Luka 10 - Livulu lya Shukulu Kalunga

Yesu atuma vanu makumi atanu na avali na vanu vavali

¹ Munima ya vyuma evi Mwene waangwile lalo vanalume veka makumi atanu na avali na vanu vavali nakuvatuma vavali vavali kulutwe lwendi, ku vinganda vyoshe na ku mitambela yoshe kuje kwashakele kuya ikeye vavenya.

² Wendekele kuli vakevo ngwendi, “Vimbuto vinatumu, oloni vaka-kuviteja vavandondo. Ngecivene, lombeleni kuli vavenya vimbuto ngeci atume vaka-kuteja vimbuto vyendi.

³ Yeni! Njimituma ngwe vana va vimanga akati ka tungunga.

⁴ Kesi mwambate nkombe, nambe lipakumuna, nambe vin̄aku, kesi mwimane nakulikandelela na munu umo a ngila.

⁵ Mwoshe mu njuvo mumukakovela, akulivanga mukendeka ngweni, ‘Kwoloka kukale mu njuvo ino.’

⁶ Nga mu njuvo muje muli munu wazema kwoloka, co taveni kwoloka kweni kukale ali ikeye, oloni nga waimo, co kwoloka kweni kwiluke kuli yeni vavenya.

⁷ Kaleni mu njuvo ije vene, lyeni nakunwa vyoshe vije vivakamyana, omwo muka-kupanga napande kutambula fweto yendi. Kesi mukendangane kutunda ku njuvo imo kuya ku njuvo ikwavo embwe.

⁸ Mu nganda mwoshe mumukakovela nga vamitambula, lyeni vije vivakamyana,

⁹ kangwiseni vaje vaka-kuvinja valimo, endekeni kuli vanu vaje valimo ngweni, ‘Vumwene vwa Njambi vunaija kuyehi neni.’

¹⁰ Oloni mu nganda mwoshe mumukakovela nga kuvakamitambula, yeni mu vitapalo nakwendeka ngweni,

¹¹ ‘Likungu lya nganda yeni lije lili ku myanja yetu tuli nakumitotomwenalyo. Oloni anukeni ngweni Vumwene vwa Njambi vunaija kuyehi neni!’

¹² Mwa vushunga njimileka ngwange, a Litangwa Lyakusompa Njambi akamwesa vaka-Sondoma mema ku mbunge kutuvakana nganda ije!

Vinganda vya vaka-kujeneka kukulaela

¹³ “Ngongo yove Kolazine! Ngongo yove Mbetesainda! Omwo vizivukiso evi vanalingi kuli yeni, nga vavilingilile mu Tile na mu Sindone, nga vanu vamwo vatumbamene laja asi nakuzala vikeleya nakulikwita lito kumwesa ngeci vanatenguluka ku vivi vyavo!

¹⁴ Njambi akatetela manene vanu va ku Tile na Sindone a Litangwa Lyakusompa kutuvakana yeni!

¹⁵ Nove lalo Kapenauma! Washakele kulijundwila yove vavenya mwilu ndi? Ukashelumuka ku vukalo vwa vatsi!”

¹⁶ Yesu wendekele kuli vandongisi vendi ngwendi, “Woshe uje amitolilila, atolilila yange, woshe uje amivyana avyana yange, co woshe uje anjivyana, avyana uje wanjitumine.”

Kwiluka kwa miluwa makumi atanu na avali na vavali

¹⁷ Co vaje vanalume makumi atanu na avali na vanu vavali velukile lalo nakujolela kwakama. Vendekele ngwavo, “Mwene, nameme minzinzime yakujwala yatwononokele omwo twaishikile mu lizina lyove!”

¹⁸ Yesu wavakumbulwile ngwendi, “Njamwene Satana awa kutunda mwilu ngwe muhyato.

¹⁹ Tolilileni! Njamyana moko ngeci mukalyatangele manyoka na manyewe, nakuhyana nzili yoshe ya Citozi, co nacimo cai cikamivulumuna.

²⁰ Kesi mujolele omwo minzinzime yakujwala imyononoka embwe, oloni joleleni omwo mazina eni vanawasoneka mwilu.”

Yesu ajolela

²¹ A simbu ije vene Yesu washulile nakujolela kwa Munzinzime Wakujela, co wendekele ngwendi, “Njikukandelela yove Tate, Mwene wa lilu na ano asi! Omwo vyuma evi wavishwekele kuli vaka-mana na kuli vaka-kulilongesa, co unavisholola kuli vaka-kujeneka mana. Mukemwo vene Tate, mucavwaela ku mesho ove.

