekesele akati kavo ngwavo, ‘Ou ikeye mwana wa vavenya citungu. Ijeni tumutsiye, co tukafungulula vufuko vwendi!’

¹⁵ Ngecivene, vamumbilile anja ya citungu, co vamutsiile.” Yesu wavehwile ngwendi, “Vika vyakalinga uje vavenya citungu kuli vaje vaka-kupanga?

¹⁶ Akaija nakutsiya vaje vanu nakwana cije citungu ku vaka-kupanga veka.” Co omo vanu vazivile evi, vendekele ngwavo, “Mwa vushunga vene kesi ngoco embwe!”

¹⁷ Yesu wavakengele nakuvehula ngwendi, “Visoneka vyanunguluka vati? ‘Limanya lije livavyanene vaka-kutunga ngwe kulyesi na seo, likelyo ololo linapu lya seo yakama kutuvakana mamanya oshe.’

¹⁸ “Woshe uje akawila a limanya lije akapokozoka, oloni nga lije limanya likawila ali munu umo, likamutsena kupwa likungu.”

Cihula ca kufweta lisimu

¹⁹ Co valongisi va majwi a Lishiko na vakulunu va vaka-kukombelela vayongwele kukwata Yesu aje vene, omwo vazivukile ngwavo cisimo eci nacitela vakevo, oloni vatewele vanu.

²⁰ Ngecivene, vakengelelele simbu yaivwa. Co vaanene lizika-kanwa kuli vanu vamo valipwise ngwe vaka-vushunga, co vavatumine kuli Yesu ngeci vakamweseke na vihula ngeci vamwane ku moko na ku nzili ya Nguvulu wa vaLoma.

²¹ Co vaje vaka-kunenga vehwile Yesu ngwavo, “Mulongisi, twazivuka ngwetu yove ukendeka vushunga, co ukalongesa vushunga vwa cizango ca Njambi ali munu kujeneka kulipesa a viyongola vya vanu. Omwo kuwesi kukenga ali munu nambe wapwa wa vulemu nambe kesi wa vulemu.

²² Tuleke, kuma lishiko lyetu livindika kufweta lisimu kuli Sezale indi embwe?”

²³ Oloni Yesu wazivukile viyongola vyavo, co wendekele kuli vakevo ngwendi,

²⁴ “Njimweseni mbongo ya siliva. Cihanga ceya na lizina lyeya evi viliho?” Co vamukumbulwile ngwavo, “Vya Sezale!”

²⁵ Co Yesu wendekele kuli vakevo ngwendi, “Mwamuvwa, ngecivene, aneni kuli Sezale vije vinakundama kuli Sezale, co aneni kuli Njambi vije vinakundama kuli Njambi.”

²⁶ Co kuvasele kumuwanena mulonga ku majwi awa ku mesho a vanu, co voloke kuluu valikomokelele kukumbulula kwendi.

Cihula ca kusanguka ku vatsi

²⁷ Asinoni vaSanduki vamo, vaje vaka-kwendeka ngwavo vanu kuvakasanguka ku vatsi, vezile kuli Yesu nakumwihula ngwavo,

²⁸ “Mulongisi, Mosesa watusonekelele lishiko eli ngwendi, ‘Nga munalume atsa, co aseza munakazi wendi oloni kesi na vana, co ndolome yendi ambate uje fwile ngeci vakase kukala na vana va ali uje natsi.’

²⁹ Cooni kwakele vandolome vatanu na vavali, co uje wa mukulunu wambatele munakazi, co watsile kujeneka vana.

³⁰ Co uje wamucivali wambatele uje munakazi,

³¹ co na wamucitatu lalo. Cuma cimo cafwile ngacije kuli voshe vaje vatanu na vavali, voshe vatsile kujeneka vana.

³² Co akukotoka kwa vyoshe evi munakazi watsile.

³³ Ngecivene, a litangwa lije omo vatsi vakasanguka, uje munakazi akapwa weya akati ka vaje voshe vamwambatele vatanu na vavali?”

³⁴ Yesu wavakumbulwile ngwendi, “Vanu va simbu ino vakambata vanakazi, co vakavashombwesa lalo,

³⁵ oloni vanalume na vanakazi vaje vanafwila kusanguka ku vatsi nakuyoya mu simbu ije ikaija kulutwe kuvakambata nambe kushomboka.

³⁶ Vakevo vakafwa ngwe tungelo kuvakasa lalo kutsa. Vakevo vanapu vana va Njambi, omwo vanasanguka ku vatsi.

³⁷ Mosesa naana vukaleo ngeci vatsi vakasanguka. Mu muzimbu wa liputa lyakele nakwenya Mosesa alinakwendeka ali Shukulu Kalunga ngeci ikeye ‘Njambi ya Avilahama, Njambi ya Isake, na Njambi ya Yakomba.’

³⁸ Ikeye wapwa Njambi wa vaka-kuyoya, kesi wa vaka-kutsa embwe, omwo vyoshe vilinakuyoyela muli ikeye.”

³⁹ Co vamo valongisi va majwi a Lishiko vendekele ngwavo, “Mulongisi, unakumbulula mwamuvwa!”

⁴⁰ Omo kuvashukile lalo kwihula Yesu vihula vyeka.

Cihula ali Wakuvwavesa

⁴¹ Yesu wavehwile ngwendi, “Vatijo valinakwendeka ngwavo Wakuvwavesa akapwa wa ku naanga ya Ndaviti?

⁴² Omwo vavenya Ndaviti nendeka mu Livulu lya Myaso ngwendi, ‘Shukulu Kalunga wendekele kuli Shukulu yange ngwendi, tumbama ku livoko lyange lya cilyo,

⁴³ noo njikafungulula vitozi vove nakuvapwisa ngwe kacitumbamo ka ku myanja yove.’

⁴⁴ “Ndaviti ikeye vavenya wamutumbwile ngwendi ‘Shukulu’, ngecivene, vatijo Wakuvwavesa apwa mutekulwila wa Ndaviti?”

Yesu anangula ngeci vanyanyame kuli valongisi va majwi a Lishiko

⁴⁵ Omo mbunga ya vanu vakele nakumutolilila, co Yesu wendekele kuli vandongisi vendi ngwendi,

⁴⁶ “Nyanyameni kuli valongisi va majwi a Lishiko, vaje vazema kwenda na vikoveyo vyavo vyavilaja nakuvakandelela na kasingimiko mu mitambela yakulandesela nakwangula vitumbamo vyavivwa mu masinangonge na myela ya vanu va vulemu ku viwano,

⁴⁷ vakevo vakakwisi vifwile nakuvevila vinjuvo vyavo, co vafwika vilinga vyavo na malombelo amalaja! Co kunyanyamesa kwavo kukapwa kwakama manene!”