Luka 1 - Livulu lya Shukulu Kalunga

¹ Kuli mukwetu Teofilo. Vanu vavangi vanasoneka vukaleo vwa vyuma vije vyalingiwile akati ketu.

² Vasonekele vije vatulekele vaje vamwene vyuma evi, tunde akushangumuka, vaje vambulwile lijwi.

³ Ngecivene, nange njinayongola ngwange njinapande kukusonekelavyo yove shukulu Teofilo, muvyalikavasanena, omwo njinavihwisisa vyoshe tunde avyashangumukilile.

⁴ Njilinakulinga evi ngeci uzivuke vushunga vwakushula vwa vyuma vije vivakulongesele.

Vambulula kusemuka kwa Yowano Muka-kumbwitika

⁵ A matangwa a Helonde, mwene wa Yundeya, kwakele muka-kukombelela lizina lyendi Zakaliya, wa ku cikota ca Aviya. Lizina lya munakazi wendi lyapwile Elizaveta, nendi lalo wapwile wa ku naanga ya vaka-kukombelela.

⁶ Voshe vapwile vaka-vushunga ku mesho a Njambi, vendele mwamuvwa nakwononoka mashiko oshe a Shukulu Kalunga.

⁷ Oloni vakevo kuvakele na mwana omwo Elizaveta wapwile mumba, co voshe vavali vapwile tukulukazi.

⁸ A litangwa limo Zakaliya wakele nakupanga vipangi vyendi vyakukombelela mu Njuvo ya Shukulu Kalunga, a simbu yendi ya vipangi vyakukombelela.

⁹ Ngwe ku cilika civakavele vaka-kukombelela, vamwangwile akuta n̄ela mukwenyeka insense a mutula. Ngecivene, wakovelele mu Njuvo ya Shukulu Kalunga,

¹⁰ omo mbunga ya vanu vakele anja nakulombela a simbu ije wakele nakwenyeka insense.

¹¹ Kwamusholokelele kangelo ka Shukulu Kalunga, wemanene ku cilyo ku mutula wakwenyekela insense.

¹² Omo Zakaliya wamumwene walijujukilile, co wazivile lyova.

¹³ Oloni kangelo wendekele kuli ikeye ngwendi, “Kesi uzive lyova Zakaliya! Njambi nazivi lilombelo lyove, munakazi wove Elizaveta akakita mwana wa munalume, co ukamuluka lizina lyendi Yowano.

¹⁴ Ukavwaelela nakujolela, co vavangi vakalisamba akusemuka kwendi!

¹⁵ Akapwa wakama ku mesho a Shukulu Kalunga. Kakanu vinyu nameme vyuma vyakulula vije vipendesa. Tunde akusemuka kwendi akashula na Munzinzime Wakujela,

¹⁶ co akelwisila vanu vavangi va Isalele kuli Shukulu Kalunga Njambi yavo.

¹⁷ Akaya kulutwe lwa Mwene, na nzili na vukama ngwe Elinja muka-kwimanena. Akelwisila vaishavo na vana amolika, akatengulula vaka-kujeneka kwononoka nakuvelwisila lalo ku ngila yakuyongola ngwe vaka-vushunga, akavwaesela cimweja vanu va Mwene ngeci vamukengelele.”

¹⁸ Co Zakaliya wendekele kuli kangelo ngwendi, “Njikazivuka vatijo nga cuma eci mucikafwa? Omwo yange njinakulu laja, co lalo munakazi wange nakuluvala.”

¹⁹ Co kangelo wamukumbulwile ngwendi, “Yange Ngambiliyele muka-kupangela Njambi uje nanjitumu kwendeka nove nakukunenela muzimbu ou wauvwa.

²⁰ Oloni yove kuwakulaelele majwi ange, aje akapwa a vushunga omwo simbu yawo iketa. Omwo kuwakulaelele, ukapwa u kaveveve, ukoloka kuluu noo litangwa lije cikulaeso cange kuli yove cikapwa ca vushunga.”

²¹ A simbu ije vene vanu vakele nakuvandamena Zakaliya, vakele nakulikomokela omwo weshwalele manene mu Njuvo ya Shukulu Kalunga.

²² Omo Zakaliya watuukilemo, kasele kwendeka kuli vakevo, co vazivukile ngwavo namono cimona mu Njuvo ya Shukulu Kalunga. Akwonwa kwendeka lijwi limo, walingile vimweso kuli vakevo na mavoko endi.

²³ Omo wamanesele vipangi vyendi mu Njuvo ya Shukulu Kalunga, co Zakaliya welukile ku njuvo yendi.

