Loma 3 - Livulu lya Shukulu Kalunga

¹ Kuma vaYunda vanatuvakana vaje kesi vaYunda ndi? Nambe kuma kutuuka kuli na seo ndi?

² Cuma cakama manene mu vingila vyoshe! Mu mutambela wakulivanga, Njambi wakundikile lijwi lyendi kuli vaYunda.

³ Oloni vatijo nga vamo vavo kuvapwile va kulongwa? Eci cinalumbunuka ngeci Njambi kesi muka-vushunga ndi?

⁴ Mwa vushunga vene embwe! Njambi napande kupwa wa vushunga, nameme vanu voshe vapwa vaka-makuli. Ngwe muvyendeka visoneka ngwavyo, “Unapande kusholoka muka-vushunga omo wendeka, unapande kuhyana mulonga wove omo vakusompa.”

⁵ Oloni nga vilinga vyetu vya kupenga-penga vije tulinakulinga visholola mwamuvwa vushunga vwa Njambi, twasa kwendeka ngwetu Njambi akalingi mwamuvi omo atunyanyamesa ndi? (Njilinakwendeka mu cifwa ca vanu.)

⁶ Kesi ngoco embwe! Nga Njambi kesi muka-vushunga, vatijo asompa vaka-kaye?

⁷ Oloni nga makuli ange amwesa vumpau vwa Njambi akusholola vushunga vwendi mwamuvwa, omwo vika lalo anga vacinjihisa ngwe muka-vuvi?

⁸ Co vikajo kumwendeka ngweni, “Tulingeni vuvi ngeci vuvwa vusholoke?” Mwa vushunga, vanu vamo valinakunjishaula nakunjivangela ngwavo njinendeka cuma eci! Vakavahisa ngwe mucinapande.

Naumo wai muka-vushunga

⁹ Vationi? Kuma yetu vaYunda tunapu tuvavavwa kutuvakana vaje kesi vaYunda ndi? Kesi ngoco embwe! Omwo njamilekele laja ngwange vaYunda na vaje kesi vaYunda voshe vali mu nzili ya vuvi.

¹⁰ Ngwe muvyendeka visoneka ngwavyo, “Naumo wai muka-vushunga,

¹¹ naumo wai ali na mana nambe muka-kulemesa Njambi.

¹² Voshe vanatenguluka kutunda kuli Njambi, voshe vanalingi vuvi, naumo wai akalingi cuma ca vushunga, nameme umo wai.

¹³ Majwi avo anashulu na vushungu vwa makuli, vindaka vyavo vyendeka makuli, tunwa twavo twendeka majwi amavi ngwe vushungu vwa linyoka.

¹⁴ Endekesi yavo inashulu na visingo vyakulula.

¹⁵ Vazambula kuvulumuna nakutsiya vakwavo,

¹⁶ mu vingila vyavo muli kuviisa nakuyongesa.

¹⁷ Kuvazivuka ngila ya kwoloka,

¹⁸ nambe kuvalilongesele kukomoka Njambi.”

¹⁹ Ololo tunazivuka ngeci vyuma vyoshe mu Lishiko vyakundama kuli vaje vali ku Lishiko, mukuvindika kulisambesa kwoshe kwa vanu nakunena kaye koshe kukusompa kwa Njambi.

²⁰ Omwo munu naumo wai napu muka-vushunga ku mesho a Njambi navilinga vya majwi a Lishiko, omwo majwi a Lishiko akewo anaija ngeci munu azivuke ngwendi nalingi vuvi.

Vati Njambi natupwisa vaka-vushunga ku mesho endi

²¹ Oloni ololo ngila ya Njambi yakulingisa vanu ngeci vapwe vaka-vushunga ku mesho endi inasholoka. Kuyesi nacimo akulinga lishiko, nameme Lishiko lya Mosesa na vaka-kwimanena vaanene vukaleo vwalyo.

²² Njambi alingisa vanu ngeci vapwe vaka-vushunga akukulaela kwavo kuli Yesu Kilistu. Njambi alinga eci kuli voshe vaje vakulaela kuli Kilistu, omwo kumwesi kaangu kai,

²³ omwo vanu voshe vanalingi vuvi, co vanaangunuka ku kwamena kwa Njambi.

²⁴ Oloni vanavapwisa vaka-vushunga kuli Njambi a vwana vwa kutetela kwa Njambi ali Yesu Kilistu, uje navapatula.

²⁵ Njambi wamupwisile n̄ombelo, ngeci a n̄ombelo ya kutsa kwendi akapwe ciingo cakusambesa vuvi vwa vanu akukulaela kwavo kuli ikeye. Njambi walingile cuma eci mukumwesa ngeci napu muka-vushunga. Ku san̄ulu Njambi wasimpile, co kombileko mbunge ku vuvi vwa vanu,

²⁶ oloni ku simbu ino alinakuhisa vuvi vwa vanu, mukumwesa vushunga vwendi. Mu ngila eyi vene Njambi alinakumwesa ngeci ikeye vavenya napu muka-vushunga, co munu woshe uje akulaela kuli Yesu Njambi amupwisa muka-vushunga.

²⁷ Asinoni kulishasha kuli kulijo? Kwaiko vene! Omwo twononoka Lishiko ndi? Embwe, oloni omwo tukulaela.

²⁸ Omwo twayongola ngeci munu vamupwisa muka-vushunga ku mesho a Njambi akukulaela lika, kesi ku vilinga vya majwi a Lishiko.

²⁹ Nambe Njambi kuma wapwa Njambi wa vaYunda lika ndi? Kuma kapwile Njambi wa vaje kesi vaYunda lalo ndi? Mwa vushunga wapwa wa voshe.

³⁰ Omwo Njambi wapwa umolika, co alingisa vaYunda kupwa vaka-vushunga ku mesho endi akukulaela kwavo, co na vaje lalo kesi vaYunda avapwisa vaka-vushunga akukulaela kwavo.

³¹ Kuma eci cinalumbunuka ngeci akukulaela tunavyana Lishiko ndi? Embwe, kesi ngoco, oloni tulinakukolesa Lishiko.