Loma 9 - Livulu lya Shukulu Kalunga

Njambi na vanu vendi

¹ Njilinakwendeka vushunga muli Kilistu, co kunjesi nakwendeka makuli embwe. Citaku-taku cange lalo cilinakwambulula amo nange ali Munzinzime Wakujela,

² omo njendeka ngwange njili na vusiwa vwakama manene, nakuvinja kuje kukwesi kuhwa mu mbunge yange,

³ omwo vanu vange, vavushoko vange mu situ na mu maninga.

⁴ Vanapu vanu va Njambi, navapwisa vana vendi nakuvasholwela vumpau vwendi, walingile vikumiiyo navo nakuvana Lishiko, vakalemesa mwa vushunga, vanatambula vikulaeso vya Njambi,

⁵ vanapu vatekulwila va vakukulwila va vaHevelu va lutsimo, na Kilistu, akupwa munu, nakundama ku cisemwa cavo. Njambi uje muka-kushwana vyuma voshe, vamushangazale myaka yoshe! Ewa.

⁶ Kunjendeka ngwange cikulaeso ca Njambi cinonwa embwe, omwo kesi vanu voshe va Isalele vanapu vanu va Njambi embwe.

⁷ Nambe kesi voshe vatekulwila va Avilahama vanapu vana va Njambi embwe. Oloni Njambi wendekele kuli Avilahama ngwendi, “Kuvanga muli Isake lika mukemwo ukakala na vatekulwila vaje njakukulaesele.”

⁸ Eci cinalumbunuka ngeci vana vaje vanasemuka ku cisemwa ca vunu kesi vana va Njambi, oloni vanu vaje vanasemuka omwo cikulaeso ca Njambi vakevo vavatumbula vatekulwila va vushunga.

⁹ Omwo cikulaeso ca Njambi vacilingile mu majwi awa ngwavo, “A simbu ino vene mungolosika njikeluka lalo, co Sala akakita mwana wa munalume.”

¹⁰ Co kesi eci lika embwe. Oloni omwo vana va Lembeka vavali vakele na ishavo umolika, ikeye kukulwila yetu Isake.

¹¹ Omo kanda vasemuke nambe omo kanda valinge vyavivwa nambe vyavivi, ngeci cizango ca Njambi cakwangula citwaleleleo, kesi omwo vilinga embwe, oloni omwo kusana kwendi

¹² Njambi walekele Lembeka ngwendi, “Mukulunu akapangela shongo yendi.”

¹³ Ngwe muvyendeka visoneka ngwavyo, “Yakomba munjazemene, oloni Isau njamuzindile.”

¹⁴ Vikajo twendeka? Kuma Njambi kesi muka-vushunga ndi? Embwe, kesi ngoco.

¹⁵ Omwo wendekele kuli Mosesa ngwendi, “Njikatetela woshe uje injishaka kutetela, co njikazivila mema ku mbunge woshe uje injishaka kuzivila mema ku mbunge.”

¹⁶ Ngecivene, vyuma vyoshe vyakundama, kesi ku vije vyashaka munu nambe vije vyalinga embwe, oloni a mema ku mbunge ya Njambi lika.

¹⁷ Omwo visoneka vyendeka kuli mwene wa Ingito ngwavyo, “Njakupwisile mwene ngeci njikupangese mukusholola nzili yange nakutsimanesa lutsimo lwange mu kaye mwoshe.”

¹⁸ Ngecivene, Njambi wakala na mema ku mbunge kuli woshe uje yashaka, co akaluwisa mbunge ya woshe uje yashaka.

Vukalu vwa Njambi na mema ku mbunge

¹⁹ Oloni umo weni endeka kuli yange ngwendi, “Nga cinapu ngacije, co Njambi asa kuwana vati mulonga wa munu na munu? Iyajo asa kukanangana cizango ca Njambi?”

²⁰ Oloni yove iyajo, musamba wange, ulikumbulule na Njambi? Ndeo ya vuma kuyasa kwihula munu uje waishongele ngwayo, “Omwo vikajo wanjimungila ngacije?”

²¹ Uje muka-kushonga vindeo ali na moko yakupangesa vuje vuma mwoshe mwashakela, asa kushonga vindeo vivali a cipama cimolika ca vuma, ndeo imo yakupangesa vyuma vya seo, co ndeo ikwavo yakupangesa vyuma vyangoco.

²² Co eci cinapu ca vushunga a vije vyanalingi Njambi. Njambi washakele kumwesa vukalu vwendi nakusholola nzili yendi. Oloni wasimpile nakuyanda ali vaje wakengele na vukalu, vaje wapandele kunyongesa.

²³ Co lalo washakele kusholola vumpau vwendi vwakama, vuje wetilile ali yetu vaje amwesa mema ku mbunge, yetu vaje navwaesa ngeci tutambule vumpau vwendi.

²⁴ Omwo tunapu vanu vaje vasanene, kesi lika akati ka vaYunda embwe, oloni lalo na akati ka vaje kesi vaYunda.

²⁵ Evi vikevyo vyalinakwendeka mu livulu lya Hoziya ngwendi, “Vanu vaje kuvapwile vange njikavatumbula ngwange, ‘Vanu vange.’ Muyati uje kunjazemene njikavasana ngwange, ‘Vaka-cizemo cange.’

²⁶ Co ku mutambela kuje kuvavalekele ngwavo, ‘Kesi mu vanu vange,’ co kuje vene vakavatumbula vana va Njambi wakuyoya.”

²⁷ Co Isaya atambeka ali vaIsalele ngwendi, “Nameme vanu va Isalele vanatumu ngwe lishen̄avu lya ku kenge ya mema a kalunga, oloni vavandondo lika vakovoka,

²⁸ omwo Shukulu Kalunga akasompa vwasi-vwasi vanu voshe va ano asi a simbu imolika nakumanesa.”

²⁹ Ngwe muje mwendekele Isaya akulivanga ngwendi, “Nga Shukulu Kalunga Muka-nzili yoshe katusezeleleko vatekulwila, nga tunapu ngwe Sondoma na Ngomola.”

Muzimbu wauvwa nawo lalo unapu wa Isalele

³⁰ Ngecivene, twendeka ngwetu vaje kesi vaYunda, vaje kuvalipwisile vakevo vavenya vaka-vushunga ku mesho a Njambi, vavapwisile vaka-vushunga ku mesho endi akukulaela,

³¹ oloni vanu va Njambi vaje vashakezekele lishiko ngeci livapwise vaka-vushunga ku mesho a Njambi, kuvaliwanene.

³² Omwo vikajo? Omwo kuvajendamenene akukulaela oloni vajendamenene a vije vivalingile. Co vatanukile a “limanya lyakutanukisa”

³³ ngwe muvyendeka visoneka ngwavyo, “Kenga, njikaka limanya mu Siyone lije likatanukisa vanu, limanya lije likavawisa. Oloni woshe uje akulaela kuli ikeye kakazivi shwamwa.”