Loma 8 - Livulu lya Shukulu Kalunga

Mwonyo mu Munzinzime

¹ Kukwesi cihiso ololo kuli vaje valinakuyoyela muli Kilistu Yesu.

² Omwo lishiko lya Munzinzime, lije litunenela mwonyo muli Kilistu Yesu, linanjipatula ku lishiko lya vuvi na kutsa.

³ Omwo cije Lishiko kucasele kulinga, omwo vusitu vwapwile vwakuzeya, Njambi wacilingile. Wahisile vuvi mu vusitu akutuma Munendi, uje wezile mu cifwa ngwe cifwa cetu ca vusitu, mukutundisa vuvi.

⁴ Njambi walingile eci ngeci vilinga vya vushunga vya Lishiko vavishulise muli yetu vaje valinakuyoya ali Munzinzime, kesi mu vusitu.

⁵ Omwo vaje vanapu vaka-vusitu, vayongola vyuma vya vusitu, oloni vaje vanapu va Munzinzime, vayongola vyuma vya Munzinzime.

⁶ Nga cizango ca vusitu cikutwamenena, co fweto yaco kutsa, oloni nga cizango ca Munzinzime cikutwamenena, co fweto yaco inapu mwonyo na kwoloka.

⁷ Omwo cizango ca vusitu cikeco cinena vutozi kuli Njambi, kucasa kwononoka Mashiko a Njambi, co kucitava vene.

⁸ Co voshe vaje vali mu vusitu kuvasa kuvwaelelesa Njambi.

⁹ Oloni yeni kumwesi mu vusitu, oloni muli mu Munzinzime, nga Munzinzime wa Njambi akala muli yeni. Woshe uje kesi na Munzinzime wa Kilistu, co Kilistu kesi muli ikeye.

¹⁰ Oloni nga Kilistu ali muli yeni, nameme mivila yeni inapu ya kutsa omwo vuvi, oloni Munzinzime napu mwonyo muli yeni omwo vanamipwisa vaka-vushunga ku mesho a Njambi.

¹¹ Nga Munzinzime wa Njambi, uje wasangwile Yesu ku vatsi, akala muli yeni, co uje wasangwile Kilistu ku vatsi ikeye lalo akana mwonyo ku mivila yeni ya kutsa a Munzinzime wendi uje ali muli yeni.

¹² Ngecivene, vakwetu, tuli na likongo, oloni likelyo kesi lyakuyoyela mu vusitu ngwe muvwashaka vusitu vwetu embwe.

¹³ Omwo nga muyoyela mu vusitu, co mukatsa vene, oloni nga ali Munzinzime mutsiya vilinga vyeni vyavivi, co mukayoya.

¹⁴ Omwo voshe vaje Munzinzime wa Njambi alinakuvatwamenena vanapu vana va Njambi.

¹⁵ Omwo Munzinzime uje wanamyana Njambi kamipwisile mu vindungo ngeci mukale na lyova, oloni Munzinzime namipwisa vana va Njambi, co na nzili ya Munzinzime tulinakutambeka kuli Njambi ngwetu, “Tate! Tatetu!”

¹⁶ Munzinzime wa Njambi unalitombola na munzinzime wetu mukusholola ngeci tunapu vana va Njambi.

¹⁷ Omwo tunapu vana vendi, tukatambula vivezikiso vije Njambi natulikila vanu vendi, co lalo tukatambula muli Kilistu vije vyanamutulikila Njambi, omwo nga tuyanda amo na Kilistu, co lalo tukakala amo mu vumpau vwendi.

Vumpau vwa kulutwe

¹⁸ Yange njinayongola ngwange tuyando otu tulinakuyanda simbu ino kutwasa kutuseteka na vumpau vuje vukasholoka kuli yetu.

¹⁹ Omwo vyakutanga vyoshe vili na cizango cakukengelela Njambi ngeci asholole vana vendi.

