Luka 19 - Livulu lya Shukulu Kalunga

Yesu na Sangeo

¹ Yesu wakovelele mu Yeliko, co watuvakanene.

² Kuje kwakele mukulunu umo muka-kutambula lisimu lizina lyendi Sangeo, uje wapwile muka-kufuka.

³ Ikeye washakele kumona Yesu, oloni kasele kumumona omwo Sangeo wapwile munalume wamwihi, co lalo omwo mbunga yaingi.

⁴ Ngecivene, washatukilike kulutwe lwa mbunga, co walondele ku muti wa linongo ngeci amone Yesu uje wetilile mu ngila ije.

⁵ Omo Yesu wetele a mutambela uje, wakengele kwilu, co wendekele kuli Sangeo ngwendi, “Shuluka vwasi Sangeo, omwo litangwa lyalelo njikakala ku njuvo yove.”

⁶ Co Sangeo washulukile vwasi nakutambula Yesu nakujolela kwakama.

⁷ Vanu voshe vaje vacimwene vangungutile ngwavo, “Munalume ou nai ngwe mungenzi ku njuvo ya muka-vuvi!”

⁸ Co Sangeo wemanene nakwendeka kuli Mwene ngwendi, “Tolilila Shukulu, njikana litambelo lya vufuko vwange kuli tuutu, nga njatambwile cimo kuli umo mu ngila ya makuli, co njikamufweta visimbu viwana.”

⁹ Yesu wendekele kuli ikeye ngwendi, “Kwovoka kunete ku njuvo ino ku litangwa lyalelo, omwo munalume ou ikeye lalo muna Avilahama.

¹⁰ Muna Munu wezile nakushakezeka nakwovola vaka-kuzimbala.”

Cisimo ca vimbongo vya ngolinde

¹¹ Omo vanu vakele nakutolilila ku vyuma evi, Yesu wavatelele cisimo. Ikeye wakele kuyehi na Yelusalema, co vayongwele ngeci Vumwene vwa Njambi ololo vusholoka.

¹² Co wendekele ngwendi, “Kwakele munu wa vulemu uje waile ku lifuti lyakulyala ngeci vakamupwise mwene, asinoni eluke kwimbo lyendi.

¹³ Omo kanda aye, co wasanene vangamba vendi likumi, co wavanene umo na umo mbongo ya ngolinde nakuvaleka ngwendi, ‘Moneni vika mukawanao a vyuma evi a simbu ije omo yange njinai.’

¹⁴ Oloni vanu va mu lifuti lyendi vamuzindile manene, co vatumine miluwa munima yendi ngwavo, ‘Ou munalume kutumushaka apwe mwene yetu embwe.’

¹⁵ “Co uje munalume vamupwisile mwene, co welukile. Aje vene washikile ngeci vamusanene vaje vangamba vaanene vimbongo, ngeci azivuke vingai vivanawanenao.

¹⁶ Co wakulivanga wezile wendekele ngwendi, ‘Shukulu, njinawanenao likumi lya vimbongo vya ngolinde a mbongo imolika ije mwanjanene.’

¹⁷ Co wendekele kuli ikeye ngwendi, ‘Unalingi mwamuvwa manene, u ngamba wamuvwa! Omwo walongwele mu vyuma vyavindondo, ngecivene, njikakupwisa muka-kutwamenena vinganda likumi.’

¹⁸ Co wamucivali wezile wendekele ngwendi, ‘Shukulu, njinawanenao vimbongo vya ngolinde vitanu a mbongo imolika ije mwanjanene.’

¹⁹ Co kuli ou lalo wendekele ngwendi, ‘Njikakupwisa muka-kutwamenena vinganda vitanu.’

²⁰ Co ngamba mukwavo wezile wendekele ngwendi, ‘Shukulu, mbongo yove eyi, njaitulikile a lilesu.

²¹ Njakuzivilile lyova, omwo wapwa u munu wamukalu. Ukanono cije kesi cove nakuteja kuje kuwakuvile.’

²² Co Shukulu yendi wamulekele ngwendi, ‘Ove ngamba wamuvi! Njikakuhisa na majwi akutunda mu kanwa kove! Ngwange wanjizivukile ngwove yange nji munu wa mukalu, njikanono cije kesi cange, nakuteja cije kunjakuvile.

²³ Omwo vika kuwaanene oyo mbongo yange kuli vaka-kusekasana? Ngeci yange omo njinaija nga njinawana mbongo yange amo nakakondweso kayo.’

²⁴ Co ikeye wendekele kuli vaje vemaneneko ngwendi, ‘Munyekeni oyo mbongo ya ngolinde muyane kuli ngamba uje ali na vimbongo likumi.’

