Luka 15 - Livulu lya Shukulu Kalunga

Cisimo ca manga wakuzimbala

¹ Litangwa limo omo vaka-kutambula lisimu na vaka-vuvi vezile kuli Yesu nakumutolilila,

² vaFaliseo na valongisi va majwi a Lishiko vangungutile ngwavo, “Ou munalume akatambula vaka-vuvi nakulya navo.”

³ Ngecivene, Yesu wavatelelele cisimo eci ngwendi,

⁴ “Nga umo akati keni ali na vimanga 100, co azimbalesao umo, vati alinga? Aseza vaje vimanga makumi atanu na awana na vimanga vatanu na vawana kuvulilo nakuya nakushakezeka uje nazimbala, noo namuwana.

⁵ Co omo namuwana, amwaka a vitsili vyendi nakujolela,

⁶ nakumutwala kwimbo. Co asana vasamba vendi na vandambo vendi amo avaleka ngwendi, ‘Njinavwaelela akuwana manga yange uje wazimbalele. Tujoleleni!’

⁷ Njimileka ngwange, mu ngila eyi vene kukakala kujolela mwilu omo muka-vuvi umo atenguluka kutuvakana vaka-vushunga makumi atanu na awana na vatanu na vawana vaje kuvashaka kutenguluka.

Cisimo ca mbongo yakuzimbala

⁸ “Nga munakazi ali na vimbongo vya Siliva likumi, co azimbalesao imo, vati alinga? Ashwameka ndeya nakukomba mu njuvo yendi nakuyisetela kwoshe-ikwoshe noo naiwana.

⁹ Omo naiwana, asana vasamba vendi na vandambo vendi amo avaleka ngwendi, ‘Njinavwaelela akuwana mbongo yange njazimbalesele. Tujoleleni!’

¹⁰ Mu ngila eyi vene, njimileka ngwange, tungelo va Njambi vakavwaelela ali muka-vuvi umo uje atenguluka.”

Cisimo ca mwana wakuzimbala

¹¹ Yesu wendekele lalo ngwendi, “Munu umo wakele na vana vendi vavali va vanalume.

¹² Uje mwana washongo wendekele kuli ishe ngwendi, ‘Tate, njane mutambela wa vufuko vuje vukapwa vwange.’ Co wapangele vufuko vwendi akati ka vana vendi vavali.

¹³ Omo kwetile matangwa amandondo lika uje mwana washongo walandesele vufuko vwendi wakatukile waile na vimbongo. Waile ku lifuti lyakulyala, kuje wakashandwele vimbongo vyendi mukuyoya kwa vuuka.

¹⁴ Washandwele vyoshe vije vyakele navyo. Co kwezile njala ya lyangengela mu lifuti mwoshe muje, washangumukile kuyanda nakuutwa.

¹⁵ Co waile kuli mundambo umo wa mu lifuti lije nakupangako, co ikeye wamutumine ku lihya lyendi ngeci akalise vingulu.

¹⁶ Co washakele kulya nakukutisa lifu lyendi na vin̄wekwe vije vakele nakulya vingulu, oloni naumo wai wamwaneneko cuma cimo cakulya.

¹⁷ Omo waliyongwele, walyendekesele ngwendi, ‘Vangamba voshe va tate valinakulya nakukuta nakusezao, yange njilanduka ku njala!

¹⁸ Njikakatuka nakuya kuli tate, co njikendeka ngwange, tate, njinalingi vuvi ku mesho a Njambi na ku mesho ove.

¹⁹ Kunjapandele lalo unjitumbule nji munove, njipwise ngwe umo wa vangamba vove.’

²⁰ Ngecivene, wakatukile welukile kuli ishe. “Oloni omo wakele kulyala na kwimbo, co ishe wamumwene wamuzivilile mema ku mbunge, co washatukile lumbisi wamuvumbatelele nakumutsemba.

²¹ Co uje mwana wendekele kuli ikeye ngwendi, ‘Tate, njinalingi vuvi ku mesho a Njambi na ku mesho ove, kunjapandele lalo unjitumbule nji munove.’

²² Oloni ishe wasanene vangamba vendi ngwendi, ‘Zambuleniko! Neneni cikoveyo cacivwa mumuzike. Co lalo muzikeni kanzeya ku mulavo wendi na vin̄aku ku mendi endi.

²³ Co neneni lalo muna ngombe wakununa, co mutsiyeni ngeci tulye nakulisamba tulinge ciwano!

²⁴ Omwo ou munange watsile, oloni ololo alinakuyoya, wazimbalele, oloni ololo tunamuwana!’ Co vashangumukile kulisamba nakulinga ciwano.

²⁵ “Co uje munendi wa mukulunu a simbu ije wakele mu lihya. Omo wakele nakwiluka, wetele kuyehi na njuvo, co wazivile myaso nakukina.

²⁶ Co wasanene ngamba umo nakumwihula ngwendi, ‘Ovyo vika?’

²⁷ Co uje ngamba wamukumbulwile ngwendi, ‘Ndolome yove naija kwimbo, co isho natsii muna ngombe wakununa, omwo namutambula wamuvwa mukangule.’

²⁸ Co uje mukulunu wendi waluvalele manene kakovelele mu njuvo, ngecivene, ishe wezile wamulambelelele ngeci akovele.

²⁹ Co wakumbulwile ishe ngwendi, ‘Kenga, a myaka yoshe eyi njinakupangela ngwe nji ndungo yove, co simbu naimo yai njalikelele kwononoka mashiko ove. Co vika wanjana? Nambe vene muna membe kuwanjaneneye ngeci njilinge ciwano na vasamba vange!

³⁰ Oloni ou munove washandwele vufuko vwove vwoshe mu ngila ya vukwizi, omo naija kuno kwimbo unamutsiila muna ngombe wakununa!’

³¹ Oloni ishe wamukumbulwile ngwendi, ‘Munange, yove wakala nange simbu yoshe, evi vyoshe vinjilinavyo vinapu vyove.

³² Oloni tunapande kujolela nakuvwaelela, omwo ndolome yove watsile, oloni ololo alinakuyoya, wazimbalele, oloni ololo tunamuwana.’ ”