Loma 12 - Livulu lya Shukulu Kalunga

Kuyoya mukupangela Njambi

¹ Ngecivene, vakwetu, omwo mema ku mbunge a Njambi akama manene kuli yetu, njimilambelela ngwange, lilambuleni yeni vavenya kuli Njambi ngwe n̄ombelo yakuyoya, likundikeni ku vipangi vyendi nakumuvwaelelesa. Oku kukekwo kulemesa kwa vushunga kuje munapande kulinga.

² Kesi mulipwise ngwe vanu va muno mu kaye, oloni eceleni Njambi atengulule viyongola vya mu vimbunge vyeni. Asinoni mukazivuka cizango ca Njambi, vije vyavivwa nevi vimuvwaelelesa nevi vyakushungama.

³ Omwo vwana njinatambula vwa mema ku mbunge a Njambi njilinakwendeka kuli yeni voshe ngwange, kesi muliyongole yeni vavenya kupwa muvakama manene kutuvakana omu mumunapu. Oloni, munapande kulikeesa mu viyongola vyeni, liiluleni yeni vavenya ngwe kukukulaela kweni kuje kwanamyana Njambi.

⁴ Omwo tuli na vilyo vyavingi mu muvila umolika, co cimo na cimo cili na vipangi vyaco.

⁵ Mu ngila eyi vene, nambe tunapu tuvavangi, tunapu muvila umolika muli Kilistu, co yetu voshe vanatunungila kuli umo na mukwavo ngwe kulyangunuka kwa vilyo vya muvila umolika.

⁶ Ngecivene, tunapande kupangesa vwana vwetu vwakulyangunuka ngwe ku mema ku mbunge a Njambi aje anatumwesa. Nga vwana vwetu vunapu vwakwambulula lijwi lya Njambi, co tunapande kwambulula kupwisa ngwe nakukulaela kwetu tulinakwo,

⁷ nga vwakupangela, co tunapande kupanga vene, nga vwakulongesa, tulongeseni vene,

⁸ nga vwakutakamesa vakwetu, co tunapande kulinga ngacije vene. Woshe uje muka-kwana vakwavo napande kucilinga na lyovwa-ovwa, co woshe uje muka-kushwana napande kupanga manene na nzili, woshe uje amwesa ngozi kuli vakwavo napande kucilinga na mbwase.

⁹ Cizemo cinapande kutungukwa. Zindeni vyuma vyoshe vije vinapu vyavivi, kakateyeni kuli vije vyavivwa.

¹⁰ Lizemeni umo na mukwavo ngwe vandolome na vandokazi, co litakameseni nakulisingimika umo na mukwavo.

¹¹ Pangeni manene na nzili kesi mupwe volwa. Pangeleni Mwene nakulyakako na mbunge yoshe.

¹² Cinyangavili ceni cimivwaelelese, pweni vaka-lukakateya mu tuyando tweni, co lombeleni simbu yoshe.

¹³ Lipangeleni vije mulinavyo na vakweni vaka-Yesu vaje vanajeneka, co tambuleni vangenzi mu vinjuvo vyeni.

¹⁴ Vezikiseni vaje valinakumiyandesa, eyo, vavezikiseni, co kesi muvasinge embwe.

¹⁵ Vwaeleleni na vaje valinakuvwaelela, lileni na vaje valinakulila.

¹⁶ Yoyeni mulizivasano umo na mukwavo. Kesi mulyalese, oloni likeeseni mu vipangi. Kesi muliyongole yeni vavenya ngwe munapu vaka-kunyanyama.

¹⁷ Nga umo nakuviisila, kesi umwilwisile vuvi vwendi lalo embwe. Lingeni vyavivwa ku mesho a vanu voshe.

¹⁸ Lingeni vyuma vyoshe ngwe mumunasela nakuyoya mu kwoloka kuli munu na munu.

¹⁹ Vasamba vange, kesi mulinge shambandinga, oloni eceleni vukalu vwa Njambi vucilinge. Omwo visoneka vyendeka ngwavyo, “Yange njilinga shambandinga, njikavelwisila fweto yavo, mwanendeka Shukulu Kalunga.”

²⁰ Oloni, ngwe muvyendeka visoneka ngwavyo, “Nga muka-n̄ole yove ali na njala, mwane vyakulya, nga ali na lihwila, mwane mema anwe, omwo akulinga eci ulinakumulingisa ngeci azive shwamwa.”

²¹ Kesi mutave vuvi vumihyane, oloni hyaneni vuvi na vuvwa.