Loma 11 - Livulu lya Shukulu Kalunga

Mema ku mbunge a Njambi ali Isalele

¹ Njihula ngwange, kuma Njambi navyana vanu vendi ndi? Embwe kesi ngoco! Yange vene njapwa kaIsalele, mutekulwila wa Avilahama, njapwa wa ku muyati wa Mbenjemani.

² Njambi kavyanene vanu vendi, vaje vaangwile kutunda ku san̄ulu. Yeni mwazivuka muvinendeka visoneka mu mutambela kuje vendeka Elinja alambelela Njambi ali Isalele ngwendi,

³ “Shukulu Kalunga, vanatsii vaka-kwimanena vove, co vanasiwula mitula yove, kuvanga yange lika njinasalao, co vashaka kunjitsiya.”

⁴ Njambi wamukumbulwile vatijo? Wamukumbulwile ngwendi, “Njinatulika vanalume vakupwa 7,000 vaje kanda valemese kamponya Mbale.”

⁵ Ngecivene, cinapu cuma cimo vene na ololo, kuyicili mbunga yaindondo vanasalao vaje vaangwile Njambi omwo kutetela kwendi.

⁶ Kwangula kwendi kunajendamena a kutetela kwendi, kesi ngwe a vije vivanalingi embwe. Omwo nga kwangula kwa Njambi kwapwa kwa a vije vivalinga vanu, nga kutetela kwendi kukwapwile kutetela kwa vushunga.

⁷ Vationi? Vanu va Isalele kuvawanene cije civakele nakushakezeka. Yapwile mbunga yaindondo lika vaje vaangwile Njambi vakevo vaciwanene, co vaje vasaleleo vapwile tusinda-matwi kukusana kwa Njambi.

⁸ Ngwe muvyendeka visoneka ngwavyo, “Njambi nazivalesa vimbunge na mana avo, nakweta ku litangwa lyalelo kuvasa kumona nambe kuziva.”

⁹ Co Ndaviti alinakwendeka ngwendi, “Viwano vyavo vipwe myeto, co vatsemo, vanapande kuwa, vanapande kuvanyanyamesa!

¹⁰ Mesho avo apwe a vupuputwa ngeci kesi vase kumona, co vakulame myongo yavo simbu yoshe mu tuyando twavo.”

¹¹ Ngecivene, njihula ngwange, omo vaYunda vatanukile, kuma vawile nakunyonga ndi? Embwe kesi ngoco! Omwo valingile vuvi, kwamena kunaija kuli vaje kesi vaYunda, ngeci vaYunda vazivile lifuwa vaje kesi vaYunda.

¹² Vuvi vwa vaYunda vwanenele vivezikiso vyakama mu kaye, co kuutwa kwavo kwa mu munzinzime kwanenele vivezikiso vyakama kuli vaje kesi vaYunda. Ngecivene, vikapwa vatijo vivezikiso vyakama manene omo vungi vwa vaYunda vanavawezelela!

Kwamena kwa vaje kesi vaYunda

¹³ Njilinakwendeka ololo kuli yeni kesi vaYunda ngwange, ngwe omo njinapu muluwa kuli vaje kesi vaYunda, njikalyalesa mu vipangi vyange.

¹⁴ Amo njasa kulingisa vanu va ku muyati wange lifuwa, ngeci njase kwamenako vamo.

¹⁵ Omwo nga vavayengwile, co vaka-kaye vavatengulwile mukujeneka kupwa vitozi va Njambi, co ololo vanapu vasamba va Njambi. Cikapwa vatijo omo vanavatambula? Cikapwa mwonyo ku vatsi!

¹⁶ Nga mbazuvwila yakulivanga ya likende vayana kuli Njambi, ngecivene, na mukasha woshe wamutunu unapu wendi lalo, nga mizi ya muti vaikombelela kuli Njambi, co na minango lalo inapu yendi.

¹⁷ Oloni nga minango imo ya ku muti wa olive wakukuna vanaijokolako, co munango wa olive wa mu shwata vanaunungilako. Yeni kesi mu vaYunda munapu ngwe uje muti wa olive wa mu shwata, co ololo munalipangela yoyesi yaivwa ya munzinzime ya vaYunda.

