Luka 13 - Livulu lya Shukulu Kalunga

Tengulukeni ku vivi vyeni kutewa mutsa

¹ A simbu ije vanu vamo valekele Yesu vya vaNgalileya vaje vaatsiile Pilato omo vakele nakukombelela vin̄ombelo kuli Njambi.

² Yesu wavakumbulwile ngwendi, “Omwo vaNgalileya vaje vavatsiile mu ngila ije vene, co yeni mwayongola ngweni vapwile vaka-vuvi kutuvakana vaNgalileya voshe vakwavo ndi?

³ Njimileka ngwange, embwe! Oloni kuvanga mutenguluke, nga ngoconi mukanyonga ngwe vakevo lalo.

⁴ Vati ali vaje vanu likumi na vatanu na vatatu mu Siloame vaje vatsile omo kaposhi kavawililile? Mwayongola ngweni vapwile vaka-vuvi kutuvakana vanu voshe vakwavo vaje vakele mu Yelusalema ndi?

⁵ Njimileka ngwange, embwe! Oloni kuvanga mutenguluke, nga ngoconi mukanyonga ngwe vakevo lalo.”

Cisimo ca mukuyu wakujeneka kwima vushuka

⁶ Co Yesu wavatelelele cisimo eci ngwendi, “Munalume umo wakunine muti wa mukuyu mu citungu cendi ca mikolovozi ya vushuka vwa vinyu. Co waileko nakuvuya vushuka oloni kavuwaneneko.

⁷ Ngecivene, wendekele kuli ndimi yendi ngwendi, ‘Kenga, mu myaka itatu njinakele nakwijako nakusetelako vushuka oku ku mukuyu, co nakamo njinawanako kai. Ushinje! Omwo vikajo uviisila ngoco livu eli?’

⁸ Oloni uje ndimi wamukumbulwile ngwendi, ‘Shukulu, acikengeleleniko mwaka umo lalo, njikaindako kuuzengeleka nakwakako vwilo.

⁹ Nga ukaima vushuka mungolosika, co mwamuvwa, oloni nga kuukaimi vushuka, asinoni ukaushinja.’ ”

Yesu akangwisa munakazi wa cilema a Litangwa Lyakuhwima

¹⁰ Yesu wakele nakulongesa mu sinangonge a Litangwa Lyakuhwima.

¹¹ Co kwakele munakazi umo wakele na munzinzime wakujwala uje wamuvinjisile myaka likumi na itanu na itatu, co ikeye wakulamene kasele kwoloka embwe.

¹² Omo Yesu wamumwene, wamusanene nakwendeka kuli ikeye ngwendi, “Munakazi, unakanguka ku kuvinja kwove.”

¹³ Yesu wakambekele mavoko endi ali ikeye, co aje vene wolokele, co washangazalele Njambi.

¹⁴ Co mukulunu wa mu sinangonge waluvalele omwo Yesu wakangwisile munu a Litangwa Lyakuhwima, co wendekele nakuleka vanu ngwendi, “Kuli matangwa atanu na limo aje tunapande kupanga vipangi, ngecivene, munapande kwija mu matangwa aje ngeci vamikangwise, kesi mukaije a Litangwa Lyakuhwima, embwe!”

¹⁵ Oloni Mwene wamukumbulwile ngwendi, “Eni vaka-civembulu! Kuma munu kesi kuzitula ngombe yendi mu licakana nambe cimulu cendi nakumutwala ku mema a Litangwa Lyakuhwima ndi?

¹⁶ Munakazi ou ikeye mutekulwila wa Avilahama uje yakutile Satana myaka likumi na itanu na itatu, kuma kuvapandele kumuzitula a Litangwa Lyakuhwima ndi?”

¹⁷ Kukumbulula kwendi kwazivisile vitozi vendi voshe shwamwa, co vanu voshe vajolelelele a vyuma vyakukomokesa vije vyalingile.