²⁰ Omwo vyakutanga vavihisile ngeci vipwe vyuma vyangoco, kesi ngwe ku cizango cavyo embwe, oloni capwile cizango ca Njambi ngeci vipwe ngacije. Oloni nameme ngoco kwakele cinyangavili

²¹ ngeci vyakutanga ku litangwa limo vikapatuke ku vundungo vwa kutsa, co vikakale na vumpau vwakupatuka kwa vana va Njambi.

²² Omwo twazivuka ngeci kweta na ku simbu ino vyakutanga vyoshe vilinakukemanga ngwe munakazi uje ashaka kukita mwana.

²³ Oloni kesi vyakutanga lika vilinakukemanga embwe, netu lalo tuli na Munzinzime ngwe vaje vakulivanga kupwa vwana vwa Njambi netu lalo tulinakukemanga omo tulinakuvandamena Njambi ngeci atupwise vana vendi nakupatula mivila yetu.

²⁴ Omwo tunovoka a cinyangavili, oloni cinyangavili cakumona, cikeco kesi cinyangavili. Omwo iyajo ali na cinyangavili ca vije vyanamono?

²⁵ Oloni nga tuli na cinyangavili ca vije kutwamwene, tucivandamena nakusimpa.

²⁶ Mu ngila eyi vene Munzinzime aija nakutukwasa mukuzeya kwetu. Omwo kutuzivuka vati tunapande kulombela, oloni Munzinzime akalambelela kuli Njambi na majwi akukemanga aje kutwasa kutumbula.

²⁷ Co Njambi uje amona mu vimbunge vyetu, azivuka muvyafwa viyongola vya Munzinzime, omwo Munzinzime akalambelela kuli Njambi ali vanu vendi ngwe ku cizango cendi.

²⁸ Tuzivuka ngeci mu vyuma vyoshe Njambi akapanga mwamuvwa na vaje vamuzema, vaje vaanasana ku cizango cendi.

²⁹ Omwo vaje vaangwile Njambi vakevo lalo vaangunwine kuvafwisa ngwe Munendi, ngeci Munendi apwe ntwatwa akati ka vandolome vavangi.

³⁰ Co vaje vaangunwine Njambi, vakevo vaasanene, co vaje vaasanene, wavapwisile vaka-vushunga ku mesho endi, co wavanene vumpau vwendi.

Cizemo ca Njambi muli Kilistu Yesu

³¹ Co a vyuma vyoshe evi, twendeka vatijo? Nga Njambi napu wetu, co iyajo asa kutulwisa?

³² Njambi kavyanene kwana Munendi umolika, oloni watweceleleye yetu voshe! Uje watwanene Munendi, kuma kasa kutwana vyuma vyoshe ndi?

³³ Iyajo asa kuvangela vaje vanaangula Njambi? Njambi ikeye muka-kuvasambesa.

³⁴ Iyajo asa kuvahisa? Kesi Kilistu Yesu, uje watsile, eyo, uje wasangukile ku vatsi, co ali ku livoko lya cilyo lya Njambi, mukutulambelelako kuli Njambi!

³⁵ Iyajo asa kututundisa ku cizemo ca Kilistu? Tuyando, nambe vukalu, nambe mapakeso, nambe njala, nambe vuutu, nambe vushonde, nambe kutsa ndi?

³⁶ Ngwe muvyendeka visoneka ngwavyo, “Omwo lizina lyove tuli mu vushonde vwa kutsa simbu yoshe, valinakutupwisa ngwe vimanga vaje valinakuya nakuvatsiya.”

³⁷ Embwe, mu vyuma vyoshe evi yetu tunahyana muli ikeye uje watuzemene!

³⁸ Omwo njazivuka ngwange mwa vushunga nacimo cai casa kututundisa ku cizemo ca Njambi, nambe kutsa nambe mwonyo, nambe tungelo nambe vaka-kushwana vakala mwilu nambe vaka-nzili vakala mwilu, nambe simbu ya ololo nambe simbu ya kulutwe,

³⁹ nambe cuma cili mwilu, nambe cuma cili mwisi, nacimo cai cakutanga casa kututundisa ku cizemo ca Njambi cije cinapu cetu muli Kilistu Yesu Mwene yetu.