Luka 17 - Livulu lya Shukulu Kalunga

Vuvi

¹ Yesu wendekele kuli vandongisi vendi ngwendi, “Vyuma vije vyasa kukovelesa vanu mu vuvi vyasa kulingiwa, oloni tuyando twendi uje avinena!

² Mwamuvwa kuli ikeye nga vamukutiiya limanya lyakama lyakulolela vunga mu mukoshi wendi nakumumbila mu mema a kalunga kutuvakana atanganese mwanike umo wamundondo kulinga vuvi!

³ Nyanyameni ku vije mulinga. “Nga mukweni alinga vuvi munangule, co nga alitavela, musambese.

⁴ Co nga akuvulumwina lutanu na luvali mu litangwa limo, co lalo aija kuli yove lutanu na luvali nakulitavela, musambese.”

Kukulaela

⁵ Co miluwa vendekele kuli Mwene ngwavo, “Wezelela kukulaela kwetu.”

⁶ Mwene wavakumbulwile ngwendi, “Nga mwakele nakukulaela kwakama ngwe mbuto ya musalata, ngwe mwasa kwendeka ku muti ou wa mukuyu ngweni, ‘Tukuka ukashimbame mu mema a kalunga!’ Co ukewo umyononoka.

Vipangi vya ngamba

⁷ “ Nga umo weni ali na ngamba muka-kulima nambe kunyunga vimanga, co omo aija kutunda ku mahya, kuma mukendeka kuli ikeye ngweni, ‘Zambulako wakulye vilya vyove ndi?’

⁸ Mwa vushunga kumwesi kulinga ngacije! Oloni mukendeka ngweni, ‘Njivwaesele vyakulya, lizitike cikoveyo cove unjipangele noo njinali, njinanu, omo njinamanesa cooni nove ulye nakunwa!’

⁹ Uje ngamba kuvesi kumukandelela akwononoka mashiko a shukulu yendi, indi vakalingimo?

¹⁰ Cinapu mumo neni lalo, omo munalingi vyoshe vije vamilekele kuvilinga, endekeni ngweni, ‘Tu vangamba vangoco, tunapanga vipangi vyetu!’ ”

Yesu ajelesa vanalume vaka-mbumba likumi

¹¹ Omo Yesu wakele nakuya ku Yelusalema, wetile mukati ka Samaliya na Ngalileya.

¹² Omo wakovelele mu limbo limo, waliwanene na vanalume vaka-mbumba likumi. Vemanene kulyala,

¹³ co vatambekele ngwavo, “Yesu! Shukulu! Tuzivileko mema ku mbunge!”

¹⁴ Yesu wavamwene wendekele kuli vakevo ngwendi, “Yeni kuli vaka-kukombelela ngeci vakamiilule.” Omo vakele nakuya, co vajelele.

¹⁵ Umo wavo omo wamwene ngeci nenduka, co welukile washangazale Njambi na lijwi lyakama.

¹⁶ Co wavulumanene ku myanja ya Yesu nakumukandelela. Ikeye wapwile kaSamaliya.

¹⁷ Yesu wehwile ngwendi, “Kuma kuvapwile likumi vaje njinakangwisile ndi? Cooni vakwavo vatanu na vawana vali kuli?

¹⁸ Omo vika ou lika kesi kaYunda neluka nakukandelela kuli Njambi?”

¹⁹ Yesu wendekele kuli ikeye ngwendi, “Katuka uye, kukulaela kwove kunakukangwisa.”

Kwija kwa Vumwene vwa Njambi

²⁰ VaFaliseo vamo vehwile Yesu ngwavo, “Simbu ikajo Vumwene vwa Njambi vukaija?” Wavakumbulwile ngwendi, “Vumwene vwa Njambi kuvwasa kwija mu ngila ije mwasa kuvumona embwe.

²¹ Naumo wai akendeka ngwendi, ‘Kengeni, vuno vulikuno!’ Nambe, ‘Kengeni, vuje vulikuje!’ Omwo Vumwene vwa Njambi muli navwo akati keni.”

²² Asinoni Yesu wendekele kuli vandongisi vendi ngwendi, “Simbu ikaija omo mukashaka kumona litangwa limo lya Muna Munu, oloni kumukasa kulimona.

²³ Co kukakala vamo vakendeka kuli yeni ngwavo, ‘Kengeni kuje!’ Nambe ngwavo, ‘Kengeni kuno!’ Kesi mukayeko, ngeci mukacimone.

²⁴ Ngwe omo muhyato ukahyatula mwilu, co vaumona utunda ku mutambela umo wa lilu uya ku mutambela ukwavo wa lilu, ngeci lalo Muna Munu mwakafwa a litangwa lyendi.

²⁵ Oloni akulivanga napande kuyanda manene nakumuyengula kuli vanu va matangwa ano.

²⁶ Co ngwe mucafwile a matangwa a Nowa, mukemwo lalo mucikafwa na ku matangwa a Muna Munu.

²⁷ Voshe valile vanwile, vashombwesele na kulyambatela, noo ku litangwa lije Nowa wakovelele mu vwato, co livazi lyezile nakuvanyongesa voshe.

²⁸ Mucikafwa lalo ngwe mucafwile ku matangwa a Lote. Voshe valile vanwile valandele nakulandulula, vakunine nakutunga.

²⁹ A litangwa lije Lote watundile mu Sondoma, tuhya na mamanya akunyongolokota vyanyokele ngwe nyonzi yakutunda mwilu, co vyavanyongesele voshe.

³⁰ Mukemwo lalo mucikafwa a litangwa lyakasholoka Muna Munu.

³¹ “A litangwa lije, munalume uje ali akamwa ya njuvo yendi, kesi akashulukeo nakwambata vije vili mu njuvo yendi, na uje lalo ali mu lihya lyendi kesi ekeluke ku njuvo.

³² Anukeni munakazi wa Lote!

³³ Munu woshe ashaka kunyunga mwonyo wendi vavenya auzimbalesa, oloni uje azimbalesa mwonyo wendi akauwana.

³⁴ Njimileka ngwange, a vutsiki vuje, vanu vavali vakalala a vulili vumo, umo vakaya nendi, co mukwavo vakamuseza.

³⁵ Vanakazi vavali vakatwa vunga mu n̄unju imo, umo vakaya nendi, co mukwavo vakamuseza.

³⁶ Vanalume vavali vakapanga mu lihya, umo vakaya nendi, co mukwavo vakamuseza.”

³⁷ Co vandongisi vamwihwile ngwavo, “Kulijo Mwene?” Yesu wavakumbulwile ngwendi, “Kwoshe kuje kuli civimbi kukekwo kukalikungulwila makuvi.”