Luka 2 - Livulu lya Shukulu Kalunga

Kusemuka kwa Yesu

¹ Co capwile ngeci a matangwa aje kuli Sezale Angustu kwatundile lishiko ngeci vasoneke vanu voshe mu Vumwene vwa Loma.

² Kusoneka oku kwakulivanga kwalingiwile omo Kilinyu wapwile nguvulu wa Silya.

³ Ngecivene, vanu voshe vaile mukulisonekesa, munu na munu waile ku nganda yendi.

⁴ Na Yosefa lalo watundile ku nganda ya Nazaleta mu Ngalileya, waile ku nganda ya Mbetelehema mu Yundeya kwimbo lya Ndaviti. Yosefa waile kuje omwo wapwile wa ku muyati wa Ndaviti.

⁵ Waile mukulisonekesa amo na Maliya uje yaulilile. Maliya te nakulisa laja,

⁶ co simbu ije vakele mu Mbetelehema, matangwa endi akukita mwana etele.

⁷ Co wakitile munendi wa ntwatwa wa munalume, wamuzengelele a vinanga, wamulangekele mu cikasa cakulila vingombe, omwo kukwakele mulili mu njuvo yakutulila vangenzi.

Tunyungi na tungelo

⁸ Co ku lifuti lije kwakele tunyungi mu cana, vakele nakunyunga vimanga vavo vutsiki.

⁹ Kangelo ka Shukulu Kalunga washolokele kuli vakevo, co vumpau vwa Mwene vwatwile ceke akati kavo. Vazivile lyova lyakama manene,

¹⁰ oloni kangelo wendekele kuli vakevo ngwendi, “Kesi muzive lyova! Omwo njinanena muzimbu wauvwa kuli yeni, uje ukasholola kujolela kwakama kuli vanu voshe.

¹¹ Vutsiki vuno vene mu nganda ya Ndaviti munasemuka Muyoyesi weni, ikeye Kilistu Mwene!

¹² Co eci cikapwa cizivukiso ceni, mukawana mbututu vanamuzengela a vinanga vanamulangeka mu cikasa cakulila vingombe.”

¹³ Vwasi-vwasi kwasholokele mbunga yakama ya tungelo va mwilu vemanene amo na kangelo, vembile nakushangazala Njambi ngwavo,

¹⁴ “Vumpau kuli Njambi wa akamwa ya akamwa, kwoloka kukale ano asi kuli vanu vaje vamuvwasa!”

¹⁵ Omo tungelo velukile mwilu kutunda kuli tunyungi, co tunyungi valyendekesele umo na mukwavo ngwavo, “Tuyeni oni ku Mbetelehema ngeci tukamone eci cuma cinalingiwako, cije canatusholwela Shukulu Kalunga.”

¹⁶ Ngecivene, vaile vwasi-vwasi vakawanene Maliya na Yosefa, co vamwene mbututu vanamulangeka mu cikasa cakulila vingombe.

¹⁷ Omo tunyungi vamumwene, vambulwile majwi aje avalekele kangelo ali mbututu.

¹⁸ Co voshe vaje vawazivile valikomokelele a vyuma vije vivendekele tunyungi.

¹⁹ Oloni Maliya wanyungile majwi oshe aje nakuwayongola mu mbunge yendi.

²⁰ Co tunyungi velukile nakulemesa nakushangazala Njambi a vyuma vyoshe vazivile, na vije vamwene, vyalingiwile ngwe vene muje mwavalekele kangelo.

Yesu vamuluka lizina

²¹ Omo kuneti matangwa atanu na atatu, omo simbu yetele yakutuula mbututu, co vamulukile lizina lyendi Yesu, lizina lije lyamulukile kangelo simbu kanda awile mwimo lya vaina.

Visemi vakundika Yesu mu Njuvo ya Shukulu Kalunga

²² Co omo matangwa apwilemo akulijelesa, Yosefa na Maliya valingile ngwe ku Lishiko lya Mosesa. Ngecivene, vatwalele mwanike ku Yelusalema ngeci vakamwane kuli Shukulu Kalunga,

²³ ngwe muvanasoneka mu Lishiko lya Shukulu Kalunga ngwavo, “Mwana woshe wa ntwatwa wa munalume vakamwana kuli Shukulu Kalunga.”

²⁴ Vakevo lalo vaile mukukombelela n̄ombelo ya tutela vavali nambe vana va mayembe vavali ngwe muvemika mu lishiko lya Shukulu Kalunga.

²⁵ Cooni kwakele munalume umo mu Yelusalema lizina lyendi Simyoni. Wapwile muka-vushunga muka-kukomoka Njambi, wavandamenene kupatuka kwa Isalele. Munzinzime Wakujela wakele ali ikeye,

²⁶ wamulekele ngwendi kakatsi kuvanga namono Wakuvwavesa uje yakulaesele Shukulu Kalunga.

