Luka 16 - Livulu lya Shukulu Kalunga

Cisimo ca katumwa wakunyanyama

¹ Yesu wendekele kuli vandongisi vendi ngwendi, “Kwakele umo muka-kufuka wakele na katumwa uje wakengele vufuko vwendi. Co uje katumwa vamuwanene na mulonga wakushandola vimbongo vya shukulu yendi,

² co shukulu yendi wamusanene nakumwihula ngwendi, ‘Vika evi njinazivi ali yove? Njane vukaleo vwa vyuma vyoshe vya vufuko vwange, omwo kuukapu lalo katumwa kange.’

³ Cooni uje katumwa waliyongwele mu mbunge yendi ngwendi, ‘Ou shukulu yange anjitundisa ku vipangi vyange. Vationi njilinga? Yange kunjesi na nzili yakulima, co lalo njikazivi shwamwa yakulomba-lomba.

⁴ Ololo njinanuka vati njinapande kulinga! Omo nga vipangi vyange vinahu, co njikakala na vasamba vaje vakanjitambula mwamuvwa mu vinjuvo vyavo.’

⁵ “Ngecivene, wasanene vanu voshe vaje vakele na makongo a shukulu yendi. Co kuli uje wakulivanga wamwihwile ngwendi, ‘Vungai watambwile kuli shukulu yange?’

⁶ Wamukumbulwile ngwendi, ‘Viseteko 100 vya mazi a olive.’ Co uje katumwa wamukumbulwile ngwendi, ‘Livulu lyove eli lije limwesa makongo ove, tumbama asi sonekamo viseteko makumi atanu.’

⁷ Co wehwile mukwavo ngwendi, ‘Yove lalo watambwile vungai?’ Wamukumbulwile ngwendi, ‘Mitonga ya tiliku yakupwa 1,000!’ Co uje katumwa wamulekele ngwendi, ‘Livulu lyove eli lije limwesa makongo ove, tumbama asi sonekamo mitonga yakupwa 800.’

⁸ Co shukulu yendi washangalele uje katumwa wakujeneka kulongwa, omwo walingile cuma ca mana, omwo vanu va ano a kaye vali na mana ku vyuma vyavo kutuvakana vanu vaje vali mu ceke.”

⁹ Yesu watwaleleo kwendeka ngwendi, “Njimileka ngwange, kwateni vusamba na vufuko vwa ano a kaye, ngeci omo vukahwa, co vakamitambula mwamuvwa mu limbo lije lya myaka yoshe.

¹⁰ Woshe alongwa mu vyuma vyavindondo akapwa wa kulongwa mu vyuma vyakama lalo, uje kapu wa kulongwa mu vyuma vyavindondo kasa kupwa wa kulongwa mu vyuma vyakama.

¹¹ Ngecivene, nga kuwapwile wa kulongwa na vufuko vwa ano a kaye, vati vasa kukukulaela na vufuko vwa vushunga?

¹² Nga kuupu wa kulongwa ku vyuma vya munu weka, co iya akakwana vije vyakukundama?

¹³ “Kukwesi ngamba asa kupangela vashukulu vavali, kuvanga azindeo umo nakuzemao mukwavo, nambe apwa wa kulongwa ku umo nakushaula mukwavo. Co kuwasa kupangela Njambi nakupangela vimbongo.”

Vyendeka vimo vya Yesu

¹⁴ Omo vaFaliseo vazivile vyoshe evi, co vakevo vashendumwine Yesu, omwo vazemene vimbongo.

¹⁵ Yesu wendekele kuli vakevo ngwendi, “Yeni mukalimwesa kupwa muvaka-vushunga ku mesho a vanu, oloni Njambi azivuka vimbunge vyeni. Omwo vije vayongola vanu ngwavo vinapu vya seo, oloni ku mesho a Njambi vinapu vyangoco.

¹⁶ “Lishiko lya Mosesa na visoneka vya vaka-kwimanena vyakele na nzili kweta a simbu ya Yowano Muka-kumbwitika, oloni tunde a simbu ije Vin̄anda Vyavivwa vya Vumwene vwa Njambi valinakuvyambulula, co munu na munu alinakulicikinina ngeci akakovelamo.

¹⁷ Oloni cinapu cacasi lilu na asi kuhwa kutuvakana lijwi limo lyalindondo ku Mashiko awa ngeci valitundise.

¹⁸ “Munalume woshe akondola munakazi wendi nakwambata weka nalingi vupangala, co munalume uje ambata munakazi uje ivanakondola kuli munalume wendi nalingi vupangala.

Munalume wakufuka na Lazalu

¹⁹ “Kwakele munalume umo muka-kufuka wazalele vuzalo vwavuvwa vwa ndando yakama, co walile vyakutovala a litangwa na litangwa.

²⁰ Co kwakele lalo munalume umo kautu lizina lyendi Lazalu, wakele na vimbandu, vakele nakumunena-nena ku cikolo ca uje fuki

²¹ omwo washakele kulya vungululu vuje vwawile ku mesa ya uje fuki. Nameme tutali vakele nakulyasa a vimbandu vyendi.

²² Co uje kautu watsile, co tungelo vamutwalele ku mati ya Avilahama ku ciwano mwilu. Co lalo uje fuki nendi watsile vamutsindile.

²³ Ikeye wakele mu tuyando twakama mu Mbulu ya Tuhya, co wakengele kwilu, wamwene Avilahama ali kulyala, na Lazalu ali ku mati yendi.

²⁴ Ngecivene, watambekele ngwendi, ‘Tate Avilahama! Njizivileko mema ku mbunge, tuma Lazalu ambwitike shongo ya mulavo wendi mu mema akunjitonwese a ndaka yange, omwo yange njili mu tuyando twakama mu tuhya tuno!’

²⁵ Oloni Avilahama wamukumbulwile ngwendi, ‘Anuka, munange, a simbu yakuyoya kwove vakwanene vyuma vyoshe vyavivwa, oloni Lazalu watambwile vyuma vyoshe vyavivi. Ngecivene, ololo alinakujolela kuno, oloni yove uli mu tuyando twakama manene.

²⁶ Co kuwezelela ku vyoshe evi, akati ketu nove ali cimbongo cakama, ngeci voshe vali kuno kuvasa kwija okwo kuli yove, nambe wakutunda okwo kuli yove kasa kwija kuno kuli yetu!’

²⁷ Co uje fuki wamukumbulwile ngwendi, ‘Mwamuvwa tate Avilahama, njikulomba ngwange tuma Lazalu ku njuvo ya tate,

²⁸ kuje kuli vandolome vange vatanu. Aye akavanangule kutewa vaija kuno ku mwela wa tuyando twakama ngacije.’

²⁹ Avilahama wamukumbulwile ngwendi, ‘Vandolome vove vali na Mosesa na vaka-kwimanena vasa kuvanangula, co vandolome vove vanapande kutolilila vije vavaleka.’

³⁰ Co uje fuki wakumbulwile ngwendi, ‘Embwe, tate Avilahama! Oloni nga umo asanguka ku vatsi nga aya kuli vakevo, co vakevo vakatenguluka kutunda ku vivi vyavo.’

³¹ Oloni Avilahama wendekele ngwendi, ‘Nga kuvatolilila kuli Mosesa na kuli vaka-kwimanena, kuvasa kutolilila nambe nga umo asanguka ku vatsi.’ ”