Loma 13 - Livulu lya Shukulu Kalunga

Kusingimika vaka-kushwana

¹ Munu woshe napande kwononoka kuli vaka-kushwana, omwo naumo wai ashika kuvanga Njambi namwangula, co vaka-kushwana vaje valiko Njambi ikeye navemika.

² Ngecivene, woshe uje alinga vimata na vaka-kushwana alinga vimata na vije vyanashiki Njambi, co woshe uje alinga evi alinenela cihiso ikeye vavenya.

³ Omwo vaka-kulinga mwamuvwa kuvasa kuzivila lyova vaka-kushwana, oloni kuvanga vaje valinga mwamuvi. Yove kuuzivila lyova munu uje alinakushwana ndi? Ngecivene, linga mwamuvwa, co ikeye akakushangazala,

⁴ omwo napu ngamba ya Njambi ngeci akulingile vuvwa. Oloni nga ulinga mwamuvi, co muzivile lyova, omwo nzili yendi ya kukunyanyamesa inapu ya vushunga. Ikeye napu ngamba ya Njambi, co alinakunena kunyanyamesa kwa Njambi kuli vaje valinga mwamuvi.

⁵ Ngecivene, a cuma eci munapande kwononoka kuli vaka-kushwana, kesi ngwe omwo akunyanyamesa kwa Njambi lika embwe, oloni omwo lalo a citaku-taku.

⁶ Omwo eci cikeco lalo mulinakufwetela lisimu, omwo vaka-kushwana valinakupangela Njambi omo vashulisa vipangi vyavo.

⁷ Fweteni vije vinapu vyavo, vafweteni lisimu lyeni na lisimu lya ku vufuko vweni, co mweseni kasingimiko kuli voshe ava.

Kapandi keni kuli umo na mukwavo

⁸ Kesi mukale na likongo kuli umo, likongo munapande kukala nalyo linapande kupwa lyakulizema lika umo na mukwavo. Woshe uje azema mukwavo nononoka Lishiko.

⁹ Mashiko ngwawo, “Kesi ulinge vupangala, kesi utsiye, kesi wive, kesi uliveyele cuma ca mukweni”, co vyoshe evi, na vyeka lalo, vanavipwisa lishiko limolika ngwavo, “Zema mukweni ngwe muwalizema yove vavenya.”

¹⁰ Nga uzema mukweni, co kuukasa kumulinga mwamuvi embwe, ngecivene, kuzema, kukekwo kwononoka Lishiko lyoshe.

¹¹ Yeni munapande kulinga ngacije, omwo mwazivuka ngweni simbu inete ngeci mwinduke mu tulo. Omwo simbu yakutwamena ili kuyehi kutuvakana muje muyakele omo twakulaelele akulivanga.

¹² Vutsiki ololo vukya, litangwa ololo lituuka. Tulikeleni kulinga vyuma vije vyakundama ku lisusulungu, co twambateni vitwa vyakulwa navyo mu mutanya.

¹³ Twendeni mwamuvwa, ngwe vanu vaje valinakuyoya mu ceke ca mutanya, kesi kulinga kalwa ka ku viwano nambe kupenda, nambe kulinga vupangala nambe kukezima, nambe kulinga lwozi nambe lifuwa.

¹⁴ Oloni zaleni vitwa vya Mwene Yesu Kilistu, kesi mwanuke lalo cifwa ceni ca vusitu nakukavangeya mashungu aco embwe.