Loma 6 - Livulu lya Shukulu Kalunga

Kutsa ku vuvi oloni kuyoya muli Kilistu

¹ Ngecivene, vikajo twendeka? Tunapande kutwalelelao kuyoya mu vuvi ngeci kutetela kwa Njambi kutume ndi?

² Embwe kesi ngoco! Tunatsi ku vuvi, co vatijo twasa kuyoyelamo?

³ Omwo mwa vushunga munazivuka ngeci omo vatumbwitikile muli Kilistu Yesu, vatumbwitikile ngeci tukale amo mu kutsa kwendi.

⁴ Ngecivene, akutumbwitika, vatutsindile amo nendi na kutsa amo nendi, ngeci, ngwe omo Kilistu vamusangwile ku vatsi na vumpau vwa Ishe, ngeci netu tunapande kuyoyela mu mwonyo wauha.

⁵ Omwo nga tunapu umo nendi mu kutsa kwendi, mu ngila eyi vene tukapwa mumo nendi akusanguka kwendi.

⁶ Co twazivuka ngwetu vunu vwetu vwalaja vavushukikile amo na Kilistu a cilindakano, ngeci muvila wa vuvi vaunyongese, ngeci kesi tupwe lalo tu vindungo va vuvi.

⁷ Omwo munu atsa, napatuka ku nzili ya vuvi.

⁸ Oloni nga tunatsi muli Kilistu, tunakulaela ngwetu tukayoya lalo amo nendi.

⁹ Omwo twazivuka ngwetu Kilistu wasangukile ku vatsi, co kakatsi lalo embwe, kutsa kukwesi na nzili lalo ali ikeye.

¹⁰ Ngecivene, omwo ikeye watsile, vuvi kuvwesi na nzili ali ikeye, co ololo mwonyo uje alinakuyoya nawo alinakuuyoyela muli Njambi.

¹¹ Mu ngila eyi vene munapande kuliyongola yeni vavenya ngweni munatsi, kwesekesa na vuvi, oloni mulinakuyoya muli Njambi ali Kilistu Yesu.

¹² Kesi mutave vuvi vushwane mu mivila yeni ije kuyesi kuyoya myaka yaingi, ngeci mwononoke mashungu avwo.

¹³ Nambe vilyo vyeni kesi muvyecele ku vuvi mukuvipangesa mu vyuma vya kupenga-penga. Oloni likundikeni kuli Njambi, ngwe vanu vaje vavanatundisa ku kutsa nakuvatwala ku mwonyo, co kundikeni vilyo vyeni vyoshe kuli Njambi ngeci vavipangese mu vyuma vya vushunga.

¹⁴ Omwo vuvi kuvwapandele kumishwana embwe, omwo kumwesi nakuyoya ku lishiko embwe oloni mu kutetela kwa Njambi.

Vindungo va vushunga

¹⁵ Vatijo twendeka? Tunapande kulinga vuvi, omwo kutwesi ku lishiko oloni tuli mu kutetela kwa Njambi ndi? Embwe kesi ngoco!

¹⁶ Mwa vushunga mwazivuka ngeci omo mulikundika yeni vavenya ngwe vindungo kukwononoka munu umo, munapu mu vindungo va uje shukulu imulinakwononoka, nambe ku vuvi, vuje vunena kutsa, nambe akwononoka, kuje kunena kumipwisa vaka-vushunga ku mesho a Njambi.

¹⁷ Oloni tukandelela kuli Njambi! Omwo nambe laja mwapwile mu vindungo va vuvi, munononoka na vimbunge vyeni vyoshe vushunga vuli mu vilongesa vije vimwatambwile.

¹⁸ Co vamipatwile ku vuvi, munapu vindungo va vushunga.

¹⁹ (Njilinakupangesa majwi aasi kuwakwata omwo kuzeya kwa vimbunge vyeni vya vunu.) A simbu imo mwalikundikile muvamutunu kupwa vindungo va vyuma vya mazilo na ku kupenga-penga ngeci mulinge vyuma vya kupenga-penga. Mu ngila eyi vene ololo munapande kulikundika muvamutunu kupwa vindungo va vushunga ngeci mulinge vyuma vya kujela.

²⁰ Omo mwapwile vindungo va vuvi, vushunga kuvwakele muli yeni.

²¹ Oloni vikajo mwawaneneo akulinga vyuma vije ololo mulinakuvizivila shwamwa? Fweto ya vyuma vije inapu kutsa!

²² Oloni ololo vanamipatula ku vuvi, co munapu vindungo va Njambi. Fweto yeni inapu mwonyo uje wakulikundika kuli ikeye, cikeco cinena mwonyo wa myaka yoshe.

²³ Omwo fweto ya vuvi inapu kutsa, oloni vwana vwa Njambi vunapu mwonyo wa myaka yoshe muli Kilistu Yesu Mwene yetu.