Loma 7 - Livulu lya Shukulu Kalunga

Cimweso ca vulo

¹ Vakwetu, mwa vushunga mwasa kuzivisisa evi vinjendeka kuli yeni, omwo yeni voshe mwazivuka lishiko. Lishiko lili na nzili ali vanu omo valinakuyoya lika.

² Munakazi wakushomboka nakutiwa na lishiko kuli munalume wendi omo munalume wendi acili nakuyoya, oloni nga munalume wendi atsa, asinoni uje munakazi napatuka ku lishiko lije lyamukutile kuli munalume wendi.

³ Ngecivene, nga akala na munalume weka omo munalume wendi acili nakuyoya, co vamutumbula muka-vupangala, oloni nga munalume wendi atsa, co ashomboka ku munalume weka, ou munakazi napatuka kapu lalo muka-vupangala.

⁴ Neni lalo cifwa cimo, vakwetu. Neni lalo munatsi omwo munapu vilyo vya muvila wa Kilistu, co ololo munakundama kuli ikeye, uje ivasangwile ku vatsi ngeci tupangele Njambi vipangi vyavivwa.

⁵ Omwo twayoyele mu vusitu, mashungu a vuvi aje Lishiko lyashangumwine akele nakupanga mu mivila yetu, co vyoshe vitwapangele vyatwalele ku kutsa.

⁶ Ngecivene, ololo, tunapatuka ku Lishiko, omwo twatsile ku cije catupwisile vinzinda. Kutwesi lalo nakupanga mu ngila yalaja ya lishiko lyakusoneka, oloni mu ngila yaiha ya Munzinzime Wakujela.

Lishiko na vuvi

⁷ Ngecivene, tunapande kwendeke ngwetu Lishiko likelyo lyapwa vuvi ndi? Kesi ngoco embwe! Oloni lyapwile lishiko lije lyanjilingisile ngeci njizivuke vuvi. Nga Lishiko kulyendekele ngwalyo, “Kesi uliveyele cuma ca mukweni,” nga kunjazivukile lishungu eli.

⁸ Oloni vuvi vwawanene mwela mukushangumuna mashungu amavi amangi muli yange. Nga lishiko lyai, nga vuvi kuvwesi na nzili.

⁹ Nange a simbu imo njayoyele kujeneka lishiko, oloni omo kushika kwezile, vuvi vwakele na nzili,

¹⁰ co njatsile. Co kushika kuje kwapandele kunena mwonyo, kwanenele kutsa kuli yange.

¹¹ Omwo vuvi vwawanene mwela, co vuvi vwanjikwisile nakunjitsiya.

¹² Ngecivene, Lishiko likelyo lyapwa lyakujela, co nakushika kwapwa kwakujela na vushunga na vuvwa.

¹³ Oloni kuma eci calumbunuka ngeci cije cacivwa cikeco canenele kutsa kuli yange ndi? Kesi ngoco embwe! Eci calingiwile omwo vuvi, akupangesa cije cacivwa, vuvi vwanenele kutsa kuli yange, ngeci cifwa cavwo cisholoke ngeci mwa vushunga vunapu vuvi. Co mu ngila yakushika oku vuvi vunasholoka kupwa vwavuvi manene.

Nzita mukati ka munu

¹⁴ Twazivuka ngwetu Lishiko linapu lya ku munzinzime, oloni yange njinapu munu wa muvila wa situ, wakulandesa ngwe ndungo ku vuvi.

¹⁵ Kunjizivuka vinjilinga, omwo kunjesi kulinga vije vinjishaka kulinga, oloni njikalingi vije njazinda.

¹⁶ Omo nga njilinga vije kunjashakele kulinga, eci cimwesa ngeci njatava ngwange Lishiko linapu lya vushunga.

¹⁷ Ngecivene, kesi yange mwa vushunga njilinakulinga cuma eci, oloni vuvi vuje vulinakuyoya muli yange.

¹⁸ Omwo njazivuka ngwange kumwesi vuvwa muli yange, mu vusitu vwange. Nameme muli yange muli lishungu lyakulinga vyavivwa, oloni kunjasa kulingamo.

¹⁹ Omwo kunjesi kulinga vuvwa vuje vunjishaka kulinga, oloni njikalingi vuvi vuje kunjashakele kulinga.

²⁰ Nga njilinga cije kunjashakele kulinga, eci cinalumbunuka ngeci, kesi yange njilinakucilinga, oloni vuvi vuje vuli muli yange vukevwo vulinakucilinga.

²¹ Ngecivene, njinawana ngwange lishiko eli lilinakupanga, omo njishaka kulinga vyavivwa, co aje vene vuvi vusholoka.

²² Omwo njivwaelela mu Lishiko lya Njambi mukati ka muvila wange.

²³ Oloni njimona lishiko lyeka lilinakupanga mu muvila wange, lishiko lije lilinakulwisa lishiko lije linjinatava mu mbunge yange. Linanjipwisa cinzinda ca lishiko lya vuvi lije lilinakupanga mu muvila wange.

²⁴ Yange munu wakuvindama! Iyajo akanjamena ku muvila ou wa kutsa?

²⁵ Kukandelela kuli Njambi ali Mwene yetu Yesu Kilistu! Ngecivene, omu mukemwo munjinafu, ange lika njasa kupangela lishiko lya Njambi na mbunge yange lika, oloni vusitu vwange vupangela lishiko lya vuvi.