Loma 2 - Livulu lya Shukulu Kalunga

Kuhisa kwa Njambi

¹ Ngecivene, yove musamba wange, kuma ukahisa vakweni ndi? Kuli yove kukwesi kusamba embwe, nameme vene yove iya. Omwo nga uhisa vakweni, co ulinga vyuma vije vivalinga vakevo, ulinakulihisa yove vavenya.

² Twazivuka ngeci Njambi wapwa wa vushunga omo ahisa vanu vaje vakalingi vyuma ngwe evi.

³ Oloni yove musamba wange, ulinga vyuma vije uhisila vakweni! Wayongola ngwove wasa kuputumuka kuhisa kwa Njambi ndi?

⁴ Nambe ulinakuyeluwisa ngozi yendi yakama na kulongwa kwendi nakusimpa kwendi. Mwa vushunga uzivuka ngwove Njambi wakala na ngozi, omwo alinakweseka kukutwamenena ngeci utenguluke.

⁵ Oloni yove uli na mbunge yakukola nakukaluwa, co ulinakulingisa cihiso cove vavenya ngeci cipwe cakama manene a Litangwa lije omo vukalu vwa Njambi nakusompa kwendi kwa vushunga vikasholoka.

⁶ Omwo Njambi akaana cikandelela kuli munu na munu kupwisa ku vipangi vyendi vije vyanalingi.

⁷ Vamo vanu valinakulinga mwamuvwa nakushakezeka vumpau na kasingimiko na mwonyo wa myaka yoshe, kuli vakevo Njambi akavana mwonyo wa myaka yoshe.

⁸ Oloni vamo vanu valizema vakevo vavenya nakuvyana vya vushunga, ngeci vakave vije vya kupenga-penga, co Njambi akamwesa vukalu vwendi na matoto endi ali vakevo.

⁹ Kukakala tuyando nakukemanga kuli vanu voshe vaje valinga vuvi, omwo akulivanga kuli vaYunda, co lalo na kuli vaje kesi vaYunda.

¹⁰ Oloni Njambi akaana vumpau na kasingimiko na kwoloka kuli voshe vaje valinga mwamuvwa, akulivanga kuli vaYunda, co lalo na kuli vaje kesi vaYunda.

¹¹ Omwo Njambi akahisi munu woshe na seteko imo.

¹² Vaje kesi vaYunda kuvesi na Lishiko lya Mosesa, valinga vuvi, co vazimbala akujeneka Lishiko. VaYunda vali na Lishiko, valinga vuvi, co vavahisa na Lishiko.

¹³ Omwo kesi akuziva lika Lishiko ngeci vanu vavapwisa vaka-vushunga kuli Njambi embwe, oloni akulinga mwaya Lishiko.

¹⁴ Omwo vaje kesi vaYunda kuvesi na Lishiko, oloni oshe aje valinga na mana mwaya Lishiko, vakevo vavenya vanapu lishiko lyavo, nameme kuvesi na Lishiko.

¹⁵ Cifwa cavo cimwesa ngeci vije Lishiko livashika vanacisoneka mu vimbunge vyavo. Co lalo citaku-taku cavo civamwesa ngeci cuma eci cinapu ca vushunga, omwo visimbu vimo viyongola vyavo vivahisa, co visimbu vikwavo vivaamena.

¹⁶ Co ngwe ku Vin̄anda Vyavivwa vinjilinakwambulula, omu mukemwo mucikafwa a Litangwa lije omo Njambi akahisa viyongola vyakushweka vya vanu voshe ali Yesu Kilistu.

VaYunda na Lishiko

¹⁷ Oloni vati yove? Ulinakulitumbula yove vavenya ngwove nji kaYunda, wajendamena a Lishiko nakulishashela ali Njambi,

¹⁸ co unazivuka vika Njambi ashaka ngeci uvilinge, co unalilongesa ku Lishiko kwangula vije vinapu vushunga,

¹⁹ co unazivuka mwa vushunga ngeci yove unapu ntwama wa tupuputwa, ceke kuli vaje vali mu lisusulungu,

²⁰ unapu muka-kushungamesa vilema, na mulongisi kuli vaje vali ku nzimba. Wazivuka mwa vushunga ngwove mu Lishiko unawanamo mana akushula na vushunga.

²¹ Ukalongesa vakweni, omwo vikajo kuulilongesela yove vavenya? Ukambulula ngwove, “Kesi mwive” oloni yove ukai nakwiva ndi?

²² Ukendeka ngwove, “Kesi mulinge vupangala” oloni yove ukalingi vupangala ndi? Wazinda tumponya, oloni ukevi vya mu vinjuvo vyakulemesela vinjambi ndi?

²³ Ukalishasha a Lishiko lya Njambi, oloni kuwesi kuzivisa Njambi shwamwa omo upokola lishiko lyendi ndi?

²⁴ Omwo visoneka vyendeka ngwavyo, “Omwo ali yeni vaYunda, vaje kesi vaYunda vendeka vyavivi ali Njambi.”

²⁵ Nga mwononoka Lishiko lya Njambi, kutuuka kweni kuli na seo, oloni nga kumwononoka Lishiko, mwamuvwa nga kumwatuukile.

²⁶ Nga uje kesi kaYunda, uje katuukile, ononoka vije Lishiko lilinakushika, kuma Njambi kakamunyungu ngwe muka-kutuuka ndi?

²⁷ Co yeni vaYunda vakamihisa kuli vaje kesi vaYunda omwo mukapokola Lishiko, nameme vene vanamisonekelalyo, co yeni mwatuuka, oloni vakevo valinakwononoka Lishiko, nambe kuvatuukile ku cisemwa.

²⁸ A vyoshe evi, iya kaYunda wa vushunga, wakutuuka mwa vushunga? Kesi munu uje ikeye kaYunda anja lika embwe, uje kutuuka kwendi kunapu kwa muvila lika.

²⁹ Oloni kaYunda wa vushunga ikeye munu uje kaYunda wa mukati, uje mbunge yendi inatuuka, co eci cinapu cipangi ca Munzinzime wa Njambi, kesi ca Lishiko lyakusoneka embwe. Munu wa cifwa cangacije Njambi amushangazala, kesi vanu embwe.