¹⁸ Ngecivene, kumwapandele kuyengula vaje vavajokwele ngwe minango. Vatijo mwasa kulyalesa? Yeni munapu lika mu minango, kumwesi kukwata mizi, oloni mizi ikeyo ilinakumikwata.

¹⁹ Oloni mwendeka ngweni, “Eyo, oloni minango vaijokwele ngeci kusale mwela wetu.”

²⁰ Eci cinapu ca vushunga. Vavajokweleko omwo kuvakulaelele, oloni yeni munatumbama mu mwela weni omwo munakulaela. Oloni kesi mulyalese a viyongola evi, munapande kuziva lyova.

²¹ Omwo nga Njambi katetelele vaYunda, vaje vanalifu ngwe minango ya cisemwa, muyongola ngweni akamitetela ndi?

²² Ano tumona cizemo ca Njambi nakukaluwa kwendi. Ikeye napu muka-kukaluwa kuli vaje vanau, oloni napu muka-cizemo kuli yeni, nga mutwalao mu cizemo cendi. Oloni nga kumulingimo, co neni lalo vakamijokolako.

²³ Nga vaYunda vakashangumuka kukulaela lalo, co vakavelwisila lalo mu mutambela muje muvakele, omwo Njambi asa kulinga ngacije lalo.

²⁴ Omwo nga yeni kesi vaYunda munalifu ngwe munango wa ku muti wa olive wa mu shwata uje uvanajokolako, co ngwe kesi mu cifwa cawo, vanaunungila ku muti wa olive wakukuna. VaYunda vanalifu ngwe ou muti wakukuna, co cikapwa cacasi manene kuli Njambi kunungilako eyi minango ivajokwele ku muti wayo lalo.

Mema ku mbunge a Njambi kuli voshe

²⁵ Kuli vushunga vwakushwekesa, vakwetu, vuje vunjishaka ngeci muvuzivuke, omwo vukamivindika kuyongola ngweni munapu vakunyanyama. Oku kukaluwa kwa vimbunge vya vanu va Isalele kesi ngwe kwa myaka yoshe embwe, oloni kukakalako lika noo vaje kesi vaYunda vanapumo kwija kuli Njambi.

²⁶ Eyi ikeyo ngila vanu va Isalele voshe vakavaamena nayo. Ngwe muvyendeka visoneka ngwavyo, “Muyoyesi akatunda ku Siyone, co akatundisa kupenga-penga kwoshe ku vatekulwila va Yakomba.

²⁷ Co njikalikumiiya navo cikumiiyo eci omo njikatundisa vivi vyavo.”

²⁸ Omwo vanavyana Vin̄anda Vyavivwa, vaYunda vanapu vitozi va Njambi omwo yeni kesi mu vaYunda. Oloni omwo kwangula kwa Njambi, vanapu vasamba vendi omwo ali vakukulwila vavo.

²⁹ Omwo Njambi kesi kutengulula viyongola vyendi kuli vaje aangula nakuvavezikisa.

³⁰ Ngwe ali yeni kesi vaYunda, kumwononokele Njambi ku san̄ulu, oloni ololo munatambula mema ku mbunge a Njambi omwo akujeneka kwononoka kwa vaYunda.

³¹ Mu ngila eyi vene, omwo a mema ku mbunge a munatambula, co ololo vaYunda kuvesi nakwononoka Njambi, ngeci na vakevo ololo vatambule mema ku mbunge a Njambi.

³² Omwo Njambi napwisa vanu voshe vinzinda vakujeneka kwononoka, ngeci amwese mema ku mbunge ku voshe.

Kushangala Njambi

³³ Vufuko vwa Njambi vwapwa vwavungi manene! Kuzivuka kwendi na mana endi vyapwa vyakulova manene! Iyajo asa kulumbununa matumbe endi? Iyajo asa kuzivuka vingila vyendi?

³⁴ Ngwe muvyendeka visoneka ngwavyo, “Iyajo azivuka mana a Shukulu Kalunga? Iyajo asa kumunangula?

³⁵ Nambe iyajo wamwanene cuma cimo ngeci amwilwisile fweto?”

³⁶ Omwo ikeye watangele vyuma vyoshe, co vyuma vyoshe vilinakuyoya muli ikeye na ali ikeye. Kuli Njambi kukale vumpau ku myaka yoshe! Ewa.