Cisimo ca mbuto ya musalata

¹⁸ Yesu wavehwile ngwendi, “Vumwene vwa Njambi tukavufwisa ngwe vika? Njivwesekesa na vika?

¹⁹ Vumwene vwa Njambi vunalifu ngwe munu anona kanona kamo ka mbuto ya musalata nakukakuna mu lihya lyendi. Co kakola kapwa muti wakama, co tuzila vaija vakutungila mashwa avo ku minango yawo.”

Cisimo ca musima

²⁰ Co lalo Yesu wavehwile ngwendi, “Vumwene vwa Njambi njivwesekesa na vika?

²¹ Vumwene vwa Njambi vunalifu ngwe musima uje wanonele munakazi nakuutsingasana na malita makumi awana a vunga vwa tiliku mu lilonga, noo mukasha woshe wafutunukile.”

Cikolo cacindondo

²² Yesu wetile mu vinganda na mu membo, co walongesele vanu oku ali mu vungenzi vwakuya ku Yelusalema.

²³ Co umo wamwihwile ngwendi, “Shukulu, kuma vavandondo lika vakovoka ndi?” Yesu wavakumbulwile ngwendi,

²⁴ “Licikinineni mukovele mu cikolo cacindondo, omwo mwa vushunga vavangi vakashaka kukovelamo oloni kuvakasa.

²⁵ Omwo vavenya njuvo akemana nakushoka lipito, cooni omo mukemana anja nakutota a lipito ngweni, ‘Shukulu, tushokolweleko!’ Co akamikumbulula ngwendi, ‘Kunjizivuka oku kumutunda.’

²⁶ Co mukakumbulula ngweni, ‘Twalile nakunwa nove, co lalo walongesele mu nganda yetu!’

²⁷ Oloni akendeka lalo ngwendi, ‘Kunjizivuka oku kumutunda. Tundeni kuli yange, yeni voshe vaka-kulinga vyavivi.’

²⁸ Mukalila nakulingenjenga ku mayo omo mukamona Avilahama na Isake na Yakomba na vaka-kwimanena voshe mu Vumwene vwa Njambi, a simbu ije vamyumbila anja!

²⁹ Vanu vakatunda mu ngangela na mu kangombe ka yambi, ku kunto na mu mbwela, vakatumbama ku ciwano mu Vumwene vwa Njambi.

³⁰ Oloni vaka-kulivanga vavangi vakapwa vaka-kukotokela, co vaka-kukotokela vavangi vakapwa vaka-kulivanga.”

Cizemo ca Yesu a Yelusalema

³¹ A simbu ije vene kwezile vaFaliseo vamo kuli Yesu vendekele ngwavo, “Unapande kutunda kuno uye kweka, omwo Helonde ashaka kukutsiya.”

³² Yesu wavakumbulwile ngwendi, “Yeni mukamuleke owo mbanje ngweni, ‘Njicili nakutundisa minzinzime yakujwala nakukangwisa vanu ku mishongo yavo ku litangwa lyalelo na imene, co a litangwa lyamucitatu asinoni njikamanesa vipangi vyange.’

³³ Nameme ngoco njinapandele kwenda lelo nai mene na indele, omwo kesi mwamuvwa kuli muka-kwimanena kutsila kweka embwe kuvanga mu Yelusalema.

³⁴ “Yelusalema, Yelusalema! Yove ukatsii vaka-kwimanena nakwasha mamanya miluwa va Njambi vaje vaatumine kuli yove! Visimbu vyavingi njashakele kukungulula vanu vove nakuvavumbatela mu mavoko ange ngwe kasumbi akavutikiya vana vendi mu mambava, oloni yove kuwanjitavele!

³⁵ Ngecivene, Njuvo yove ya Shukulu Kalunga vakaiseza nakuyivala. Njikuleka ngwange, kuukanjimono lalo embwe, kuvanga noo simbu ikaija omo ukendeka ngwove, ‘Njambi amuvezikise ou aija mu lizina lya Mwene.’ ”