Luka 14 - Livulu lya Shukulu Kalunga

Yesu akangwisa muka-mushongo

¹ Yesu wakovelele mu njuvo ya mukulunu umo wa vaFaliseo nakulya nendi a Litangwa Lyakuhwima, co vanu vamukengelele.

² Co munalume umo wavinjile mushongo wakuzimba mendi na mavoko wezile kuli Yesu,

³ co Yesu wehwile valongisi va majwi a Lishiko na vaFaliseo ngwendi, “Lishiko lyetu litutavesa kukangwsia munu a Litangwa Lyakuhwima indi embwe?”

⁴ Oloni vakevo volokele kuluu kuvendekele cuma nacimo cai. Yesu wakwatele uje munu wamukangwisile, co uje munu waile.

⁵ Asinoni Yesu wendekele kuli vakevo ngwendi, “Nga umo weni ali na munendi wa munalume nambe ngombe yendi awila mu lisima a Litangwa Lyakuhwima, kuma kasa kumutundisamo a Litangwa Lyakuhwima ndi?”

⁶ Oloni vakevo kuvasele kumukumbulula a cuma eci.

Kulikeesa nakujumbula vangenzi

⁷ Yesu wamwene vangenzi vamo vakele nakulyangwila myela ya kasingimiko, co voshe wavatelelele cisimo eci ngwendi,

⁸ “Omo munu akulanya ku ciwano ca vushombolwa, kesi utumbame a citumbamo ca vulemu. Kutewa amo valanya weka nakutuvakana vulemu,

⁹ co uje namilanyele muvavoshe muvavali aija nakwendeka kuli yove ngwendi, ‘Ana citumbamo kuli ou!’ Co ukaziva shwamwa akununguluka nakukatumbama a citumbamo cacindondo.

¹⁰ Oloni omo vakulanya, tumbama a citumbamo cacindondo, co uje nakulanya omo aija akukuleka ngwendi, ‘Ove musamba tumbama a citumbamo ca vulemu!’ Co ukawana kasingimiko ku mesho a vakweni voshe vaje vaunatumbama navo kukulya.

¹¹ Omwo woshe uje akalyaka ku vukama vakamukeesa, co woshe uje alikeesa vakamwaka ku vukama.”

¹² Asinoni Yesu wendekele kuli uje wamulanyele ngwendi, “Nga uvwaesa kulya kwa mutanya nambe kulya kwa cingwezi, kesi ulanye vasamba vove nambe vandolome vove nambe vavushoko vwove nambe vandambo vove vaka-kufuka, omwo navo lalo vakakulanya, co mu ngila eyi vakakwilwisila vije viwalingile.

¹³ Oloni omo ulinga ciwano, lanyako vaka-kuutwa na vaka-kujenduka na vilema na tupuputwa,

¹⁴ co ukavezika, omwo vakevo kuvakasa kukwilwisila vije viwunavana. Njambi ikeye akakwilwisilavyo a litangwa livakasanguka vaka-vushunga ku vatsi.”

Cisimo ca ciwano cakama

¹⁵ Omo munu umo wa vaje vakele ku mesa wazivile evi, wendekele kuli Yesu ngwendi, “Vanavezika vaje vakatumbama ku ciwano mu Vumwene vwa Njambi!”

¹⁶ Co Yesu wamulekele ngwendi, “Kwakele munu umo wavwaesele ciwano cakama walanyele vanu vavangi.

¹⁷ Omo simbu ya ciwano yetele, watumine ngamba yendi kuli vaje vavalanyele ngwendi, ‘Ijeni, vyuma vyoshe vinavwaa laja!’

¹⁸ Oloni voshe vashangumukile kuleulula. Wakulivanga walekele uje ngamba ngwendi, ‘Njinalanda lihya lyange, co njinapande kuyako njikalimone, njilomba ngwange unjisambese.’

¹⁹ Mukwavo lalo ngwendi, ‘Njinalanda vingombe likumi vakulima, co njiya njikaveseke, njilomba ngwange unjisambese.’

²⁰ Weka lalo ngwendi, ‘Njinambata munakazi, cooni a cuma eci kunjasa kuyako.’

²¹ Co uje ngamba waile wakalekele shukulu yendi vyuma vyoshe vije vivendekele. Co shukulu yendi waluvalele wendekele kuli ngamba yendi ngwendi, ‘Ya vwasi ku vitapalo na ku tuvingila twatundondo twakuya ku nganda ukalanye vaka-kuutwa na vaka-kujendoka na tupuputwa na vilema.’

²² Co vwasi-vwasi uje ngamba wendekele ngwendi, ‘Shukulu cinalingiwa laja ngwe muwanjishikile, anga kunacisala mwela wakama.’

²³ Co shukulu yendi wendekele kuli ikeye ngwendi, ‘Ya ku vitapalo vyakama na ku tuvingila twatundondo ukasindiye vanu vaije kuno ngeci njuvo yange yakushule.

²⁴ Njimileka muvavoshe ngwange kukwesi umo kuli vaje vanalume vanjalanyele akalya vyakulya vyange!’ ”

Vije vyapande ndongisi

²⁵ Mbunga yakama vakele nakuya amo na Yesu, co watengulukile nakwendeka kuli vakevo ngwendi,

²⁶ “Woshe uje aija kuli yange kasa kupwa ndongisi yange kuvanga anjizeme yange kutuvakana mwazema ishe na vaina, munakazi wendi na vana vendi, vandolome vendi na vandokazi vendi, nakuzema yange kutuvakana mwalizema ikeye vavenya lalo.

²⁷ Co woshe uje kambata cilindakano cendi nakunjikava kasa kupwa ndongisi yange embwe.

²⁸ Nga umo weni ali na vutumbe vwakutunga kaposhi, co akulivanga atumbama nakulava vingai akafweta, nakumona ngeci ali na vimbongo vyakumanesa vipangi vyendi.

²⁹ Nga kapwisilemo, co kakasa kumanesa kaposhi omo nendi laja luvula, co vaje vakamona vije vyalingiwa vakashangumuka kumujola, co vakendeka

³⁰ ngwavo, ‘Ou munalume washangumukile kutunga oloni kamenesele vipangi vyendi!’

³¹ Nga mwene aya na vanu vakupwa 10,000 nakulwa nzita na mukwavo mwene uje aija na vanu vakupwa 20,000, co napande kutumbama asi akulivanga ayongole nga ali na nzili yakulwa na uje mukwavo mwene.

³² Co nga ikeye kapwisilemo, napande kutuma lijwi nakuliwana na uje mukwavo mwene omo simbu acili kulyala ngeci alombe kwoloka.”

³³ Yesu wamanesele kwendeka ngwendi, “Na kuli yeni voshe, ou kaseza vyuma vyoshe alinavyo kasa kupwa ndongisi yange.”

Mwongwa wakushamuka

³⁴ “Mwongwa wapwa wauvwa, oloni nga ushamuka, co utovala vatijo?

³⁵ Kucitava lalo kuwaka mu lihya, nambe kuulinga vwilo, oloni vaumbila kuti. Nga muli na matwi, ziveni!”