Luka 12 - Livulu lya Shukulu Kalunga

Kunangula a civembulu

¹ Vanu vavangi-vangi vakungulukilile amo, co valilyatangelele, Yesu wendekele akulivanga kuli vandongisi vendi ngwendi, “Nyanyameni ku musima wa vaFaliseo, njilumbununa a civembulu cavo.

² Kukwesi cuma cakufwika civakonwa kufukula nambe cuma cakwendekela mu vushweke kuvanga cikajomboloke.

³ Ngecivene, cuma coshe munendeka mu vushweke vakaciziva mu mbunga, co vyoshe vije munayeveta mu vushweke mu mulili wakushoka vakavitambeka mu lifuti mwoshe.

Uje itunapande kukomoka

⁴ “Njimileka vasamba vange ngwange, kesi muzivile lyova vaje vatsiya muvila, oloni kutundao nacimo vasa kulinga cai.

⁵ Njimileka uje imunapande kukomoka. Komokeni Njambi, uje omo namenesa kutsiya, co ali na moko yakumumbila mu Mbulu ya tuhya. Eyo, njimileka ngwange, ou ikeye imunapande kukomoka!

⁶ “Kuma tunzilili vatanu kuvesi kuvalandesa tumbongo tuvali ndi? Oloni naumo wai ivanevala kuli Njambi.

⁷ Ishweni azivuka vin̄ambu vyoshe vya ku mitwe yeni. Ngecivene, kesi muzive lyova, omwo seo yeni inatuvakana seo ya tunzilili vavangi!

Kutava Yesu nambe kumuvyana ku mesho a vanu

⁸ “Njimileka ngwange woshe akanjitava ku mesho a vanu, na Muna Munu lalo akamutava ku mesho a tungelo twa Njambi.

⁹ Oloni woshe akanjivyana ku mesho a vanu, na Muna Munu lalo akamuvyana ku mesho a tungelo twa Njambi.

¹⁰ “Woshe uje endeka lijwi limo lyakushaula Muna Munu vakamusambesa, oloni uje endeka majwi amavi akushaula Munzinzime Wakujela kuvakamusambesa.

¹¹ “Omo vakamitwala nakumisompa mu masinangonge avo nambe ku mesho a vanguvulu, nambe kuli vaka-kushwana, kesi mushote vimbunge vyeni ngweni tukalyamena vati nambe vatijo tukendeka.

¹² Omwo Munzinzime Wakujela akaminangula mumunapande kwendeka a simbu ije vene.”

Cisimo ca muka-kufuka wakweva

¹³ Munalume umo wa mu mbunga wendekele kuli Yesu ngwendi, “Mulongisi, leka ndolome yange atave ngeci tulipangele vufuko vwatusezelele tate.”

¹⁴ Yesu wamukumbulwile ngwendi, “Musamba wange, iyajo nanjipwisa muka-kusompa nambe muka-kumipangela vufuko akati keni?”

¹⁵ Co wendekele navo voshe ngwendi, “Nyanyameni nakulinyunga ku cipululu coshe, omwo kuyoya kwa munu kukwakundamene ku vyuma vyali navyo, nambe afuke vati.”

¹⁶ Ngecivene, Yesu wavatelelele cisimo eci ngwendi, “Kwakele munalume umo wakufuka wakele na lihya lyendi muje mwenine vimbuto vyavingi.

¹⁷ Co wayongwele mu mbunge yendi ngwendi, ‘Kunjesi noku kwakutulikila vimbuto vyange vyoshe. Vati njilinga?’

¹⁸ Co wendekele ngwendi, ‘Njikalinga ngeci, njikapapulula vishete vyange, co njikatunga vyakama, ngeci njikalongemo vimbuto vyange vyoshe na vufuko vwange.

¹⁹ Cooni njikendeka ngwange, njinavezika! Njili na vyuma vyavingi vije vinjetesa ku myaka ya kulutwe. Njinapande kuhwima nakulya nakunwa nakujolela!’