²⁴ Munima ya vyuma evi munakazi wendi Elizaveta wakele na kafumba, wakele mu njuvo vingonde vitanu.

²⁵ Co wendekele ngwendi, “Akukotoka Shukulu Kalunga nanjikwasa, nanjitundisa shwamwa ku mesho a vanu.”

Vambulula kusemuwa kwa Yesu

²⁶ Omo Elizaveta wakele na vingonde vitanu na imo, Njambi watumine kangelo Ngambiliyele aye ku Ngalileya ku nganda ije vatumbwile Nazaleta.

²⁷ Kangelo wakele na lijwi kuli mumbanda umo kanda alimone na munalume wakuulila kuli munalume lizina lyendi Yosefa, wa ku naanga ya Mwene Ndaviti. Lizina lya uje mumbanda lyapwile Maliya.

²⁸ Co kangelo wezile kuli Maliya wendekele ngwendi, “Kwoloka kukale nove! Mwene ali amo nove, co nakuvezikisa manene!”

²⁹ Maliya wakele na citanga a lijwi lije lyendekele kangelo, wayongwele mu mbunge yendi ngwendi, “Majwi awa analumbunuka vika?”

³⁰ Co kangelo wendekele kuli ikeye ngwendi, “Kesi uzive lyova Maliya, omwo unawana kutetela kuli Njambi.

³¹ Kenga, ukakala na kafumba, co ukakita mwana wa munalume, ukamuluka lizina lyendi Yesu.

³² Ikeye akapwa wakama, co vakamutumbula Muna Njambi wa Akamwa ya Vyoshe. Co Shukulu Kalunga Njambi akamupwisa mwene, ngwe mwapwile kukulwila yendi Ndaviti,

³³ co akashwana vatekulwila va Yakomba ku myaka yoshe, na vumwene vwendi kuvukahu!”

³⁴ Co Maliya wendekele kuli kangelo ngwendi, “ Yange nji mumbanda uje kanda alimone na munalume. Eci cikapwa vati?”

³⁵ Co kangelo wamukumbulwile ngwendi, “Munzinzime Wakujela akaija ali yove, na nzili ya Njambi ikakufwika. Ngecivene, uje wakujela iwukakita vakamutumbula Muna Njambi.

³⁶ Anuka mushoni yove Elizaveta. Vamutumbwile ngwavo mumba, oloni nakulisa mwana wa munalume mu vukulukazi vwendi, co ino inapu ngonde yamucitanu na imo.

³⁷ Omwo cuma nacimo cai cahonwa Njambi kulinga.”

³⁸ Co Maliya wakumbulwile kangelo ngwendi, “Yange njinapu nji ngamba ya Shukulu Kalunga, cilingiwe kuli yange ngwe muunendeka.” Co kangelo wamusezele.

Maliya aya nakwindwisa Elizaveta

³⁹ A matangwa aje Maliya waile vwasi-vwasi ku lifuti lya minkinda lya mu Yundeya.

⁴⁰ Wakovelele mu njuvo ya Zakaliya, co wendwisile Elizaveta.

⁴¹ Omo Elizaveta wazivile kwindwisa kwa Maliya, co mbututu wanyangumukile mwimo lyendi. Co Elizaveta washulile na Munzinzime Wakujela,

⁴² co wendekele na lijwi lyakama ngwendi, “Yove umuka-kuvezika akati ka vanakazi voshe, navezika mwana uje iwukakita!

⁴³ Omwo vikajo cuma cakama eci cilingiwa kuli yange, ngeci vaina ya Mwene yange vaije kuli yange?

⁴⁴ Omo vwasi-vwasi njazivile lijwi lyakwindwisa kwove, vwasi-vwasi mbututu mwimo lyange wanyangumukile nakujolela.

⁴⁵ Yove unavezika akukulaela ngeci lijwi lya Shukulu Kalunga kuli yove likapwa lya vushunga!”

Mwaso wa Maliya wakushangazala

⁴⁶ Maliya wendekele ngwendi, “Mbunge yange ishangazala Shukulu Kalunga,

⁴⁷ mwonyo wange uvwaelela omwo Njambi Muyoyesi wange,

⁴⁸ omwo nanuka yange ngamba yendi wamundondo! Kutunda ololo nakuya kulutwe, vanu voshe vakanjitumbula ngwavo njimuka-kuvezika,

⁴⁹ omwo Njambi Muka-nzili yoshe nanjilingila vyuma vyakama. Lizina lyendi lyakujela,

⁵⁰ ikeye akamwesa mema ku mbunge kuli voshe vamusingimika, kutunda ku cisemwa cimo kutwala ku cisemwa cikwavo.