²⁵ Oloni vakevo vendekele kuli ikeye ngwavo, ‘Shukulu, ali laja na vimbongo likumi!’

²⁶ Ikeye wavakumbulwile ngwendi, ‘Mwa vushunga njimileka ngwange, uje alinavyo vakamuwezelelako, oloni uje kesi navyo, nameme vene vije vyavindondo vyalinavyo vakamutambulavyo.

²⁷ Ngecivene, ngwe ava vitozi vange vaje kuvashaka ngeci yange njipwe mwene yavo, vaneneni kuno nakuvatsiila ku mesho ange!’ ”

Yesu akovela na vumpau mu Yelusalema

²⁸ Omo Yesu wamanesele kwendeka evi, co waile kulutwe lwavo ku Yelusalema.

²⁹ Omo wetele kuyehi na Mbetefanje na Mbetaniya ku Munkinda wa Oliveta, co watumine vandongisi vavali kulutwe,

³⁰ wavashikile ngwendi, “Yeni ku limbo lije lili kulutwe lweni, omo mukovelamo mukawana muna cimulu vanamukutu, uje kanda alondeo munu. Co muzituleni munjineneleye.

³¹ Nga munu umo amihula ngwendi vika mumuzitwila, mulekeni ngweni Shukulu amushaka.”

³² Co vaje vavatumine vaile vakawanene vyuma vyoshe ngwe muje mwavalekele Yesu.

³³ Co omo vakele nakuzitula uje muna cimulu, co vavenyaye wavehwile ngwendi, “Vika mumuzitwila owo muna cimulu?”

³⁴ Co vakumbulwile vendekele ngwavo, “Shukulu alinakumushaka,”

³⁵ co vatwalele uje muna cimulu kuli Yesu. Co vajalele vikoveyo vyavo a mwongo wa uje muna cimulu, co vakwasele Yesu ngeci alondeo.

³⁶ Omo walondeleo, co vanu vajalele vikoveyo vyavo mu ngila.

³⁷ Omo Yesu wetele kuyehi na Yelusalema, ku mutambela kuje ngila yashelumukilile ku Munkinda wa Oliveta, co mbunga yakama ya vandongisi vendi vashangumukile kukandelela kuli Njambi nakumushangala mu majwi akutambeka omwo a vyuma vyoshe vyakama vije vivamwene

³⁸ ngwavo, “Njambi avezikise mwene ou aija mu lizina lya Shukulu Kalunga! Kwoloka kukale mwilu na vumpau kuli Njambi!”

³⁹ Co vaFaliseo vamo vaje vakele mu mbunga vendekele kuli Yesu ngwavo, “Mulongisi, leka vandongisi vove voloke kuluu!”

⁴⁰ Yesu wavakumbulwile ngwendi, “Mwa vushunga njimileka ngwange, nga ava voloka kuluu, co mamanya awa akatambeka.”

Yesu alilila Yelusalema

⁴¹ Yesu wetele kuyehi na nganda, co omo waimwene, walilile manene

⁴² wendekele ngwendi, “Nga wazivukile lika lelo ngwove vika vishakiwa ngeci kukale kwoloka! Oloni ololo kuwasa kucimona!

⁴³ Simbu ikaija omo vitozi vove vakakuzengeleka mu cimpaka, nakukwaka mukati kavo, nakukushetwila mukati ku mitambela yoshe noku-noku.

⁴⁴ Co vakevo vakakunyongesa njwa amo na vanu vove vaje vali mu vivumbe vyove, kuvakaseza limanya limo mu mutambela walyo, omwo yove kuwazivukile simbu omo Njambi wezile nakukwovola!”

Yesu aya ku Njuvo ya Shukulu Kalunga

⁴⁵ Yesu wakovelele mu Njuvo ya Shukulu Kalunga, co washangumukile kushekamo voshe vaje vakele nakulanda nakulandulwilamo,

⁴⁶ wendekele kuli vakevo ngwendi, “Vanasoneka mu Visoneka ngwavo Njambi wendekele ngwendi, ‘Njuvo yange vakaitumbula Njuvo yakulombelela.’ Oloni yeni munaipwisa mwela mwakuvanda vezi!”

⁴⁷ Yesu wakele nakulongesa mu Njuvo ya Shukulu Kalunga a litangwa na litangwa. Co vakulunu va vaka-kukombelela na valongisi va majwi a Lishiko na vantwama va vanu vashakele kumutsiya,

⁴⁸ oloni kuvasele kuwana ngila muka vasa kucilinga, omwo vanu voshe vakele nakumutolilila ngeci kesi valojeo nambe lijwi limo.