²⁰ Oloni Njambi wendekele kuli ikeye ngwendi, ‘Ove cilema! Vutsiki vuno vene vakatambula mwonyo wove, co vyoshe evi unalitulikila yove vavenya vikapwa vyeya?’ ”

²¹ Co Yesu wamanesele ngwendi, “Mukemwo muvanafu vaje vanalilundikila vufuko vakevo vavenya, oloni kuvafukile ku mesho a Njambi.”

Kulaeleni kuli Njambi

²² Asinoni Yesu wendekele kuli vandongisi vendi ngwendi, “Njimileka ngwange, kesi mulishoshomwene akuyoya kweni, ngweni tukalya vika, nambe vya mivila yeni ngweni, tukazala vika.

²³ Omwo myonyo yeni ili na seo kutuvakana vyakulya, co mivila yeni lalo ili na seo kutuvakana vyakuzala.

²⁴ Kengeni makololo, kuvesi kukuva nameme kuteja, kuvesi na milili yakutulikila nambe vishete, oloni Njambi alinakuvalisa! Yeni muli na seo yakama kutuvakana tuzila!

²⁵ Iyajo akati keni nga alishoshomwena, co ase kuwezelela ku matangwa a ku mwonyo wendi?

²⁶ Nga kumwasa nameme kulinga cuma cimo cacindondo, omwo vika mulishoshomwena a vyuma vyeka?

²⁷ Kengeni vishani vije vyakala mu shwata, vikevyo kuvyesi kupanga nambe kulipangela vuzalo vikevyo vavenya. Oloni njimileka ngwange, nameme Mwene Solomoni na vufuko vwendi vwoshe kazalele vuzalo vwavuvwa ngwe vwa vishani evi.

²⁸ Oloni nga Njambi azika mwila wa mu shwata uje ukalako lelo lika, oloni imene waiko, vaumbila mu liko nakuwenyeka, co kuma kasa kumizika ndi? Yeni vaka-kukulaela kwakundondo!

²⁹ “Ngecivene, kesi mulishoshomwene ngweni, ‘Tukalya vika?’ Nambe ‘Tukanwa vika’?

³⁰ (Omwo vaka-kujeneka kukulaela va ano a kaye simbu yoshe vakashakezeka vyuma vyoshe evi.) Omwo Ishweni wa mwilu azivuka ngwendi mushaka vyuma vyoshe evi.

³¹ Oloni akulivanga shakezekeni Vumwene vwendi, co vyoshe evi akamiwezelelavyo.

Vufuko vwa mwilu

³² “Kesi muzive lyova, yeni mbunga yaindondo, omwo Ishweni navwaelela kumyana Vumwene.

³³ Landeseni vyoshe mulinavyo, co aneni vimbongo kuli vaka-kuutwa. Litongeleni vinkombe vije kuvyesi kutuvika, co litulikileni vufuko mwilu, kuje kuvwasa kutepuluka, omwo mwizi kasa kukovelamo, nambe tunembulu kuvasa kuvuviisa.

³⁴ Omwo mbunge yove simbu yoshe yakala kuje kuvwakala vufuko vwove.

Vangamba vaka-kukengelela

³⁵ “Livwaeseleni cimweja ku vyoshe vije vikaija, lizitikeni miva mu vimbunda vyeni, vindeya vyeni vishukume,

³⁶ ngwe vangamba vakengelela shukulu yavo eluke ku ciwano ca vulo. Omo aija nakutota ku cikolo, co vazambula nakumushokolwelako.

³⁷ Vanavezika vangamba vaje omo shukulu yavo aija avawana kuvesi mu tulo valinakumukengelela! Mwa vushunga njimileka ngwange, ikeye akalizitika mwiva mu mbunda, akavaleka ngeci vatumbame, co akavana vyakulya.

³⁸ Vavezika vangamba vaje nga Shukulu yavo aija avawana vanalivwaesela cimweja nameme aija akati ka vutsiki nambe akakotokela!

³⁹ Zivukeni ngweni nga vavenya njuvo wazivukile simbu ika mwizi aija, nga katavele njuvo yendi vaipukule.

⁴⁰ Neni lalo livwaeseleni cimweja, omwo Muna Munu akaija a simbu kumuzivuka.”