⁵¹ Ikeye nolola livoko lyendi lya nzili, nashandola vaka-kulyalesa na matumbe avo oshe.

⁵² Natundisa vimyene vakama a matanda avo, co naaka vaje vavandondo ku vukama.

⁵³ Nakutisa vaje vali na njala na vyuma vyavivwa, co vaka-kufuka navasheke mavoko-voko.

⁵⁴ Ikeye nanyungu cikulaeso cije calingile kuli vakukulwila vetu, co naija nakukwasa ngamba yendi Isalele.

⁵⁵ Nanuka kumwesa mema ku mbunge kuli Avilahama na kuli vatekulwila vendi voshe ku myaka yoshe!”

⁵⁶ Co Maliya wasikamene na Elizaveta vingonde vitatu, co welukile kwimbo lyavo.

Kusemuka kwa Yowano Muka-kumbwitika

⁵⁷ Simbu ya Elizaveta yakukita mwana yetele, co wakitile mwana wa munalume.

⁵⁸ Vandambo na vavushoko vwendi vazivile vyuma vije vyamulingililile Shukulu Kalunga, co voshe vavwaelelele amo nendi.

⁵⁹ Co a litangwa lyamucitanu na atatu, vezile nakutuula mwana, vashakele kumwindula lizina lya ishe Zakaliya.

⁶⁰ Oloni vaina vendekele ngwavo, “Embwe! Mulukeni Yowano.”

⁶¹ Vamukumbulwile ngwavo, “Kukwesi kavushoko kove ivaluka lizina eli!”

⁶² Co vanyateyeye ishe nakulinga vimweso na mavoko avo kumwihula lizina lika ashaka kuluka mwana.

⁶³ Co Zakaliya walombele citale asonekeo, wasonekeleo ngwendi, “Lizina lyendi Yowano.” Co voshe vakasamene manene!

⁶⁴ A simbu ije vene Zakaliya wasele kwendeka lalo, co washangumukile kushangazala Njambi.

⁶⁵ Vandambo voshe vakele na lyova, co muzimbu wa vyuma evi washandokelele mu lifuti lyoshe lya minkinda mu Yundeya.

⁶⁶ Voshe vaje vavizile muzimbu ou vayongweleo, co valihozwele ngwavo, “Ou mwanike akafwa vati?” Omwo casholokele mwamuvwa ngeci nzili ya Shukulu Kalunga yakele ali ikeye.

Vuka-kwimanena vwa Zakaliya

⁶⁷ Ishe ya Yowano, Zakaliya, washulile na Munzinzime Wakujela, co wendekele vin̄anda vya Njambi ngwendi,

⁶⁸ “Tushangazaleni Shukulu Kalunga Njambi ya Isalele! Naija nakukwasa vanu vendi nakuvapatula.

⁶⁹ Natwana Muyoyesi wa nzili, mutekulwila wa ngamba yendi Ndaviti.

⁷⁰ Wakulaesele laja muli vaka-kwimanena vendi vakujela

⁷¹ ngeci akatwamena ku vitozi vetu, na ku nzili ya voshe vaje vaka-kutuzinda.

⁷² Wendekele ngwendi akamwesa mema ku mbunge kuli vakukulwila vetu nakwanuka cikumiiyo cendi cakujela.

⁷³ Walikumiiye cikumiiyo cije calisingile na kukulwila yetu Avilahama.

⁷⁴ Wakulaesele kutupatula ku mavoko a vitozi vetu, ngeci tumupangele kujeneka lyova,

⁷⁵ ngeci tupwe vakujela na vaka-vushunga ku mesho endi, matangwa oshe akuyoya kwetu.

⁷⁶ “Co yove munange, vakakutumbula muka-kwimanena wa Njambi wa Akamwa ya Vyoshe. Co ukatwama kulutwe lwa Mwene mukuvwaesa ngila yendi,

⁷⁷ nakuleka vanu vendi ngeci vakavovola, akuvasambesa ku vuvi vwavo.

⁷⁸ Njambi yetu wakala na mema ku mbunge. Akatuwisa ceke cakutwamena a mungulungengu ngeci citwe ali yetu,

⁷⁹ ceke ca mwilu kutwila voshe vaje vanatumbama mu munzinze wa lisusulungu lya kutsa, nakutwamenena mendi etu mu ngila ya kwoloka.”

⁸⁰ Mwana wakolele mu muvila na mu munzinzime. Wakele mu mambo noo litangwa lyendi lyetele lyakulisholola ku vanu va Isalele.