²⁷ Akumutwamenena Munzinzime Wakujela, Simyoni wakovelele mu Njuvo ya Shukulu Kalunga. Omo visemi vanenele mwanike Yesu mu Njuvo ya Shukulu Kalunga vamulinge ngwe ku Lishiko vemikile,

²⁸ co Simyoni watambwile mwanike mu mavoko endi, wakandelelele kuli Njambi ngwendi,

²⁹ “Ololo Shukulu Kalunga unanyungu cikulaeso cove, ololo tava ngeci ngamba yove atse mu kwoloka.

³⁰ Omwo mesho ange anamono kwamena kwove,

³¹ kuje kuunavwaesa ku mesho a vanu voshe,

³² ceke cakujombolola cizango cove kuli ava kesi vaYunda, nakunena vumpau kuli vanu vove va Isalele.”

³³ Ishe na vaina valikomokelele a vyuma vije vyendekele Simyoni ali Yesu.

³⁴ Co Simyoni wavavezikisile wendekele kuli Maliya ngwendi, “Mwanike ou vamwangwile kuli Njambi mukunyongesa nakwamena vavangi mu Isalele. Akapwa cizivukiso cakutunda kuli Njambi cije vanu vavangi vakendeka nakucilwisa,

³⁵ nakujombolola viyongola vyavo vyakushweka. Co vusiwa vukativa mbunge yove ngwe mukwale wakuvambuka.”

³⁶ Co kwakele umo Ana, muka-kwimanena wa munakazi, muna Fanwele wa ku muyati wa Ashele. Ikeye wapwile kakulukazi. Washombokele a myaka itanu na ivali,

³⁷ cooni wapwile fwile a myaka makumi atanu na atatu na myaka iwana. Ikeye katundile mu Njuvo ya Shukulu Kalunga, mutanya na vutsiki wakele nakulemesa Njambi, nakulikela kulya nakulombela.

³⁸ A simbu ije vene wetele, co wakandelelele kuli Njambi, wendekele vya uje mwana kuli voshe vaje vavandamenene Njambi mukupatula Yelusalema.

Veluka ku Nazaleta

³⁹ Omo Yosefa na Maliya vamanesele vyuma vyoshe ngwe ku lishiko lya Shukulu Kalunga, velukile kwimbo lyavo ku Nazaleta mu Ngalileya.

⁴⁰ Co mwana wakulile wakele na nzili. Washulile na mana, co vivezikiso vya Njambi vyakele ali ikeye.

Mwanike Yesu ali mu Njuvo ya Shukulu Kalunga

⁴¹ A mwaka na mwaka visemi va Yesu vakele nakuya ku Yelusalema ku Ciwano ca Pasovala.

⁴² Omo Yesu wakele na myaka likumi na ivali, co vaile nendi ku Yelusalema ku cilika ca ciwano ngwe simbu yoshe.

⁴³ Omo matangwa aje a ciwano ahwile, co vashangumukile kuya kwimbo, oloni mwanike Yesu wasalele munima mu Yelusalema. Visemi vendi kuvazivukile,

⁴⁴ vayongwele ngwavo amo ali a cendo, ngecivene, vendele vungenzi vwa litangwa limo, co vamukengezekele akati ka vavushoko vwavo na vasamba vavo,

⁴⁵ oloni kuvamuwanene. Ngecivene, velukile lalo ku Yelusalema nakumushakezeka.

⁴⁶ Co a litangwa lyamucitatu vamuwanene mu Njuvo ya Shukulu Kalunga, natumbama akati ka valongisi va vaYunda, nakuvatolilila nakuvehozola vihula.

⁴⁷ Co voshe vaje vamutolililile valikomokelele mana endi nakukumbulula kwendi.

⁴⁸ Visemi vendi omo vamumwene valikomokelele, co vaina vendekele kuli ikeye ngwavo, “Munange, vika unatulingilamo? Kenga, isho nange tunakushakezeka manene ngeci tukuwane.”

⁴⁹ Co ikeye wavakumbulwile ngwendi, “Vika munanjishakezekela? Kuma kumwazivukile ngweni njinapande kukala mu Njuvo ya Tate ndi?”

⁵⁰ Oloni vakevo kuvazivukile kulumbunuka kwakukumbulula kwendi.

⁵¹ Yesu waile navo ku Nazaleta, co kuje wakavononokele. Vaina vanyungile vyuma vyoshe evi mu mbunge yavo.

⁵² Co Yesu wakulile mu muvila, na mu mana, wawanene kutetela kuli Njambi na kuli vanu.