Loma 4 - Livulu lya Shukulu Kalunga

Cimweso ca Avilahama

¹ Ngecivene, vatijo twendeka ali kukulwila yetu Avilahama? Vikajo vyalingiwile kuli ikeye?

² Omwo nga ikeye vamupwisile muka-vushunga ku mesho a Njambi a vyuma vije vyalingile, nga wapandele kulishasha, oloni kalishashele ku mesho a Njambi.

³ Visoneka vyendeka ngwavyo, “Avilahama wakulaelele Njambi, co omwo akukulaela kwendi Njambi wamulaveleleco kupwa muka-vushunga.”

⁴ Munu uje apanga atambula fweto, oloni fweto yendi kuvasa kuyitumbula ngwavo vwana, inapu cuma cije napangela.

⁵ Oloni munu uje nemana lika akukulaela kwendi, kesi a vilinga vyendi, co uje akulaela kuli Njambi muka-kusambesa muka-kapayo kupwa wakujeneka mulonga, kunapu kukulaela kwendi kuje Njambi ayongola ngeci amupwise muka-vushunga ku mesho endi.

⁶ Eci cikeco catumbwile Ndaviti omo wendekele akuvezika kwa munu uje Njambi namupwisa muka-vushunga, kujeneka cuma cimo cije calinga uje munu,

⁷ “Vanavezika vanu vaje Njambi navasambesa ku kupenga-penga kwavo, vanu vaje vivi vyavo vanavifwiki!

⁸ Navezika munu uje Shukulu Kalunga kamulavela vivi vyendi!”

⁹ Kuma kuvezika kuje kwendekele Ndaviti kwakundama lika kuli vaka-kutuuka ndi? Mwa vushunga vene embwe! Kunakundama lalo na kuli vaje vaka-kujeneka kutuuka. Omwo tunamono laja mu visoneka ngwavyo, “Avilahama wakulaelele kuli Njambi, co omwo akukulaela kwendi Njambi wamulaveleleco kupwa muka-vushunga.”

¹⁰ Simbu ikajo eci calingiwile? Eci calingiwile simbu kanda Avilahama atuuke indi te natuuka laja? Eci calingiwile simbu kanda atuuke, kesi te natuuka laja.

¹¹ Vamutuwile, co kutuuka kwendi kwapwile cimweso kumwesa ngeci omwo akukulaela kwendi Njambi wamulaveleleco kupwa muka-vushunga simbu kanda vacimutuule. Ngecivene, Avilahama napu ishe ya voshe vaka-kukulaela kuli Njambi, co Njambi navatambula kupwa vaka-vushunga, nambe kuvatuukile.

¹² Co ikeye lalo napu ishe ya voshe vaje vanatuuka, eci cikeco, kuli vaje, kuwezelelako kutuuka, vayoya yoyesi yakukulaela ije yayoyele tatetu Avilahama simbu kanda vamutuule.

Cikulaeso ca Njambi vacitambula akukulaela

¹³ Omo Njambi wakulaesele Avilahama na vatekulwila vendi ngeci vakashwana kaye, walingile eci, kesi ngwe omo Avilahama wononokele Lishiko embwe, oloni omo wakulaelele, co Njambi wamulaveleleco kupwa muka-vushunga.

¹⁴ Omwo nga vije vyakulaesa Njambi vavyana kuli vaje vononoka Lishiko, co kukulaela kwa munu kupwa kwangoco, co cikulaeso ca Njambi cinapu cakujeneka seo.

¹⁵ Omwo lishiko linena vukalu vwa Njambi, oloni nga kukwesi lishiko, co kukwesi kujeneka kwononoka lishiko.

¹⁶ Co cikulaeso cajendamenene akukulaela, ngeci cikulaeso vanapande kucikolesa kupwa vwana vwa Njambi ku vatekulwila voshe va Avilahama, kesi lika kuli vaje vononoka Lishiko embwe, ololo na kuli vaje vakulaela ngwe mwalingile Avilahama. Omwo Avilahama napu tate yetu voshe vaka-kukulaela.

¹⁷ Ngwe muvyendeka visoneka ngwavyo, “Njinakupwisa cisemi ca miyati yaingi.” Ngecivene, cikulaeso cinapu cacivwa ku mesho a Njambi, uje yakulaelele Avilahama, Njambi uje muka-kusangula vatsi, uje akushika kwendi anena vyuma vije kuvyesiko ngeci vikaleko.

¹⁸ Avilahama wakulaelele nakukala na cinyangavili, nameme omo kukwakele cuma cakumulingisa cinyangavili, co wapwile “cisemi ca miyati yaingi.” Ngwe muvyendeka visoneka ngwavyo, “Ngecivene, vatekulwila vove vakatuma manene ngwe vingongonosi.”

¹⁹ Avilahama a simbu ije wakele na myaka 100, oloni kukulaela kwendi kukwazeyele omo wayongwele a muvila wendi uje wakele kuyehi na kutsa, nambe a cuma cije ngeci Sala kasa kukita vana.

²⁰ Kapelyangelele mukukulaela kwendi, co kakele na vimata a cikulaeso ca Njambi, oloni wakulaelele manene, co washangazalele Njambi.

²¹ Wakolesele ngwendi Njambi asa kulinga vije vyanakulaesa.

²² Omu mukemwo Avilahama, akukulaela, “vamulavelelekwo kupwa muka-vushunga ku mesho a Njambi.”

²³ Majwi awa “vamulavelelekwo kupwa muka-vushunga” kuvawasonekelele ikeye lika embwe.

²⁴ Vawasonekelele lalo yetu vavalavela kupwa vaka-vushunga, vaje vanakulaela kuli ikeye uje wasangwile Mwene yetu Yesu ku vatsi.

²⁵ Vamwecelele ngeci atse omwo vivi vyetu, co vamusangwile ngeci vatupwise vaka-vushunga ku mesho a Njambi.