²² “Vyuma vyoshe Tate nanjanavyo. Co lalo naumo wai azivuka Mwana kuvanga Ishe, co lalo naumo wai azivuka Ishe kuvanga Mwana, na vaje voshe vaashaka Mwana kuvasholwelaye.”

²³ Asinoni Yesu watengulukilile kuli vandongisi vendi, wendekele kuli vakevo mu vushweke ngwendi, “Mwavezika manene omwo mesho eni anamono vije vimulinakumona!

²⁴ Mwa vushunga njimileka ngwange vaka-kwimanena vavangi na vimyene vavangi vashakele manene kumona vyuma vije vimulinakumona, oloni kuvavimwene, nambe kuziva vije vimulinakuziva, oloni kuvavizivile.”

Cisimo ca muka-Samaliya wamuvwa

²⁵ Mulongisi wa majwi a Lishiko wezile nakweseka Yesu wehwile ngwendi, “Mulongisi, vika njinapande kulinga ngeci njitambule mwonyo wa myaka yoshe?”

²⁶ Yesu wamukumbulwile ngwendi, “Visoneka vinendeka vati? Ukavinungulula vati?”

²⁷ Co uje munalume wakumbulwile ngwendi, “Zema Shukulu Kalunga Njambi yove na mbunge yove yoshe, na mwonyo wove woshe, na nzili yove yoshe, na mana ove oshe, co zema mukweni ngwe muwalizema yove vavenya.”

²⁸ Yesu wakumbulwile ngwendi, “Unendeka mwamuvwa, linga ngeci, co ukayoya.”

²⁹ Oloni uje mulongisi wa majwi a Lishiko washakele kulisambesa, wendekele kuli Yesu ngwendi, “Mukwetu iya?”

³⁰ Yesu wakumbulwile ngwendi, “Kwakele munu umo watundile ku Yesusalema waile ku Yeliko, co waliwanene na mapwepwe, vamulwisile, vamushulwile vuzalo vwendi, nakumupupanga nakumuseza ashaka kutsa.

³¹ Co muka-kukombelela wezile mu ngila ije, oloni omo wamwene uje munalume wamwongolokele.

³² Mu cifwa cimo lalo kaLevi wetile mu ngila ije vene, washwenyeleko nakukenga uje munalume, co wongolokelele ku mutambela ukwavo.

³³ Oloni umo kaSamaliya wendele mu ngila ije wetele aje akele uje munalume, omo wamumwene, wamuzivilile mema ku mbunge.

³⁴ Washwenyele kuli ikeye, wetilile mazi na vinyu a vimbandu vyendi, wamuzengeleo vinanga, co wamwakele a cimulu cendi wamutwalele ku njuvo ya vangenzi, wamunyungilileko.

³⁵ Alikaki wanonele vimbongo vivali vya siliva, wavyanene kuli vavenya njuvo, co wamulekele ngwendi, ‘Munyunge, vyoshe vije umbila ali ikeye, omo njikeluka njikakufweta.’ ”

³⁶ Yesu wamanesele ngwendi, “Mu viyongola vyove iya oni akati ka vaje vanu vatatu walingile ngwe mundambo wa uje munu ivalwisile mapwepwe?”

³⁷ Co mulongisi wa majwi a Lishiko wakumbulwile ngwendi, “Uje wamuzivilile mema ku mbunge.” Yesu wakumbulwile ngwendi, “Nove lalo ya ukalinge ngacije.”

Yesu asikamesa Maliya na Mata

³⁸ Omo Yesu na vandongisi vendi vaile mu ngila yavo, co wetele ku limbo limo kwakele munakazi umo lizina lyendi Mata uje wamutambwile mwamuvwa mu njuvo yendi.

³⁹ Mata wakele na ndokazi yendi lizina lyendi Maliya uje watumbamene ku myanja ya Mwene nakutolilila kulongesa kwendi.

⁴⁰ Mata wakele na cishota-mbunge ca vipangi vyavingi, co wezile kuli Yesu wendekele ngwendi, “Mwene, kuwashotele mbunge omo ndokazi yange nanjisezela vipangi ange lika ndi? Muleke aije akunjikwaseko!”

⁴¹ Mwene wamukumbulwile ngwendi, “Mata, Mata! Ulinakuliyandesa a vipangi vyavingi,

⁴² oloni kuli cuma cimo ciwunapande kulinga. Maliya naangula cuma cacivwa cije naumo wai lalo akamutambulaco.”