Loma 14 - Livulu lya Shukulu Kalunga

Kesi uhise mukweni

¹ Tambuleni mwamuvwa munu uje kanda akole mukukulaela, oloni kesi mulinge nendi vimata a viyongola vyendi.

² Kukulaela kwa munu umo kumutavesa kulya nkala cuma, oloni munu uje kanda akole mukukulaela ikeye alya lika visapa-sapa.

³ Munu uje alya coshe-icoshe kesi ayengule uje kesi nakulya, co uje alya lika visapa-sapa kesi ahise uje alya coshe-icoshe, omwo Njambi ikeye namutava.

⁴ Yove iyajo ngeci uhise ngamba yambala? Kuvanga uje shukulu yendi ikeye aangula nga uje ngamba alinga mwamuvwa nambe onwa. Co alinga mwamuvwa, omwo Mwene ikeye amulingisa ngeci alinge mwamuvwa.

⁵ Munu umo ayongola ngeci litangwa limo lili na seo kutuvakana matangwa akwavo, co mukwavo weka lalo ayongola ngeci matangwa oshe afwa mumolika. Munu na munu napande kukolesa ngeci vije vyanayongola vinapu vyavivwa.

⁶ Woshe uje ayongola seo ya litangwa limo napande alinge ngeci mukusingimika Mwene, woshe uje alya cuma coshe-icoshe napande kucilya mukusingimika Mwene, omwo akandelela kuli Njambi a vyakulya. Woshe uje avyana kulya vyakulya vimo avyana mukusingimika Mwene, co akandelela kuli Njambi.

⁷ Naumo wai wetu waliyolela endi lika, naumo wai wetu walitsila endi lika.

⁸ Nga tuyoya, tulinakuyoyela kuli Mwene, co nga tutsa, tulinakutsila kuli Mwene. Ngecivene, nambe tuyoya nambe tutsa, tunapu vanu va Mwene.

⁹ Omwo Kilistu watsile, co wasangukile mukupwa Mwene wa vaka-kuyoya na vatsi.

¹⁰ Ngecivene, kuli yove ukali lika visapa-sapa, omwo vikajo uhisila mukweni? Co lalo yove ukali coshe-icoshe, omwo vikajo uyengwila mukweni? Yetu voshe tukemana ku mesho a Njambi nakutusompa.

¹¹ Omwo visoneka vyendeka ngwavyo, “Mwa vushunga ngwe omo yange Njambi wakuyoya, ngwendi Shukulu Kalunga, vanu voshe vakatsikama ku mesho ange, co vanu voshe vakashangazala yange njapwa nji Njambi.”

¹² Ngecivene, yetu voshe, munu na munu akendeka vyendi vavenya ku mesho a Njambi.

Kesi utanukise mukweni

¹³ Ngecivene, kesi tulihise umo na mukwavo. Oloni unapande kuyongola ngeci kesi wake citanukiso mu ngila ya mukweni nambe cakumuwisa.

¹⁴ Kulitombola kwange muli Mwene Yesu mwa vushunga cinanjizivukisa ngeci kukwesi vyakulya avyo lika vyakujwala, oloni nga munu akulaela ngeci vyakulya vimo vinapu vyakujwala, ngecivene, vipwa vyakujwala kuli ikeye.

¹⁵ Nga uvulumuna mukweni omwo a cuma cimo ciwulya, co kuwesi nakulinga vya cizemo embwe. Kesi utave vyakulya vije viwulya vinyongese munu uje yanatsililile Kilistu!

¹⁶ Ngecivene, kesi utave vije vinapu vyavivwa ku mesho ove ngeci vavishaule.

¹⁷ Omwo Vumwene vwa Njambi kesi ngwe vunapu vwa vyakulya nakunwa embwe, oloni vunapu vwa vushunga na kwoloka nakujolela mu Munzinzime Wakujela.

¹⁸ Co woshe uje apangela Kilistu mu ngila eyi vene, avwaelelesa Njambi, co na vanu vamutava lalo.

¹⁹ Ngecivene, simbu yoshe tunapande kuyongola a vyuma vije vinena kwoloka na vije vikwasa kutakamesa kuli umo na mukwavo.

²⁰ Kesi unyongese vije vyanalingi Njambi omwo akulya lika. Vyakulya vyoshe vasa kuvilya, oloni kesi mwamuvwa kulya cuma cimo cije casa kulingisa umo ngeci awile mu vuvi.

²¹ Cuma cacivwa kulinga cinapu kujeneka kulya situ nakunwa vinyu, nambe kulinga cuma cimo ceka cije citanukisa mukweni.

²² Kukulaela kuje mulinakwo akati keni vavenya na Njambi, navezika munu uje kalizivi kupaya omo alinga cuma cimo namono ngwendi cacivwa!

²³ Oloni nga ikeye ali na vimata ali vije alya, co Njambi amuhisa omo avilya, omwo vilinga vyendi kuvyakundamene akukulaela. Omwo cuma coshe cije kucakundamene akukulaela cinapu vuvi.