Ngamba wa kulongwa nou wakujeneka kulongwa

⁴¹ Petulu wendekele kuli Yesu ngwendi, “Mwene, eci cisimo unacitela yetu lika indi na vanu voshe?”

⁴² Co Mwene wamukumbulwile ngwendi, “Iya napu ngamba wa kulongwa nakunyanyama? Ikeye uje shukulu yendi namusezela kunyunga njuvo yendi, nakwana vyakulya kuli vakwavo vangamba a simbu yaivwa.

⁴³ Navezika ngamba uje omo shukulu yendi akaija, co akumuwana alinakulinga ngeci.

⁴⁴ Mwa vushunga njimileka ngwange, shukulu yendi akamwana moko yakumunyungila vyuma vyendi vyoshe.

⁴⁵ Oloni nga ikeye napu ngamba wamuvi endeka mu mbunge yendi ngwendi shukulu kaija vwasi, co ashangumuka kupupanga vakwavo vangamba va vanalume na ava va vanakazi, co alya nakunwa nakupenda,

⁴⁶ asinoni shukulu yendi akaija litangwa limo a simbu ije kayongwele ngwendi ikeyo yakeluka. Co shukulu yendi akamumbila anja, co akaya ku cihiso amo na vaka-kujeneka kukulaela.

⁴⁷ “Ngamba uje azivuka vyashaka shukulu yendi ngeci avilinge, oloni kalivwaesela nakuvilinga, vakamunyanyamesa nakumupupa makote amangi.

⁴⁸ Oloni ngamba uje kazivuka vyashaka shukulu yendi, co alinga vije kuvyamupandele vakamupupa makote amandondo. Woshe uje ivanaana vyavingi kuli ikeye lalo vakatonda vyavingi, co kuli uje ivanasezela vyavingi ikeye lalo vakamwihula vyavingi.

Yesu ikeye muka-kwangununa

⁴⁹ “Njezile nakushwameka tuhya ano asi, njishaka nga tunashwama laja!

⁵⁰ Njinavandamena kumbwitika kuje kuvanapande kunjimbwitika, oloni njinalijujukila noo kumbwitika kuje kukahwa!

⁵¹ Yeni mwayongola ngweni njinaija nakunena kwoloka ano asi ndi? Embwe, kesi kwoloka, oloni njinanena kaangu.

⁵² Kutunda kulelo kutwala kulutwe naanga ya vanu vatanu va mu njuvo imolika vakalyangunuka, vatatu vakalwisa vavali, co vavali vakalwisa vaje vatatu.

⁵³ Visemi va vanalume vakalwisa vana vavo va vanalume, co vana va vanalume vakalwisa vaishavo, co visemi va vanakazi vakalwisa vana vavo va vanakazi, co vana va vanakazi vakalwisa vainavo, co vainamweno vakalwisa vainamwenwavo, co vainamwenwavo vakalwisa vainamweno.”

Kuzivuka simbu

⁵⁴ Yesu wendekele lalo kuli vanu ngwendi, “Omo mumona lishelwa lija mu kangombe ka yambi, ohovene mwendeka ngweni, ‘Nyonzi inyoka’ co inyoka vene.

⁵⁵ Omo mumona lihunzi lya mu mbwela lihuwa, co mwendeka ngweni, ‘Kuli nakwija ntwima!’ Co ija vene.

⁵⁶ Eni vaka-civembulu! Mukenga asi na lilu, co muzivuka vati kufwa litangwa lije, co omwo vika kumwasa kuzivuka muyinanungulukila simbu eyi?

Kulisambesa na muka-n̄ole

⁵⁷ “Omwo vika kumwesi kuyongola yeni vavenya kulinga cuma ca vushunga?

⁵⁸ Lisambese vwasi na mukan̄ole yove uje mumunalivulumwina omo muya mumo mu ngila, kutewa akakutwala kuli lyaako, co akakwana kuli lishwalale, ngeci akwake mu kamenga.

⁵⁹ Mwa vushunga njikuleka ngwange, kuukatundumo kuvanga unafwete vimbongo kumanesa mulonga wove.”