Loma 5 - Livulu lya Shukulu Kalunga

Kutupwisa vaka-vushunga ku mesho a Njambi

¹ Ngecivene, omo vanatupwisa vaka-vushunga ku mesho a Njambi akukulaela, co tuli mu kwoloka na Njambi ali Mwene yetu Yesu Kilistu.

² Ali ikeye natulingisa ngeci tuzivuke kutetela kwa Njambi, kuje tulinakuyoyela ololo. Co tulinakulishasha mu cinyangavili tulinaco cakutambula vumpau vwa Njambi!

³ Tuli lalo nakulishasha a tuyando twetu, omwo tunazivuka ngwetu tuyando tusholola lukakateya,

⁴ co lukakateya lulingisa ngeci Njambi atutambule, co eci kutambula ca Njambi cinena cinyangavili.

⁵ Co cinyangavili eci kucasa kutuzivisa shwamwa, omwo Njambi netila cizemo cendi mu vimbunge vyetu ali Munzinzime Wakujela, ikeye napu vwana vwa Njambi kuli yetu.

⁶ Omwo a simbu ije twapwile tuvakuzeya, Kilistu watsililile vaka-vuvi a simbu ije yaangwile Njambi.

⁷ Omwo cinapu cuma cacikalu manene kuwana munu atava kutsila muka-vushunga. Amo casa kupwa cacasi kuwana munu uje atava kutsila munu wamuvwa.

⁸ Oloni Njambi nasholola cizemo cendi cakama kuli yetu, omo a simbu ije twapwile tu vaka-vuvi Kilistu watutsililile!

⁹ A n̄ombelo ya kutsa kwendi ololo vanatupwisa vaka-vushunga ku mesho a Njambi, ngecivene, cikahyana manene Kilistu kutwamena ku vukalu vwa Njambi!

¹⁰ Omwo twapwile tu vitozi va Njambi, oloni natupwisa vasamba vendi a kutsa kwa Munendi. Ololo omo tunapu vasamba va Njambi, tukovoka a mwonyo wa Kilistu!

¹¹ Oloni kesi evi lika embwe, tujolela omwo a vije vyanalingi Njambi ali Mwene yetu Yesu Kilistu, uje ololo natupwisa vasamba va Njambi.

Andama na Kilistu

¹² Ngecivene, vuvi vwezile ano a kaye ali munu umolika, co vuvi vwendi vunanene kutsa. Co kutsa kunete ku miyati yoshe ya vanu omwo voshe vanalingi vuvi.

¹³ Vuvi vwakele mu kaye simbu kanda vaane Lishiko, oloni kuje kukwesi lishiko, vuvi kuvavulava nalumo lwai.

¹⁴ Oloni kutunda ku simbu ya Andama nakweta ku simbu ya Mosesa, kutsa kwashwanene a vanu voshe, nameme ali vaje kuvalingile vuvi ngwe mwalingile Andama omo kononokele lishiko lya Njambi. Andama wapwile cimweso ca uje akaija.

¹⁵ Oloni vwana vuje kuvwafwile ngwe kuvulumuna, omwo vwana vwa Njambi kuvwalifwile ngwe vuvi vwa Andama embwe. Mwa vushunga vene vanu vavangi vanatsi omwo vuvi vwa munu umolika. Oloni kutetela kwa Njambi kwakama manene, co na vwana vwendi vwakujeneka kupangela vuje vwanaana kuli vanu vavangi mu kutetela kwa munu uje umolika, ikeye Yesu Kilistu vunapu lalo vwakama manene.

¹⁶ Co kuli kutepesa akati ka vwana vwa Njambi na vuvi vwa munu umolika. Munima ya vuvi vumolika, kwezile kusompa kwa “Kuhisa”, oloni munima ya vivi vyavingi, kunaija vwana vwakujeneka kupangela vwa “Kusambesa!”

¹⁷ Mwa vushunga a vuvi vwa munu umolika kutsa kwashwanene omwo uje munu umolika. Oloni vyuma vije vinasholoka vyanalingi uje munu umolika, ikeye Yesu Kilistu vinahyana manene! Voshe vaje vanatambula kutetela kwa Njambi kwa myaka yoshe vanavapwisa vaka-vushunga ku mesho endi vakashwana mu mwonyo ali Kilistu.

¹⁸ Ngecivene, ngwe a vuvi vumo vanu voshe vanavahisa, mu ngila eyi vene cipangi cimolika ca vushunga cinapatula vanu voshe nakuvana mwonyo.

¹⁹ Co ngwe omo vanu voshe vavapwisile vaka-vuvi akujeneka kwononoka kwa munu umolika, mu ngila eyi vene voshe vakavapwisa vaka-vushunga ku mesho a Njambi akwononoka kwa munu umolika.

²⁰ Lishiko lyasholokele ngeci vilinga vya kupenga-penga vitume, oloni kuje vuvi vwatumine, kutetela kwa Njambi kwatumine manene.

²¹ Ngecivene, ngwe omo vuvi vwashwanene a kutsa, ngeci lalo kutetela kwa Njambi kulinakushwana a vushunga, nakututwamenena ku mwonyo wa myaka yoshe ali Yesu Kilistu Mwene yetu.